İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 171 Hüküm no: 132 Orijinal metin no: [46b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Müderris İzzet Süleyman Efendi’nin Debbağzâde Hüseyin Ağa mahallesindeki menzilini sattığı Mahmiye-i İstanbul’da Drağman mahallesinde sâkin müderrisîn-i kirâmdan İzzet Süleyman Efendi b. Ahmed tarafından husûs-ı âti’z-zikre değin [vekîl] olduğu Osman Çelebi b. Halil ve Osman Ağa b. Mustafa nâm kimesneler şehâdetleriyle sâbit olan Mehmed Ağa b. Ahmed meclis-i şer‘-i hatîr-i lâzımü’t-tevkīrde işbu kitâb-ı müşkîn-nikāb yedlerine vusûl ile şeref-yâb olan sâbıkā Anadolu kādıaskeri a‘lemu ulemâ’i’l-mütebahhirîn efdalü’l-fudalâi’l-müteverri‘în menba‘u’l-lutf ve’l-kemâl madenü’l-fazl ve’l-iftizâl merci‘u’l-ekâbir vârisü’l-mecd ve’l-ekârim-hazret-i Mehmed Murad Efendi neclü’l-merhûmi’l-mebrûr ed-dâricü ilâ-medârici rahmeti’l-gafûr Şeyhülislâm-ı esbak Feyzullah Efendi taraf-ı pür-şereflerinden ikrâr-ı câ’i’z-zikri tasdîka vekîl olduğu lede’ş-şer‘ sâbit olan [47a] fahrü’l-kuzât fazîletlü Edib Ahmed b. el-merhûm el-Hâc Mehmed Emin Efendi mahzarında bi’l-vekâle ikrâr-ı tâm ve takrîr-i kelâm edip akd-i âti’z-zikrin sudûruna değin müvekkilim İzzet Süleyman Efendi’nin silk-i mülkünde münselik olup mahmiye-i mezbûrede Karagümrük civârında Debbağzâde Hüseyin Ağa mahallesinde vâki‘ bir tarafdan ba‘zen Rukiye Hatun menzili ve ba‘zen Mustafa Çavuş tasarrufunda olan vakıf menzil ve ba‘zen Sarrâc Mustafa Çelebi menzili ve taraf-ı râbi‘i tarîk-i âm ile mahdûd hâriciyesinde iki bâb oda ve ahır ve dâhilîde fevkānî üç bâb oda ve bir köşk ve sofa ve dehliz ve tahtânî matbah ve havlu ve bir mikdâr bahçeyi müştemil bir bâb mülk menzilini bi-cümleti’t-tevâbi‘ ve’l-levâhık ve kâffetü’l-hukūk ve’l-merâfık tarafeynden îcâb ve kabûlü hâvî şurût-ı müfsideden ârî bey‘-ı bâtt-ı sahîh-i şer‘‘î ile müşârün-ileyh efendi hazretlerine iki bin guruşa bi’l-vekâle [bey‘ ve] temlîk ve teslîm eylediğimde onlar dahi ber-vech-i muharrer iştirâ ve temellük ve tesellüm ve kabz ve kabûl buyurduklarından sonra semen-i mezkûr iki bin guruşu tamamen bana def‘ u teslîm ben dahi bi’l-vekâle ahz u kabz edip bey‘-ı mezkûrun tağrîr ve gabnine müte‘allika âmme-i da‘vâdan müşârün-ileyh hazretlerinin zimmetlerini ibrâ ve ıskāt eyledim fîmâ-ba‘d menzil-i mahdûd-ı mezkûr cemî‘ müştemilâtla müvekkil-i müşârün-ileyh Mehmed Murad Efendi hazretlerinin mülk-i müşterâları ve hakk-ı sırfları olup müvekkilim mezbûr İzzet Süleyman Efendi’nin kat‘a alâka ve medhali kalmamışdır keyfe mâ yeşâ mutasarrıf olsunlar dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 10 min-Zilka‘de sene 1184. Şuhûdu’l-hâl: Şeyhü’l-kurrâ el-Hâc Ahmed Efendi, Muhzır Kethudâsı Mehmed Ağa b. Ahmed, Osman b. Halil, Osman b. Mustafa, Ali Çelebi b. Abdullah, İsmail b. Ali.