İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 182 Hüküm no: 142 Orijinal metin no: [49b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Habbâz Molla Ahmed’in fırın gediğinin yarım hissesini sattığı Habbâz tâifesinden Molla Ahmed b. el-Hâc Mehmed nâm kimesne meclis-i şer‘-i şerîf-i enverde yine tâife-i mezbûreden işbu râfi‘u’l-kitâb Molla Hasan b. Hasan nâm kimesne mahzarında ikrâr ve takrîr-i kelâm edip akd-i âti’z-zikrin sudûruna değin yedimde mülk ve hakkım olup mahmiye-i İslambol’da Haydarpaşa mahallesinde vâki‘ bir bâb habbâz fırının gedik ta‘bîr olunur bir kebîr kazgan ve beş kürek ve otuz panakot ve iki terâzi ve sâir âlât-ı lâzımenin nısf-ı şâyi‘lerini tarafeynden îcâb ve kabûlü hâvî şurût-ı müfsideden ârî bey‘-ı bâtt-ı sahîh-i şer‘î ve safka-i vâhide ile beş yüz seksen guruşa mezbûr Molla Hasan’a bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz ve kabûl eylediğinden sonra semeni olan meblağ-ı mezkûr beş yüz seksen guruşu mezbûr Molla Hasan yedinden tamamen ahz u kabz eyleyip semenine ve bey‘-ı mezkûrun tağrîr ve gabnine müte‘allika âmme-i da‘vâdan herbirimiz âharın zimmetini ibrâ ve ıskāt ve herbirimiz ber-vech-i muharrer âharın ibrâsını kabûl eyledik fîmâ-ba‘d fırın-ı mezkûrda gedik ta‘bîr olunur âlât-ı lâzıme-i mezkûrenin nısf-ı şâyi‘leri mezbûr Molla Hasan’ın mülk-i müşterâsı ve hakk-ı sırfı nısf gediğinde ve âlât-ı lâzıme-i mezkûrenin nısfında benim alâkam kalmamışdır dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’l-hâdî aşer min-Zilhicceti’ş-şerîfe sene 1184. Şuhûdu’l-hâl: Ahmed Beşe b. Mehmed, Molla Mustafa b. el-Hâc Mehmed, Ekmekçiler Kethudâsı Ali Ağa b. Abdullah, Salıcı Molla Osman b. Mustafa, es-Seyyid el-Hâc Ebûbekir Ağa b. el-Hâc Mehmed, Molla Ahmed b.Hüseyin, Molla Hasan b. Abdullah.