İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 177 Hüküm no: 137 Orijinal metin no: [48a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul’daki mumcu esnafının talebi üzerine yiğitbaşılığa Hüseyin Usta’nın tayin olunduğu Âsitâne-i aliyye ve tevâbi‘inde vâki‘ mumcu tâifesinin yiğitbaşıları olan Uzun Mehmed pîr ve alîl olup yiğitbaşılık umûrunu edâya kādir olmayıp aczi olduğundan mâ‘adâ mukaddemâ ta‘ahhüd eylediği vech üzere kasablardan alınan yağ husûsuna nizâm veremeyip hilâfı zâhir olduğunu esnâf-ı mezbûrenin kethudâları Derviş İbrahim b. Kasım ve şerîki Çelebi b. el-Hâc Mustafa ve sâir ustalarından Ebûbekir b. Ömer ve Molla Hasan b. Ahmed ve Davud Beşe b. Salih ve Nuh Beşe b. Ebûbekir ve sâirleri ihbâr ve mezbûr Uzun Mehmed’in azlini iltimâs etmeleriyle yerine işbu râfi‘u’l-kitâb Hüseyin Usta b. Mehmed her vechile yiğitbaşılık umûrunu idâreye kādir olduğunu yine esnâf-ı mezkûr ihbâr ve iltimâslarıyla mezbûr Hüseyin Usta’yı esnâf-ı mezkûreye kıbel-i şer‘den yiğitbaşı nasb ü ta‘yîn olundukda ol dahi kabûl ve hizmet-i lâzımesini olageldiği vech üzere istikāmetde edâya ta‘ahhüd ve iltizâm etmeğin mâ-vaka‘a bi’t-taleb ketb olundu. Fî-gurret-i Zilhicce sene 1184. Şuhûdu’l-hâl: Muhzırân Kethudâsı Mehmed Ağa b. Ahmed, İsmail Çelebi b. Ali, Ali Çelebi b. Abdullah.