İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 177 Hüküm no: 136 Orijinal metin no: [48a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sancakdâr Zaviyesi zâviyedarlığına vekâleten Şeyh Mehmed’in tayin olunduğu Mahmiye-i İstanbul’da Samatya kurbünde Sancakdâr Hayreddin mahallesinde vâki‘ Sancakdâr Zâviyesi demekle ma‘rûf zâviyenin bâ-işâret-i aliyye zâviyedârı olan eş-Şeyh Mustafa diyâr-ı âhara gidip bir buçuk seneden beri terk ve zâviye-i mezkûr hâlî kalıp mahalle-i mezbûr ahâlîsi zâviye-i mezbûre tenhâ mahâlde olmağla bazı erâzil makūlesinin fitnelerinden emniyetimiz yokdur ihbâr ve bir vekîl nasb olunmasını [recâ] eylediklerinden yerine bir vekîl nasbı lâ-büd olmağla işbu bâ‘isü’l-vesîka eş-Şeyh Mehmed b. Mustafa her vechile vekâlete ehil olduğunu eş-Şeyh Süleyman Efendi b. Receb ve İsmail Ağa b. Sıdkı Abdullah ve Osman Çelebi b. Mehmed ve Mustafa Çelebi b. İbrahim nâm kimesneler haber vermeleriyle mezbûr eş-Şeyh Mehmed zâviye-i merkūmede vekâleten sâkin olmak üzere kendiye kıbel-i şer‘den izin verilmeğin mâ-vaka‘a bi’t-taleb ketb olundu. Fî 3 min-Zilhicceti’ş-şerîfe sene 1184. Şuhûdu’l-hâl: Muhzırân Kethudâsı Mehmed Ağa b. Ahmed, İsmail Çelebi b. Ali, Ali Çelebi b. Abdullah.