İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 188 Hüküm no: 149 Orijinal metin no: [51a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zeliha Hatun’un yanmış mülk menzil ve arsasının vârisleri tarafından satıldığı Husûs-ı âti’l-beyânın mahâllinde ketb ü tahrîri için savb-ı şer‘-i enverden vekāyi‘ kâtibi Mevlânâ Mehmed Necib Efendi irsâl olunup ol dahi mahmiye-i İslambol’da Sultân Selim Câmi‘i kurbünde Debbağyunus mahallesinde vâki‘ sâbıkā Reis-i Etibbâ-i Sultânî merhûm Mehmed Refî Efendi’nin hânesine varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i nebevî eyledikde mahmiye-i mezbûrede Kızlar Ağası mahallesinde sâkine iken bundan akdem intikāl-i dâr-ı bekā eden merhûme Hâcce Zeliha Hatun bt. Abdullah’ın verâseti sadriye kebîre kızı el-Hâce Hibetullah Hanım ve Âkıle Hanım ibnetey el-merhûmü’l-mebrûr Reis-i Etibbâ-i Sultânî Mehmed Said Efendi ile li-ebeveyn kız karındaşları Nefîse Hanım ve diğer Zeliha Hatun ibnetey Abdullah’a münhasıra ba‘dehâ mezbûre Zeliha Hatun dahi vefât edip verâseti zevce-i metrûkü el-Hâc Mehmed Ağa b. Ali ile sadriye kebîre kızı Afife Hatun’a ve li-ebeveyn kız karındaşı mezbûre Nefîse Hatun’a münhasıra ba‘dehû mezbûr el-Hâc Mehmed Ağa dahi vefât edip verâseti ancak kızı Afife’ye münhasıra ve tashîh-i mes’ele bi-hükmi’l-münâsahati’ş-şer‘iye yirmi dört sehimden olup sihâm-ı mezbûreden sekiz sehmi mezbûretân el-Hâcce Hibetullah ve Âkıle Hanım’dan herbirine ve beş sehmi mezbûre Nefîse Hatun’a ve üç sehmi mezbûre Afife Hatun’a isâbeti tahakkukundan sonra mezbûre el-Hâcce Hibetullah Hanım bt. el-merhûm Mehmed Said Efendi’nin zevci ve tarafından husûs-ı âti’z-zikrde vekîl olduğu zât-ı mezbûreyi ârifân [51b] kuzât-ı kirâmdan es-Seyyid İbrahim Efendi b. İsmail ve Mustafa Efendi b. Hüseyin şehâdetleriyle ber-nehc-i şer‘î sâbit olan umdetü’l-mevâli’l-izâm sa‘âdetlü Mehmed Emin Efendi neclü’l-merhûm Kādıasker-i esbak Abdurrahim Efendi ve mezbûre Âkıle Hanım bt. el-merhûm Mehmed Said Efendi’nin üvey oğlu ve tarafından kezâlik husûs-ı âti’z-zikrde vekîl olduğu zât-ı mezbûreyi ârifân Mustafa Efendi b. Hüseyin Efendi ve el-Hâc Mehmed b. Hasan şehâdetleriyle ber-nehc-i şer‘î sâbit olan fahrü’l-müderrisîni’l-kirâm Mehmed Ataullah Efendi b. Mollacıkzâde fazîletlü İshak Efendi ve mezbûre Nefîse Hatun bt. Abdullah tarafından husûs-ı âti’z-zikrde vekîl olduğu zât-ı mezbûreyi ârifân Mustafa b. Abdurrahman ve es-Seyyid Hamza Çelebi b. es-Seyyid Süleyman şehâdetleriyle ber-nehc-i şer‘î sâbit olan Hasan Ağa b. Musa ve mezbûre Afife Hatun bt. el-Hâc Mehmed tarafından kezâlik husûs-ı âti’z-zikrde vekîl olduğu Süleyman Efendi b. Eyüb ve Ali Çelebi b. Ömer şehâdetleriyle sâbit olan es-Seyyid el-Hâc Hüseyin b. es-Seyyid Mehmed meclis-i ma‘kūd-ı mezkûrda fahrü’l-muhadderât bâ‘isetü hâze’l-kitâbi’l-müstetâb Ümmügülsüm Hatun bt. Cafer b. Abdurrahman tarafından ikrâr-ı câ’i’z-zikri tasdîka vekîl-i sâbitü’l-vekâlesi olan eşrâf-ı kuzât-ı kirâmdan fazîletlü es-Seyyid Mehmed Mazhar Efendi b. el-merhûm es-Seyyid Ziya Ahmed Efendi hazretleri mahzarında her biri bi’l-vekâle ikrâr ve takrîr-i kelâm edip mahmiye-i mezbûrede Kadıçeşmesi kurbünde Yarhisar mahallesinde vâki‘ arsası Debbağzâde merhûm Yahya Efendi Vakfı’na senede beş yüz altmış akçe mukāta‘alı olup iki tarafdan sâbıkā Şeyhülislâm devletlü sa‘âdetlü inâyetle Dürrîzâde Mustafa Efendi hazretlerinin sa‘âdethâneleri ve bir tarafdan zîver-efzâ-yı sadr-ı fetvâ olan Şeyh-i meşâyihi’l-İslâm devletlü sa‘âdetlü inâyetle Mirzazâde es-Seyyid Mehmed Said Efendi hazretlerinin sa‘âdethâneleri ve ba‘zen merhûm Abbas Efendi veresesi menzilleri ve taraf-ı râbi‘i tarîk-i âm ile mahdûd tûlen ve arzen be-hesâb-ı terbî‘î iki bin üç yüz kırk yedi zirâ‘ arsa üzerinde mebnî bir harâb mahzen ve bir harâb matbah ocağı ve üç bi’r-i mâ ve bir harâb bağçevân odası ve müşârün-ileyh Mirzazâde es-Seyyid Mehmed Said Efendi hazretleri ile müşterek taş duvar ve eşcâr-ı müsmire ve gayr-ı müsmireyi ve sokak kapısını müştemil muhterik mülk menzil ve arsası müteveffât-ı mezbûre el-Hâcce Zeliha’nın ile’l-vefât yedinde olup ba‘de vefâtihâ mârrü’z-zikr ebniye ve eşcâr ve müştemilât-ı sâire-i memlûkesi tashîh-i mezkûr üzere hasren müvekkilât-ı mezbûrâta mevrûs olmağla hâlâ mûmâ-ileyh Mehmed Emin Efendi arsa-i mahdûd-ı mezkûrede ve müştemilât-ı sâire-i mezkûrede olan sekiz sehim hisse-i şâyi‘asını yedi yüz seksen iki guruş kırk akçeye vekîl-i mûmâ-ileyh Mehmed Ataullah Efendi kezâlik sekiz sehim hisse-i şâyi‘asını yedi yüz seksen iki guruş kırk akçeye ve vekîl-i mezbûr Hasan Ağa beş sehim hisse-i şâyi‘asını dört yüz seksen guruş yüz akçeye ve vekîl-i mezbûr es-Seyyid el-Hâc Hüseyin üç sehim hisse-i şâyi‘asını iki yüz doksan üç guruş kırk beş akçeye ki cem‘an iki bin üç yüz kırk yedi guruşa bi-cümleti’t-tevâbi‘ ve’l-levâhık tarafeynden îcâb ve kabûlü hâvî şurût-ı müfsideden ârî bey‘-ı bâtt-ı sahîh-i şer‘î ile müvekkile-i mûmâ-ileyhâ Ümmügülsüm Hatun için vekîl-i mûmâ-ileyh es-Seyyid Mazhar Efendi’ye bi’l-vekâle bey‘ ve temlîk ve teslîm ve arsa-i mezkûreyi dahi bâ-re’y-i mütevellî meccânen ferâğ ve tefvîz eylediğimizde onlar dahi ber-vech-i muharrer bi’l-vekâle iştirâ ve temellük ve tesellüm ve tefevvüz ve kabz ve kabûl eylediklerinden sonra vekîl-i mûmâ-ileyh Mehmed Emin Efendi semen-i mezkûr yedi yüz seksen iki guruş kırk akçeyi ve vekîl-i mûmâ-ileyh es-Seyyid Mehmed Ataullah Efendi kezâlik semen-i mezkûr yedi yüz seksen iki guruş kırk akçeyi ve vekîl-i mezbûr Hasan Ağa semen-i mezkûr dört yüz seksen sekiz guruş yüz beş akçeyi ve vekîl-i mezbûr es-Seyyid el-Hâc Hüseyin semen-i mezkûr iki yüz doksan üç guruş kırk beş akçe ki cem‘an iki bin üç yüz kırk yedi guruşu vekîl-i mûmâ-ileyh es-Seyyid Mehmed Mazhar Efendi bize tamamen def‘ ve teslîm biz dahi yedinden bi’t-tamam ve’l-kemâl ahz u kabz eyleyip bey‘-ı mezkûrun tağrîr ve gabnine müte‘allika âmme-i da‘vâdan müvekkil-i mûmâ-ileyhâ ile vekîl-i mûmâ-ileyhin zimmetlerini ibrâ ve ıskāt edip onlar dahi bi’l-vekâle ibrâ-yı mezkûru kabûl eyledi fîmâ-ba‘d zikrolunan ebniye ve eşcâr ve müştemilât-ı sâire-i memlûke müvekkile-i mûmâ-ileyhânın mülk-i müşterâsı ve hakk-ı sırfı ve arsası dahi dâhil-i havza-i tasarruf olup müvekkilelerimizin kat‘a alâka ve medhalimiz kalmamışdır keyfe mâ yeşâ ve yahtâr mutasarrıfe olsun [52a] dediklerinde gıbbe’t-tasdîkı’ş-şer‘î vâki‘ hâli mevlânâ-yı mezbûr mahâllinde ketb ü tahrîr ve ma‘an meb‘ûs ümenâ-i şer‘le meclis-i şer‘a gelip alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fî 18 min-Muharremi’l-harâm sene 1185. Şuhûdu’l-hâl: Hoca Hüseyin Efendi b. Mustafa, Eşrâf-ı kuzâtdan İbrahim Efendi b. Abdullah, Fahrü’l-müderrisîni’l-kirâm Mande[l]yatlı Hoca Mehmed Efendi b. İbahim, Fahrü’l-müderrisîni’l-kirâm es-Seyyid Mustafa b. es-Seyyid Mehmed Efendi, Hoca Mehmed Efendi b. Mustafa, Salih Efendi b. Mustafa.