İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 172 Hüküm no: 133 Orijinal metin no: [47a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Safâyî Ahmed Efendi’nin Koğacı Dede mahallesindeki mülk menzilini satıp tasarrufunda olan vakıf yerlerin kullanım hakkını da devrettiği Husûs-ı âti’l-beyânın mahâllinde ketb ü tahrîri için bi’l-iltimâs kıbel-i şer‘-i enverden irsâl olunan başkâtibimiz Hâfız Mehmed Emin Efendi b. İsmail Efendi Dârü’l-hilâfeti’l-aliyye’de Aksaray kurbünde Koğacı Dede mahallesinde kâin zikri hâvî menzile varıp zeyl-i sahîfede mektûbü’l-esâmî Müslimîn huzûrlarında akd-i meclis-i şer‘-i kavîm eyledikde İstanbul’da Dikilitaş kurbünde Ali Paşa-i atîk mahallesi ahâlîsinden sâbıkā Manisa mütevellîsi olan fahrü’l-akrân Safâyî Ahmed Efendi b. Mustafa Efendi meclis-i ma‘kūd-ı mezkûrda hâlâ Devlet-i Aliyye-i ebediyyü’l-istimrârda rikâb-ı hümâyûn kāimmakāmı olan vezîr-i âlî-tebâr müşîr-i bülend-iktidârımız tekessür-i dîn ü devlet tekemmül-i nâmûs-ı düstûriyet devletlü semâhatlü izzetlü Mehmed Paşa -yesserallâhu mâ yeşâ- hazretlerinin necl-i necîl-i âlîşânları umdetü’l-müderrisîni’l-kirâm zübdetü’l-mehâdîmü’l-fihâm fazîletlü Yahya Molla Beyefendi hazretleri mahzarlarında Haremeyn-i Şerîfeyn Vakfı’nın bi’l-fi‘il mütevellîsi Süleyman Efendi tarafından vekîl-i şer‘îsi câbî-i vakf-ı merkūm es-Seyyid Mustafa Çelebi hazır olduğu hâlde ikrâr-ı tâm ve takrîr-i kelâm edip işbu derûnunda akd-i meclis olunan etrâf-ı erba‘ası Koğacı Dede Vakfı’ndan Hadîce Hatun tasarrufunda olan menzil ve merhûm el-Hâc Ebûbekir Paşa bostanı ve Fâtıma Hatun menzili ve Halil Ağa menzili ve tarîk-i âm ile mahdûd dâhiliyesinde ulyâda beş oda ve bir sofa ve dîvânhâne ve âbdesthâne ve kenîf ve vüstâda üç oda ve dehliz ve âbdesthâne ve kenîf ve süflâda bir kiler ve bir kârgir matbah ve matbah üzerinde hamam ve havlu iki bi’r-i mâ ve hâriciyesinde ulyâda beş oda ve bir sofa ve dîvânhâne ve âbdesthâne ve kenîf ve vüstâda iki oda ve bir kiler ve ahır ve bi’r-i mâ ve havluyu müştemil bir bâb menzilin ancak dâhiliye ta‘bîr olunur mahâllinden ve tarîk-i âm cânibinden tûlen ve arzen be-hesâb-ı terbî‘î doksan dört zirâ‘ binâyı ve binâsı arsası vakf-ı mezbûrdan ve mâ‘adâ bin dört yüz seksen beş zirâ‘ binâlı ve binâsız arsa dahi akd-i âti’z-zikrin sudûruna değin yedimde mülk ve hakkım olmağla ben menzil-i mahdûd-ı mezkûrun mülk olan mahâllini bi-cümleti’t-tevâbi‘ ve’l-levâhık ve kâffetü’l-hukūk ve’l-merâfık tarafeynden îcâb ve kabûlü hâvî şurût-ı müfside ve uhûd-ı mubtileden ârî bey‘-ı bâtt-ı sahîh-i şer‘î ile mûmâ-ileyh Yahya Molla Beyefendi hazretlerine beş bin guruşa bey‘ ve temlîk ve teslîm ve vakıf olan mahalli dahi bâ-ma‘rifet-i mütevellî yine mûmâ-ileyh hazretlerine iki bin beş yüz guruş bedel mukābelesinde ferâğ-ı mu‘teber-i kat‘î ile ferâğ ve tefvîz eylediğimde mûmâ-ileyh hazretleri dahi ber-vech-i meşrûh iştirâ ve temellük ve tesellüm ve kabz ve kabûl buyurduklarından sonra semen-i merkūm beş bin guruş ile bedel-i mezkûr iki bin beş yüz guruş ki cem‘an yedi bin beş yüz guruşu yedinden bi’t-tamam ve’l-kemâl ahz u kabz ve istifâ eyledim fîmâ-ba‘d menzil-i mahdûd-ı mezkûrun mülk olan mahâllini cemî‘ müştemilâtıyla mûmâ-ileyh Yahya Molla Beyefendi hazretlerinin mülk-i müşterâları ve vakıf olan ma‘lûmü’l-mikdâr mahalli dahi kezâlik hakk-ı müfevvezleri olup ol vechile benim mülk olan mahâllinde kat‘a alâkam vakıf olan mahâllinde dahi asla ve asla medhalim kalmamağla mebî‘-i mezkûrun tağrîr ve gabnine [47b] ve bi’l-cümle husûs-ı mezkûra müte‘allika âmme-i de‘âvî ve kâffe-i mutâlebâtdan herbirimiz âharın zimmetini ibrâ ve ıskāt ve herbirimiz âharın ibrâsını kabûl menzil-i mezkûr mûmâ-ileyh Yahya Molla Beyefendi hazretleri sa‘âdet [ü] ikbâlle tasarruf buyursunlar dedikde gıbbe’t-tasdîkı’ş-şer‘î vâki‘ hâli mevlânâ-yı merkūm mahâllinde ketb ü tahrîr ve ba‘dehû ma‘an ba‘s olunan Çukadâr Mustafa b. Mehmed ve Muhzır Hüseyin b. Abdullah ile meclis-i şer‘a gelip herbiri alâ vukū‘ihî inhâ ve takrîr etmeleriyle mâ-hüve’l-vâki‘ bi’l-ibtigā ketb ü imlâ olundu. Fî 17 min-Zilka‘de sene 1184. Şuhûdu’l-hâl: Mi‘mâr halîfelerinden Hasan Halîfe, Muhzır Hüseyin b. Abdullah, Çukadâr Mustafa b. Mehmed, Çukadâr Mehmed b. İbrahim, Çukadâr Mehmed b. Ali, Salih Beşe b. Mustafa, Fahrü’l-müderrisîni’l-kirâm Hocazâde Mehmed Vahid Efendi b. Ali, Hazîne Kâtibi Nazif Ali Efendi, Bostânî Ali Ağa b. Mehmed, Abdülbaki b. Mustafa, Yusuf b. Hüseyin.