İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 183 Hüküm no: 143 Orijinal metin no: [49b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Habbâz Eyüb’ün bir fırın ile değirmendeki sekiz sehim gedik hissesini sattığı Habbâz tâifesinden es-Seyyid el-Hâc Eyüb b. el-Hâc Ebûbekir nâm kimesne meclis-i şer‘-i şerîf-i enverde yine tâife-i mezbûreden işbu hâmilü’r-rakīm Mardiros v. Panos nâm zimmî muvâcehesinde ikrâr ve takrîr-i kelâm edip mahrûse-i Galata’da Sultân Bâyezid mahallesinde vâki‘ bir bâb çifte fırın ve ittisâlinde altı horos değirmende gedik ta‘bîr olunur yirmi dört re’s bargir ve sâir âlât-ı lâzıme-i ma‘lûme yirmi dört sehim i‘tibârıyla on altı sehmi mersûm Mardiros’un ve sekiz sehmi akd-i âti’z-zikrin sudûruna değin yedimizde şâyi‘an mülkümüz olmağla hâlâ ben zikrolunan bargir ve sâir âlât-ı lâzıme-i ma‘lûmede olan sekiz sehim hisse-i şâyi‘amı tarafeynden îcâb ve kabûlü hâvî şurût-ı müfsideden ârî bey‘-ı bâtt-ı sahîh-i şer‘î ve safka-i vâhide ile merkūm Mardiros’a iki bin yedi yüz elli guruşa bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz ve kabûl eylediğinden sonra semeni olan meblağ-ı mezkûr iki bin yedi yüz elli guruşu merkūm Mardiros yedinden tamamen ahz u kabz eyleyip semenine ve bey‘-ı mezkûrun tağrîr ve gabnine ve gedik husûsuna ve mukaddemâ merkūm Mardiros ile fırın ve değirmende yirmi beş seneden beri şirket üzere habbâzlık edip fesh-i akd-i şirket birle hesâbımızı rü’yet ve herbirimizin âhar zimmetinde kat‘a hakkı zuhûr etmemekle târih-i kitâba gelince beynimizde cereyân eden ahz u i‘tâ ve mu‘âmelât-ı şettâ ve husûs-ı şirkete ve sâire müte‘allika âmme-i de‘âvî ve mutâlebât ve kâffe-i eymân ve muhâsamâtdan herbirimiz âharın zimmetini ibrâ ve ıskāt ve herbirimiz ber-vech-i muharrer âharın ibrâsını kabûl eyledik fîmâ-ba‘d fırın ve değirmende gedik ta‘bîr olunur sekiz re’s bargir ve sâir âlât-ı lâzıme-i ma‘lûme dahi merkūm Mardiros’un mülk-i müşterâsı ve hakk-ı sırfı olup gediğinde ve eşyâ-i mezkûrede [50a] kat‘a alâka ve medhalim kalmamışdır dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’t-tâsi‘ aşer min-Zilhicceti’ş-şerîfe li-sene erba‘a ve semânîn ve mie ve elf. Şuhûdu’l-hâl: Molla Mustafa b. el-Hâc Mehmed, Molla Ahmed b. Mustafa, es-Seyyid el-Hâc Ebûbekir b. el-Hâc Mehmed, Salıcı Molla Osman b. Mustafa, Ekmekçiler Kethudâsı Ali b. Abdurrahman, Molla Hasan b. Abdullah, Ahmed Beşe b. Mehmed, Molla Ahmed b. Şahin.