İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 167 Hüküm no: 126 Orijinal metin no: [45a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Saraçlar esnafı kethudâlığına Mustafa Usta’nın tayini ve daha önce kethudâ olan Solaklar Emini Halil’in müdâhalesinin men‘i Âsitâne-i aliyye’de vâki‘ sarrâchâne ustalarından ve müsinn [ü] ihtiyârlarından Ali Usta b. Mustafa ve el-Hâc Abdi b. el-Hâc Hasan ve el-Hâc Mustafa b. el-Hâc Ali ve el-Hâc Ali b. Veli ve el-Hâc Mehmed b. Hasan ve el-Hâc Ahmed b. Mehmed ve el-Hâc Mehmed b. Mehmed ve Ali Usta b. Abdurrahman ve İbrahim b. Ali ve Hâfız Mehmed b. Ali ve Mehmed Odabaşı b. Hasan ve İbrahim b. Mustafa ve Hüseyin b. Halil ve Ali b. Mustafa ve Mustafa Odabaşı b. Ahmed ve Osman b. Mahmud ve el-Hâc Halil b. Abdullah ve sâirleri meclis-i şer‘-i şerîf-i enverde hâlâ berat-ı âlîşân ile kethudâları olan işbu râfi‘u’l-kitâb Mustafa Usta b. Ali nâm kimesne mahzarında herbiri takrîr-i kelâm edip kethudâmız mezbûr Mustafa Usta her vechile emîn ve mu‘temed ve hüsn-i vech üzere nizâm-ı kadîme mürâ‘i ve cümlemiz kendiden hoşnûd ve râzı olup bundan akdem Solaklar Emîni Halil nâm kimesne kethudâmız olmağla kendiden adem-i râhatımıza binâen teşekkî ve kethudâlıkdan ihrâc ve yerine cümlemizin ihtiyârıyla mezbûr Mustafa Usta kethudâ nasb olunmuşidi lâkin mezbûr Halil kethudâlığa müdâhaleden hâlî olmamağla mezbûrun müdâhalesi men‘ ve mezbûr Mustafa Usta kemâ-fi’l-evvel kethudâ nasb olunmak matlûbumuzdur [deyu] iltimâs etmeleriyle muvakkı‘-ı sadr-ı kitâb -rafa‘a kadrehû mevlâhü’l[45b]-vehhâb- efendi hazretleri dahi mezbûr Halil’i kethudâlığa müdâhaleden ba‘de’l-men‘ mezbûr Mustafa Usta’nın yedinde olan berat-ı şerîf-i âlîşân mûcebince kemâ-fi’l-evvel kethudâ olmak üzere nasb ü ta‘yîn buyurduklarında ol dahi kabûl ve hidemât-ı lâzımesini edâ ve nizâm-ı kadîmleri üzere harekete ta‘ahhüd etmeğin mâ-vaka‘a bi’t-taleb ketb olundu. Fî 15 min-Ramazan sene 1184. Şuhûdu’l-hâl: Muhzır Kethudâsı Mehmed Ağa, İsmail Çelebi b. Ali, Ali Çelebi b. Abdullah, Osman Bölükbaşı b. Abdullah, Ali Çelebi b. Abdurrahman.