İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 169 Hüküm no: 129 Orijinal metin no: [46a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Ağa’nın Küçükmustafapaşa’daki bakkal dükkânı gediğini ve mallarını sattığı Bakkāl Sâbıkā Anadolu kādıaskeri olan fazîletlü Mehmed Murad Efendi hazretlerinin etbâ‘larından Kangırılı (Çankırılı) es-Seyyid Mehmed Ağa b. Abdullah meclis-i şer‘-i şerîf-i enverde bakkāl tâifesinden işbu hâmilü’r-rakīm Atanos v. Yani nâm zimmî muvâcehesinde ikrâr-ı tâm ve takrîr-i kelâm edip akd-i âti’z-zikrin sudûruna değin yedimde mülk ve hakkım olup mahmiye-i İstanbul’da Küçükmustafapaşa’da Ekmekçi Papasoğlu Fırını ittisâlinde vâki‘ Hasan Çelebi Dükkânı demekle arîf bir bâb bakkāl dükkânı derûnunda mevcûd ber-mûceb-i defter-i müfredât bakkāl metâ‘ı ve beyne’l-hiref gedik ta‘bîr olunur iki terâzi ve iki takım dirhem ve üç kantar ve on fıçı ve dört taş küp ve on tabla ve bir piştahta ve iki akçe tahtası ve bir leğen ve bir ibrik ve kebîr kazgan ve bir tencere ma‘a kapak ve bir tâbemi tarafeynden îcâb [ve] kabûlü hâvî şurût-ı müfsideden ârî bey‘-ı bâtt-ı sahîh-i şer‘î ve safka-i vâhide ile mersûm Atanos’a sekiz yüz elli guruşa bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz ve kabûl eylediğinden sonra semeni olan meblağ-ı mezkûr sekiz yüz elli guruşu mersûm Atanos yedinden tamamen ahz u kabz edip semenine ve bey‘-ı mezkûrun tağrîr ve gabnine müte‘allika âmme-i da‘vâdan herbirimiz âharın zimmetini ibrâ ve ıskāt ve herbirimiz ber-vech-i muharrer âharın ibrâsını kabûl eyledik fîmâ-ba‘d dükkân-ı merkūm derûnunda mevcûd emti‘a ve gedik ta‘bîr olunur âlât-ı lâzıme-i ma‘lûme mersûm Atanos zimmînin mülk-i müşterâsı ve hakk-ı sırfı olup benim kat‘a alâka ve medhalim kalmamışdır dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 17 min-Şevvali’l-mükerrem sene 1184. Şuhûdu’l-hâl: Hazînedâr Halil Ağa, Kahveci Ebûbekir Ağa, Mehmed b. Hüseyin müezzin, Mustafa b. Ahmed, Muhzır Kethudâsı Mehmed Ağa b. Ahmed, Ali Çelebi b. Abdullah.