İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 170 Hüküm no: 130 Orijinal metin no: [46a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Uncu Abdullah’ın Şariyeci Değirmeni’ndeki altı sehim gedik hissesini sattığı Mahmiye-i İstanbul’da Küçükpazar kurbünde Hoca Halil Attar mahallesinde sâkin uncu tâifesinden el-Hâc Abdullah b. el-Hâc Mehmed nâm kimesne meclis-i şer‘-i şerîf-i enverde uncular kethudâsı işbu râfi‘u’l-kitâb Mustafa Ağa b. Ahmed mahzarında ikrâr ve takrîr-i kelâm edip mahmiye-i mezbûrede Unkapanı kurbünde Arabacılar mahallesinde vâki‘ Şa‘riyeci Değirmeni demekle ma‘rûf dört horos değirmen derûnunda mevcûd gedik ta‘bîr olunur on altı re’s bargir ve sâir âlât-ı lâzıme-i ma‘lûme olan [on] altı sehim i‘tibârıyla bi’l-cümle yedimde mülk ve hakkım olmağla hâlâ ben zikrolunan on altı bargir ve sâir âlât-ı lâzıme-i ma‘lûmede olan i‘tibâr-ı mezkûr üzere altı sehime isâbet eden altı re’s bargir ve sâir âlât-ı lâzıme-i ma‘lûmemi tarafeynden îcâb ve kabûlü hâvî şurût-ı müfsideden ârî bey‘-ı bâtt-ı sahîh-i şer‘î ve safka-i vâhide ile altı yüz elli guruşa mezbûr Mustafa Ağa’ya bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm [46b] ve kabz ve kabûl eylediğinden sonra semeni olan meblağ-ı mezkûr altı yüz elli guruşu Mustafa Ağa yedinden tamamen ahz u kabz eyleyip bey‘-ı mezkûrun tağrîr ve gabnine müte‘allika âmme-i da‘vâdan mezbûr Mustafa Ağa’nın zimmetini ibrâ ve ıskāt edip ol dahi bana medfû‘u olan meblağ-ı mezkûr altı yüz elli guruşa müte‘allika âmme-i da‘vâdan benim zimmetimi kezâlik ibrâ ve ıskāt ve herbirimiz ber-vech-i muharrer âharın ibrâsını kabûl eyledik fîmâ-ba‘d mârrü’z-zikr on altı sehimden altı sehim hisseye isâbet eden altı re’s bargir ve sâir âlât-ı lâzıme-i ma‘lûme mezbûr Mustafa Ağa’nın mülk-i müşterâsı ve hakk-ı sırfı olup i‘tibâr-ı mezkûr üzere altı sehim hissede benim alâkam kalmamışdır dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 5 min-Şevval sene 1184. Şuhûdu’l-hâl: Molla Ahmed b. el-Hâc Hasan, es-Seyyid el-Hâc Ebûbekir Ağa, Ekmekçiler Kethudâsı Ali Ağa b. Abdurrahman, Kethudâ-yı Muhzırân Mehmed Ağa, Ekmekçi Molla Ahmed, Mehmed Emin Ağa, el-Hâc Abdullah.