İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 167 Hüküm no: 127 Orijinal metin no: [45b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Habbaz Ferhad’ın üç fırın ve değirmenlerdeki iki sehim gedik hissesini ortağına sattığı Habbâz tâifesinden Ferhad v. Ariton nâm zimmî meclis-i şer‘-i şerîf-i enverde müşteriki işbu âmilü’r-rakīm Filyos v. Avanis nâm zimmî muvâcehesinde ikrâr ve takrîr-i kelâm edip zikri âtî fırın ve değirmenin mecmû‘u mahrûse-i Galata’ya muzâfe kasaba-i Beşiktaş’da vâki‘ Sinan Paşa mahallesinde kebîr fırın ve ona merbût yine mahalle-i mezbûrede altı horos değirmen ve yine Köprübaşı nâm mahâlde vâki‘ fırın ve ona merbût Zindân Değirmeni demekle ma‘rûf dört horos değirmen ve yine Arab İskelesi’nde vâki‘ fırın ve ona merbût Beşiktaş İskelesi başında üç horos değirmen mecmû‘u on üç horos olup fırın ve değirmenlerin derûnlarında mevcûd gedik ta‘bîr olunur cem‘an elli üç re’s bargir ve sâir âlât-ı lâzıme-i ma‘lûmenin on iki sehim i‘tibârıyla iki sehim hisse-i şâyi‘aları akd-i âti’z-zikrin sudûruna değin yedimde mülk ve hakkım olmağla hâlâ ben fırın ve değirmenlerde mevcûd gedik ta‘bîr olunur mârrü’z-zikr bargir ve sâir âlât-ı lâzıme-i ma‘lûmede olan iki sehim hisse-i şâyi‘amı tarafeynden îcâb ve kabûlü hâvî şurût-ı müfsideden ârî bey‘-ı bâtt-ı sahîh-i şer‘î ile safka-i vâhide ile iki bin yedi yüz otuz altı guruşa müşterikim merkūm Filyos’a bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz ve kabûl eylediğinden sonra semeni olan meblağ-ı mezbûr iki bin yedi yüz otuz altı guruşu merkūm Filyos yedinden tamamen ahz u kabz eyleyip bey‘-ı mezkûrun tağrîr ve gabnine ve bi’l-cümle husûs-ı mezkûra müte‘allika âmme-i da‘vâdan merkūm Filyos’un zimmetini ibrâ ve ıskāt edip ol dahi bana medfû‘u olan meblağ-ı mezkûra müte‘allika da‘vâdan benim zimmetimi ibrâ ve ıskāt ve herbirimiz âharın ibrâsını kabûl eyledik fîmâ-ba‘d mârrü’z-zikr fırın ve değirmenler derûnunda mevcûd zikrolunan bargir ve sâir âlât-ı lâzıme-i ma‘lûmenin iki sehim hisse-i şâyi‘aları dahi merkūm Filyos’un mülk-i müşterâsı ve hakk-ı sırfı olup benim kat‘a alâka ve medhalim kalmamışdır dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 3 Şevval sene 1184. Şuhûdu’l-hâl: Molla Ahmed b. Hüseyin, es-Seyyid el-Hâc Ebûbekir Ağa, Salıcı Molla Osman, Ekmekçiler Kethudâsı Ali Ağa b. Abdullah, Sofular Fırıncısı Molla Mustafa b. Mehmed, Acımusluk Fırıncısı Ahmed Beşe, Papasoğlu Bogos v. Aleksan, Markos v. Samuel, şerîki Agop v. Sohrab, şerîki Avanis v. Sohrab, Mikayil v. İstefan, şerîki Bünyad v. Dotos, Ariton v. Yogaz, Kirkor v. Şehbaz, Agafok v. Serkiz, Mardiros v. Samuel.