İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 181 Hüküm no: 141 Orijinal metin no: [49a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul’daki arabacılar esnafının sefere çıkan ordu için kırk adet sirem arabasını tedârik ederek arabacıbaşı tayin olunan Küçük Ali Usta vâsıtasıyla teslimini taahhüt ettikleri Âsitâne-i aliyye’de vâki‘ koçu ve sirem arabacıları esnâfının kethudâları Musa Ağa b. Mehmed ve yiğitbaşıları İsmail b. Mehmed ve el-Hâc Mehmed b. Abdullah ve Ahmed b. Hüseyin ve el-Hâc Ahmed b. Mehmed ve Süleyman b. Veliyüddin ve Salih b. Mustafa ve İsmail b. el-Hâc Nebih ve Süleyman b. Mehmed ve Osman b. Ahmed ve es-Seyyid Osman b. İbrahim ve Osman b. Abdullah ve Süleyman b. Abdullah ve sâir mazbûtü’l-esâmî arabacı ustaları meclis-i şer‘-i hatîr-i lâzımü’t-tevkīrde izzetlü sekbânbaşı ağa kulları tarafından Yazıcı Mustafa ve zikri âtî husûs için ordu-yı hümâyûn cânibinden bâ-emr-i âlî mübâşir ta‘yîn buyrulan Dergâh-ı âlî gediklilerinden Zâim Nazif [b.] Mustafa Ağa kulları hazır oldukları hâlde umûr-ı seferiyede istihdâm olunmak için ber-mûceb-i emr-i âlîşân esnâf-ı mezkûreden matlûb olan kırk aded sirem arabalarını cem‘ ve tedârük ve esnâf-ı mezkûrenin ta‘ahhüd ve birbirlerine kefâletlerini müş‘ir bundan akdem dergâh-ı bülend-eyvâna i‘lâm olunmuşidi el-hâletü hâzihî esnâf-ı mezkûre ta‘ahhüdleri üzere ber-minvâl-i muharrer matlûb olan ol mikdâr sirem arabasının yirmi adedini tüvânâ bargir ile Âsitâne-i aliyye’den cem‘ ve tedârüklerini ba‘de’l-ihbâr içlerinden mu‘temed ve muhtârları olan işbu hazır bi’l-meclis Küçük Ali Usta b. İbrahim’i cümle ittifâkıyla arabacıbaşı ta‘yîn ve zikrolunan yirmi aded sirem arabalarını tekmîl kendiye teslîm ol dahi kabzını ikrâr ve mâ‘adâ [49b] on yedi adedi Edirne’de ve üç adedi ordu-yı hümâyûnda mevcûd olup ber-mûceb-i emr-i âlîşân matlûb olduğu vech üzere cem‘an kırk aded sirem arabaları tekmîlen taraf-ı Devlet-i Aliyye’den ta‘yîn buyrulan arabacıbaşı ağaya mübâşir-i mûmâ-ileyh ma‘rifetiyle ordu-yı hümâyûn-ı nusret-makrûnda mevcûd bulunmak üzere serî‘an ve âcilen teslîme hâzır-ı merkūm Küçük Ali Usta ta‘ahhüd ve tekeffül ve mezbûra dahi bi’l-cümle altmış dokuz nefer esnâfı tekeffül ve cümlesine kethudâları kefîl olmağla ber-minvâl-i [muharrer] kefâletleri tescîl olunup ol vechile mübâşir-i mûmâ-ileyh kulları itmâm-ı hizmet-i me’mûresiyle ircâ‘ ve serî‘an irsâl olunmağın mâ-vaka‘a bi’t-taleb ketb olundu. Fî 11 min-Zilhicce sene 1184. Şuhûdu’l-hâl: Kethudâ-yı Muhzırân Mehmed Ağa b. Ahmed, Muhzır Molla İsmail b. Ali, Süleyman b. Abdullah.