İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 168 Hüküm no: 128 Orijinal metin no: [45b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Akindos ve Agop’un değirmen ve fırından dörder sehim gedik hisselerini sattıkları Mahmiye-i İstanbul’da Balatkapısı hâricinde Karabaş mahallesinde vâki‘ dört horos değirmen ve ona merbût mahmiye-i mezbûrede Sultân Selim Kapısı kurbünde vâki‘ fırın gedik ta‘bîr olunur on altı re’s bargir ve sâir âlât-ı lâzıme-i ma‘lûme on altı sehim i‘tibârıyla sekiz sehmi Ahmed Ağa b. Mehmed’in ve dört sehmi Akindos v. Melkon’un ve dört sehmi Agop v. Arakil’in şâyi‘an mülkleri olduğu lede’ş-şer‘i’l-enver zâhir oldukdan sonra merkūmân Akindos ve Agop meclis-i şer‘-i şerîf-i enverde işbu râfi‘u’l-kitâb mezbûr Ahmed Ağa [46a] mahzarında herbiri ikrâr ve takrîr-i kelâm edip mârrü’z-zikr değirmen ve fırında ber-vech-i muharrer gedik ta‘bîr olunur on altı re’s bargir ve sâir âlât-ı lâzıme-i ma‘lûmede olan i‘tibâr-ı mezkûre üzere yedimizde olan dörder sehm-i şâyi‘alarımızı tarafeynden îcâb ve kabûlü hâvî şurût-ı müfsideden ârî bey‘-ı bâtt-ı sahîh-i şer‘î ve safka-i vâhide ile herbirimiz altışar yüz guruşdan cem‘an bin iki yüz guruşa mezbûr Ahmed Ağa’ya bey‘ ve temlîk ve teslîm eylediğimizde ol dahi iştirâ ve temellük ve tesellüm ve kabz ve kabûl eylediğinden sonra semeni olan meblağ-ı mezbûr bin iki yüz guruşu mezbûr Ahmed Ağa yedinden bi-kadri’l-hısas tamamen ahz u kabz eyleyip bey‘-ı mezkûrun tağrîr ve gabnine müte‘allika mezbûr Ahmed Ağa’nın zimmetini ibrâ ve ıskāt edip ol dahi bize medfû‘u olan meblağ-ı mezkûra müte‘allika da‘vâdan bizim zimmetimizi ibrâ ve ıskāt ve herbirimiz âharın ibrâsını kabûl eyledik fîmâ-ba‘d mârrü’z-zikr değirmen ve fırında gedik ta‘bîr olunur bargir ve sâir âlât-ı lâzıme-i ma‘lûmenin dörder sehim hisse-i şâyi‘aları mezbûr Ahmed Ağa’nın mülk-i müşterâsı ve hakk-ı sırfı olup bizim kat‘a alâka ve medhalim kalmamışdır dediklerinde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 18 Şevval sene [1]184. Şuhûdu’l-hâl: Molla Ahmed b. el-Hâc Hüseyin, es-Seyyid el-Hâc Ebûbekir Ağa, Uncular Kethudâsı Mustafa b. Ahmed, Ekmekçiler Kethudâsı Ali b. Abdurrahman.