İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 179 Hüküm no: 139 Orijinal metin no: [48b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Edirne kürkçü esnafı kethudâsı Gaspar’ın İstanbul’daki yaycı ve okçu esnafı kethudâsı Abdullah’a sefere çıkan ordu için tertip olunan imdadiyeyi teslim ettiği Mahrûse-i Edirne’de olan kürkçü esnâfının kethudâları olup zikri âtî husûsun nizâmı için mahrûse-i mezbûrede Âsitâne-i aliyye’ye gelip hâlâ Âsitâne-i aliyye’de mevcûd olan Gaspar v. Marat nâm zimmî meclis-i şer‘-i şerîf-i enverde Âsitâne-i aliyye’de yaycı ve okçu esnâfının kethudâları el-Hâc Abdullah Çelebi b. Ahmed mahzarında bi’l-vekâle takrîr-i kelâm ve ta‘bîr ani’l-merâm edip Edirne’de İslambol misillü cemî‘ esnaf mevcûd olduğuna binâen sefer-i hümâyûn vukū‘unda mahrûse-i Edirne esnâfı dahi müstakillen İslambol ordusu gibi mükemmel ordu ihrâc etmeleri mu‘tâd olup lâkin mahrûse-i mezkûrede yaycı ve okçu esnâfından yamak olmağla binâenaleyh ben dahi İslambol’da sâkin olan yaycı ve okçu esnâfından bir kimesneyi kethudâ-yı merkūm Edirne ordusunda iki hayme ihrâc edip Edirne esnâfıyla mevcûd olmak için ber-mu‘tâd-ı kadîm âdem ta‘yîn etmek üzere müte‘ahhid ve mütekeffil olmağa Edirne’de olan kürkçü esnâfının yamaklıkları olmak üzere kethudâ-yı merkūma ber-mûceb-i teşrîfât imdâdiyelerini def‘ u teslîm eyledim dedikde kethudâ-yı merkūm dahi mesfûr Gaspar zimmî yedinden imdâdiye-i mezkûreyi tamamen ve kâmilen ahz u kabz eyledim deyip ve mu‘tâd-ı kadîm üzere Edirne ordusuyla ma‘an iki aded hayme ihrâci’çün bâ-hüccet esnâf-ı mezbûre ma‘rifetleriyle ta‘yîn eylediği kimesneye ta‘ahhüd ve tekeffül etmeğin mâ-vaka‘a bi’t-taleb ketb olundu. Fî 14 min-Zilhicceti’ş-şerîfe sene 1184. Şuhûdu’l-hâl: Kemahlı İbrahim b. ( ) el-muhzır, Baltacı el-Hâc Mustafa el-muhzır, Ali Çelebi b. Abdullah, Eyyûbî Ali Ağa b. Hasan, Bakkāl Pazarbaşısı Ömer Ağa b. el-Hâc Ahmed.