İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 174 Hüküm no: 134 Orijinal metin no: [47b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul’daki ekmekçi tâifesinin sefere çıkacak ordu için kendilerinden istenen yükümlülükleri eksiksiz yerine getireceklerine dair taahhütte bulundukları Âsitâne-i aliyye’de ekmekçi tâifesinden olup cümle ittifâkıyla Ekmekçibaşı ta‘yîn olunan medîne-i Eyüb’de Çömlekçiler Fırını Ustası Ohan v. Mikayil ve şerîki Akindos v. Artin ve âhar şerîki hâric-i medîne-i Eyüb’de Topcular Fırını Ustası Sekyas v. Mikayil ile yine ekmekçi tâifesinden Galata Tekyesi kurbünde Uncu Avanis v. Sekyas ve şerîki Haçuk v. Kiregos ve yine Mirâhur Fırını Ustası Akindos v. Melkon ve şerîki Abraham v. Kalok ve yine Kocamustafapaşa Fırını Ustası Bedros v. Kirkor ve şerîki Artin v. Kirkor ve yine hâric-i Lanka Fırını Ustası Kazer v. Kirkor ve şerîki Yedikule Fırını Ustası Agop v. Minas ve yine Davudpaşa Fırını Ustası Aleksan v. Aram ve şerîki Bogos v. Bedros ve yine Kumkapı Nişâncısı Fırını Ustası Avanis v. Karabet ve şerîki Agop v. Artin ve yine Şişehâne Fırını Ustası Melkon v. Doğan ve şerîki Avanis v. Marat ve yine Balıkpazarı Fırını Ustası İspir v. Minas ve şerîki Toros v. Mesrop ve yine Rumeli Fırını Ustası Şerit v. Kirkor ve şerîki Kazer v. Şahin ve yine İncirköyü Fırını Ustası Agop v. Serkiz ve şerîki Abkar v. Ohan ve yine Galata’da Yeni Câmi‘ Fırını Ustası Yoseb v. Arakil ve şerîki Arakil v. Kazer ve yine Kanlıcak Fırını Ustası Altunoğlu Avanis ve şerîki oğlu Karabet nâm zimmîler meclis-i şer‘-i şerîf-i enverde Ekmekçiler Kethudâsı Ali Ağa b. Abdurrahman ve sâir bi’l-cümle nizâm ustaları hazır oldukları hâlde herbiri takrîr-i kelâm ve ta‘bîr ani’l-merâm edip işbu sene-i mübârekede ordu-yı hümâyûn-ı nusret-makrûnda mevcûd bulunan asâkir-i İslâmın bâ-fermân-ı âlî beher yevm ta‘yînatlarına verilecek tabhı lâzım gelen nân-ı azîz için yedimize verilen bir kıt‘a mümzâ ve mahtûm defter emr-i âlî mantûkunca hâlâ ordu-yı hümâyûnda mevcûd on aded hayme beher hayme derûnunda üçer fırın cem‘an otuz fırın için Âsitâne-i sa‘âdet’de tanzîmi lâzım olan beher fırın için dörder nefer işçi tedârük ve mühimmât ve âlât-bahâ olmak üzere ikişer yüz guruşdan cem‘an altı bin guruş ve ücret-i tabhıye olmak üzere yüzer guruşdan üç bin guruş cem‘an dokuz bin guruş hâlâ ordu-yı hümâyûnda mevcûd olan habbâzânın kefîllerine vermek üzere bizler bu tarafda cânib-i Hazîne-i âmire’den tamamen ahz u kabz edip ve ber-mûceb-i emr-i âlî Âsitâne’den matlûb ve tertîb olunan on beş aded hayme ve beher hayme derûnunda üçer fırın ve beher bir fırında dörder işçi olmak üzere cem‘an kırk beş fırın ber-minvâl-i muharrer âlât ve mühimmât ücret-i tabhıyeleri için ta‘yîn buyrulan on üç bin beş yüz guruş ki cem‘an yirmi iki bin beş yüz guruşu ber-vech-i muharrer Hazîne-i âmire’den bizlere bi’t-tamam ve’l-kemâl ahz u kabz ve tertîb olunan vech üzere asâkir-i İslâmın ta‘yînâtları için beher yevm kifâyet mikdârı ber-mu‘tâd-ı kadîm nân-ı azîz tabh edip kabza me’mûra teslîme ve vakt-i me’mûrda mahâllinde bulunmağa ve içimizden biri kable tamami’l-hidme fevt veyâhûd firâr veyâ a‘zâr ve sâir özür ile hizmetini terk ederse mezbûrun ber-vech-i muharrer kabz eylediği meblağ ile içimizden birimiz merkūmun yerine hizmeti edâya dahi herbirimiz ta‘ahhüd ve cümlemiz husûs-ı mezkûrda biribirimize kefîl ve makbûzumuza zâmin olduğumuzdan mâ‘adâ ber-vech-i muharrer ser-habbâzân ta‘yîn olunan merkūm Ohan dahi cümlemize ve makbûzumuza kefîl olup ordu-yı hümâyûnda hatab ve sâir muktezî olan nesne dahi mu‘tâd üzere bizlere verilip hilâf-ı mu‘âhede hareket etmemek üzere bi’l-ittifâk ahd [ü] mîsâk ve kavl [ü] ittifâk ve cümlemize dahi zeyl-i vesîkada muharrerü’l-esâmî ekmekçiler kethudâsı ve yiğitbaşı ve sâir nizâm ustaları ve iş erleri kefîl olmalarıyla işbu takrîr-i meşrûhumuz hüccet-i şer‘iye olunup kalemine kaydolunmak matlûbumuzdur dediklerinde mâ-vaka‘a bi’t-taleb ketb olundu. Fî 22 min-Zilka‘de sene 1184. Şuhûdu’l-hâl: Ekmekçiler Kethudâsı Ali Ağa b. Abdurrahman, Yiğitbaşı Osman b. Mehmed, Molla Ahmed b. Hüseyin, Salıcı Molla Osman b. Mustafa, es-Seyyid el-Hâc Ebûbekir b.el-Hâc Mehmed, Molla Mustafa b. el-Hâc Mehmed, Mehmed Ağa b. el-Hâc İsmail, Edirneli el-Hâc Ali b. el-Hâc Mehmed, es-Seyyid Yakub b. Mehmed, Molla Hasan b. ( ), Aram v. Gaspar, Mikayil v. İstefan, Agop v. Serkiz, Kazer v. Aram, Sahak v. Kirkor, Ferhal v. Kirkor.