İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 171 Hüküm no: 131 Orijinal metin no: [46b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul’daki kebapçı, şerbetçi ve çörekçi esnafının talebi üzerine Ahmed Usta’nın kethudâlıktan azli ile yerine İbrahim Usta’nın tayin olunduğu Âsitâne-i aliyye ve tevâbi‘inde vâki‘ kebabcı ve şerbetçi ve çörekçi esnâfının ehl-i İslam ustalarından sâbıkā kethudâları Mehmed Usta b. İsmail ve yiğitbaşıları Hasan Usta b. Abdülfettah ve ihtiyârlarından el-Hâc Ali b. Mehmed ve Hüseyin b. Mustafa ve Hâfız Salih b. Osman ve Mehmed b. Ahmed ve Abdülkerim b. Abdülfettah ve Halil b. Ali ve Osman b. Mehmed ve Hüseyin b. Mustafa ve Ali b. Hasan ve Mehmed b. Osman ve Mehmed b. İbrahim ve Mehmed b. Ahmed ve İsmail b. Süleyman ve Mehmed b. Hasan ve es-Seyyid Hâfız İbrahim b. İsmail ve es-Seyyid Mehmed b. es-Seyyid Mustafa ve Mehmed b. Hüseyin ve İsmail b. Mehmed ve es-Seyyid İsmail ve el-Hâc Süleyman ve Abdurrahman ve es-Seyyid Mustafa ve es-Seyyid Ali ve Mustafa ve sâirleri ile zimmî ustalarından Anaştaş ve Mitro ve Niko ve Martin ve Tanaş ve Aslan ve Belim ve Mitra ve Arakil ve Agop ve Hristo ve Kiryako ve Andreya ve Kirakor ve Resyoz ve İlya ve Nikola ve Timur nâm zimmîler şer‘-i şerîf-i enverde esnâf-ı mezbûreden olup Bahçekapısı hâricinde sâkin işbu râfi‘u’l-kitâb İbrahim Usta b. Ahmed hazır olduğu hâlde her biri takrîr-i kelâm ve ifâde-i merâm edip esnâfımızın kethudâsı olan işbu hazır bi’l-meclis Ahmed Usta kendi hâlinde olmayıp esnâfı hilâf-ı şer‘ rencîdeden hâlî olmamağla azl olunup yerine cümlemizin mu‘temed ve muhtârı ve her vechile umûr-ı esnâfı idâreye kādir olan mezbûr İbrahim Usta’yı üzerimize kethudâ nasb ü ta‘yîn olunmak matlûbumuzdur dediklerinde mezbûr Ahmed Usta dahi keff-i yed etmekle a‘lâ-yı kitâbı tevkī‘-i müstetâbı ile tezyîn eden hâkim-i hâsim efendi hazretleri mezbûr Ahmed Usta’yı kethudâlıkdan ba‘de’l-azl yerine mezbûr İbrahim Usta’yı esnâf-ı mezkûre üzerlerine iltimâslarıyla kethudâ nasb ü ta‘yîn ve umûr-ı mu‘tâdeleri alâ-vechi’l-istikāme rü’yet etmek üzere tenbîh buyurduklarında ol dahi kabûl ve hilâf-ı şer‘ esnâf-ı mezkûreyi rencîde etmeyip nizâm-ı kadîmleri üzere umûrlarını rü’yet ve idâreye müte‘ahhid olmağın mâ-hüve’l-vâki‘ bi’t-taleb ketb olundu. Fî 29 min-Şevval sene 1184. Şuhûdu’l-hâl: Muhzırân Kethudâsı Mehmed Ağa b. Ahmed, İsmail Çelebi b. Ali, Osman Ağa b. Halil, Ali Çelebi b. Abdullah.