İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 175 Hüküm no: 135 Orijinal metin no: [47b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Paşa’nın oğlu Yahya Molla Beyefendi’nin Sekbânbaşı Yakub Ağa mahallesindeki yarım menzil hissesini kardeşi Salih Bey’e sattığı Zikr-i âtî husûsun mahâllinde ketb ü tahrîri iltimâs olunmağın savb-ı şer‘-i enverden başkâtibimiz Hâfız Mehmed Emin Efendi irsâl olunup ol dahi Dârü’l-hilâfeti’l-aliyye’de Aksaray kurbünde Koğacı Dede mahallesinde kâin umdetü’l-müderrisîni’l-kirâm zübdetü’l-mehâdîmü’l-fihâm fazîletlü Yahya Molla Beyefendi neclü’l-vezîri’l-mükerrem devletlü inâyetlü atûfetlü Mehmed Paşa -yesserallâhu mâ yeşâ- hazretlerinin sa‘âdethânelerine varıp zeyl-i vesîkada mektûbü’l-esâmî Müslimîn huzûrlarında akd-i meclis-i şer‘-i kavîm eyledikde mûmâ-ileyh Yahya Molla Beyefendi hazretleri meclis-i ma‘kūd-ı mezkûrda birâder-i muhteremleri ve silâhşör-i hazret-i şehriyârî fahrü’l-emâcid ve’l-ekârim sa‘âdetlü Salih Bey hazretleri mahzarlarında ikrâr-ı tâm ve takrîr-i kelâm edip İstanbul’da Simkeşhâne ardında Sekbânbaşı Yakub Ağa mahallesinde vâki‘ iki tarafdan tarîk-i âm ve bir tarafdan ba‘zen tarîk-i hâs ve ba‘zen Tatlukuyu ve ba‘zen Abacı kızı menzili ve ba‘zen Kâtib Mehmed Efendi menzili ile mahdûd hâriciyesinde tabaka-i ulyâda dört oda ve bir hazîne odası [48a] ve dîvânhâne ve iki sofa ve kenîf ve tabaka-i vüstâda sofa ve kenîf ve kiler ve âbdesthâne ve süflâda iki köşk ve kârgir serdâb ve havuz ve selsebîl ve iki bi’r-i mâ ve ahır ve kömürlük ve mutarra‘ eşcâr-ı müsmire ve gayr-ı müsmireli bahçe ve havlu ve donanma köşkü ve dâhiliyesinde tabaka-i ulyâda dört oda ve bir sagīr hazîne odası ve iki sofa ve kenîf ve âbdesthâne ve tahte’s-semâ ve tabaka-i vüstâda beş oda ve bir kenîf ve bir âbdesthâne ve bir kiler odası ve bir taş oda ve ittisâlinde bir câmekânlı hamam ve bir âbdesthâne ve bir mâbeyn oda ve süflâda iki oda ve kenîf ve bir âbdesthâne ve demir sokak kapılı ve pencereli bir kâ[r]gîr matbah ve demir kapılı bir kâ[r]gîr kiler ve def‘a ahşâbdan bir kiler ve câmeşûyluk ve iki kârgir su hazînesi ve demir kapılı bir mahzen ve bahçe ve havlu ve hâricen ve dâhilen müştemilât-ı sâire-i ma‘lûmeyi hâvî kebîr menzilin nısf-ı şâyi‘i benim ve nısf-ı şâyi‘-i âharı dahi mûmâ-ileyh Salih Bey hazretlerinin akd-i âti’z-zikrin sudûruna değin tasarrufumuzda olmağla ben zikrolunan menzil-i mahdûd-ı mezkûrda olan nısf hisse-i şâyi‘amı cümle-i tevâbi‘ ve [levâhıkıyla] tarafeynden îcâb ve kabûlü hâvî şürût-ı müfside ve uhûd-ı mubtileden ârî bey‘-ı bâtt-ı sahîh-i şer‘î ile birâder-i muhteremim mûmâ-ileyh Salih Bey hazretlerine altı bin yedi yüz elli guruşa bey‘ ve temlîk ve teslîm mûmâ-ileyh hazretleri dahi ber-vech-i muharrer iştirâ ve temellük ve tesellüm ve kabûl buyurduklarından sonra semeni olan meblağ-ı mezbûr altı bin yedi yüz elli guruşu bi’t-tamam ve’l-kemâl yedinden ahz u kabz ve istifâ eyledim fîmâ-ba‘d menzil-i mahdûd-ı mezkûr mûmâ-ileyh Salih Bey hazretlerinin müstakillen mülkleri olup benim kat‘a alâka ve medhalim kalmayıp mebî‘-i mezkûrun tağrîr ve semenine ve bi’l-cümle husûs-ı mezkûra müte‘allika âmme-i de‘âvî ve kâffe-i mutâlebâtdan mûmâ-ileyh Salih Bey hazretlerinin zimmetlerini ibrâ-yı sahîh-i şer‘î ile ibrâ ve ıskāt eyledim dedikde gıbbe’t-tasdîkı’ş-şer‘î vâki‘ hâli mevlânâ-yı merkūm mahâllinde ketb ü tahrîr ba‘dehû ma‘an ba‘s olunan Çukadâr Abdülgani ve Muhzır Ali b. Mustafa ile meclis-i şer‘a gelip alâ-vukū‘ihî inhâ ve takrîr etmeleriyle mâ-vaka‘a bi’t-taleb ketb ü imlâ olundu. Fî 2 min-Zilhicceti’ş-şerîfe [sene 1184] Şuhûdu’l-hâl: Vâhib Halil Ağa b. Abdullah, Yedicanlı Ahmed b. el-Hâc İbrahim, Kaftanî el-Hâc Ali b. Hüseyin, Fahrü’l-müderrisîn-i kirâm fazîletlü Hocazâde Mehmed Hasib Efendi, Fahrü’l-eimme İsmail Efendi b. Salih, Fahrü’l-akrân Hazîne Kâtibi Nazif Ali Efendi, Mustafa b. Muhyî tâbi‘-i Hocazâde, Salih Ağa b. Mustafa, Süleyman Ağa b. Ahmed, Uzun Mustafa b. Salih, Çukadâr Abdülgani, Muhzır Ali b. Mustafa.