İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 178 Hüküm no: 138 Orijinal metin no: [48b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Hatun’un bir miktar eşyasını Enderûn Kütüphanesi Vakfı Mütevellisi Memiş Efendi’ye sattığı Husûs-ı âti’l-beyânın mahâllinde ketb ü tahrîri için taraf-ı şer‘den irsâl olunan Merhabazâde Mahmud Efendi ve Haremeyn-i Şerîfeyn Müfettişi fazîletlü Ahmed Necib Efendi tarafından mürsel Alizâde Mehmed Sâmih Efendi ile mahmiye-i İstanbul[‘da] Sultânahmed kurbünde vâki‘ Fazlı Paşa Sarayı’nda vâki‘ basmacılara mahsûs olan odaya varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i şerîf eylediklerinde mahmiye-i mezbûrede Kaliçeciler Köşkü nâm mahâlde Öksüzce mahallesinde sâkine ve zâtı zeyl-i vesîkada mektûbü’l-esâmî Müslimîn ta‘rîfleriyle mu‘arrefe olan Âişe bt. Mustafa nâm hatun meclis-i ma‘kūd-ı mezkûrda işbu bâ‘isü’l-kitâb Enderûn-ı Hümâyûn’da vâki‘ kütübhâne-i latîfenin mütevellîsi Memiş Efendi tarafından vekîl-i şer‘îsi câbî-i vakf İspir Ağa b. Abdullah mahzarında mârrü’z-zikr Öksüzce mahallesi imâmı es-Seyyid Mustafa Efendi ve Alemdâr es-Seyyid Osman hazır oldukları hâlde takrîr-i kelâm edip bundan akdem mezbûrân İmâm Mustafa Efendi ve Alemdâr es-Seyyid Osman mâlımdan bi-gayr-ı hakkın ahz ve basmacı tâifesine teslîm eyledikleri işbu meclis-i ma‘kūdda mu‘âyene olunan nâ-tamam yüz kırk sekiz top ve elvan boyalı beş top ve on altı parça destmâl ve sofra ve yorgan yüzü ve kırk beş top beyaz dülbendleri zeyl-i vesîkada muharrerü’l-esâmî Müslimîne irâet olundukda nâ-tamam ola[n] dülbendlerin beheri ikişer yüz akçe ve elvan boyalı dülbend üçer yüz altmışar akçe ve beyâz dülbenlerin ikişer yüz yetmişer akçe ve parça dülbendlerin altı yüz akçe ki cem‘an kırk dört bin yüz elli akçe kıymetleri olduğu ba‘de’l-ihbâr zikrolunan dülbendleri tarafeynden îcâb ve kabûlü hâvî bey‘-ı bâtt-ı sahîh-i şer‘î ve safka-i vâhide ile müvekkil mütevellî-i mûmâ-ileyhe meblağ-ı merkūm kırk dört bin yüz elli akçeye bey‘ ve teslîm eylediğinde ol dahi ber-vech-i muharrer iştirâ ve tesellüm eyledikden sonra semeni olan meblağ-ı mezbûru bi’t-tamam ahz u kabz eyledim fîmâ-ba‘d eşyâ-i muharrere-i mezkûrede benim kat‘a alâka ve medhalim kalmayıp meblağ-ı mezkûrun tağrîr ve gabnine ve iddia eylediğim ma‘lûmü’l-mikdâr basmacı kalıblarına ve işbu hazır bi’l-meclis basmacı ustaların ve hâzırân-ı mezbûrân İmâm es-Seyyid Mustafa Efendi ile Alemdâr es-Seyyid Osman’dan herbirinin zimmetlerini ibrâ ve ıskāt eyledim dedikde merkūmûn herbiri mukırr-ı mezbûru tasdîk ve ibrâsını kabûl eylediklerini mevlânâ-yı mezbûrân mahâllinde ba‘de’t-tahrîr meclis-i şer‘a gelip alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fî-selh-i Zilka‘de sene 1184. Şuhûdu’l-hâl: Mustafa Ağa b. Ahmed, el-Hâc Mehmed b. el-Hâc Hasan, Hacı Abdurrahman b. Salih, Dülbendciler Kethudâsı el-Hâc İbrahim Ağa b. el-Hâc Abdullah, Basmacılar Kethudâsı Mahmud Ağa, Yiğitbaşı es-Seyyid Mustafa, es-Seyyid Abdürrezzak ve Seyyid Yusuf.