İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 190 Hüküm no: 150 Orijinal metin no: [52a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Koz v. Arakil’in fırın ve değirmendeki gedik hissesini ortaklarına sattığı Mahmiye-i İstanbul’da Karaman-i kebîr’de vâki‘ bir bâb habbâz fırını ve ona merbût mahmiye-i mezbûrede Yeni Değirmen demekle ma‘rûf beş horos değirmen derûnunda mevcûd gedik ta‘bîr olunur yirmi re’s bargir ve sâir âlât-ı lâzıme-i ma‘lûme yirmi sehim i‘tibârıyla yedi sehmi Nörsiz v. Payik nâm zimmînin ve beş sehmi Sahak v. Gaspar nâm zimmînin ve beş sehmi Koz v. Arakil nâm zimmînin ve üç sehmi Mikayil v. Kazer nâm zimmînin yedlerinde şâyi‘an mülkleri olduğu lede’ş-şer‘i’l-enver zâhir oldukdan sonra merkūm Koz v. Arakil meclis-i şer‘-i şerîf-i enverde müşterikleri işbu hâmilü’r-rakīm mersûmân Nörsiz ve Sahak nâm zimmîler ile merkūm Mikayil ikrâr-ı câ’i’z-zikri tasdîka tarafından vekîl-i sâbitü’l-vekâlesi olan Ekmekçiler Kethudâsı Ali Ağa b. Abdurrahman nâm kimesne muvâcehelerinde ikrâr ve takrîr-i kelâm edip mârrü’z-zikr fırın ve değirmen derûnunda mevcûd gedik ta‘bîr olunur bargir ve sâir âlât-ı lâzıme-i ma‘lûme ber-vech-i muharrer beş sehim hisse-i şâyi‘ası akd-i âti’z-zikr sudûruna değin mülk ve hakkım olmağla hâlâ ben tarafeynden îcâb ve kabûlü hâvî şurût-ı müfsideden ârî bey‘-ı bâtt-ı sahîh-i şer‘î ve safka-i vâhide ile beher re’s bargir yüz yirmişer guruşa olmak üzere beş sehim hisseden iki sehim hissemi iki yüz kırk guruşa merkūm Nörsiz’e ve iki sehim hissemi kezâlik iki yüz kırk guruşa merkūm Sahak’a ve bir sehim hissemi yüz yirmi guruşa müvekkil-i merkūm Mikayil’e bey‘ ve temlîk ve teslîm eylediğimde onlar daha ber-vech-i muharrer iştirâ ve temellük ve tesellüm ve kabz ve kabûl eylediklerinden sonra semeni olan cem‘an altı yüz guruşu merkūmûn Nörsiz ve Sahak ve Mikayil yedlerinden tamamen ahz u kabz eyleyip bey‘-ı mezkûrun tağrîr ve gabnine ve gedik husûsuna müte‘allika âmme-i da‘vâdan mesfûrûnun zimmetlerini ibrâ ve ıskāt eyledim fîmâ-ba‘d mârrü’z-zikr fırın ve değirmende mevcûd bargir ve sâir âlât-ı lâzıme-i ma‘lûmede olan beş sehim hisseden ber-vech-i muharrer iki sehmi merkūm Nörsiz ve iki sehmi mersûm Sahak ve bir sehmi merkūm Mikayil’in mülk-i müşterâları ve hakk-ı sırfları olup benim kat‘a alâka ve medhalim kalmamışdır dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’l-işrîn min-Muharremi’l-harâm li-sene hamse ve semânîn ve mie ve elf. Şuhûdu’l-hâl: es-Seyyid el-Hâc Ebûbekir Ağa b. el-Hâc Mehmed, Salıcı Osman b. Mustafa, Molla Mustafa b. el-Hâc Mecid, Ahmed Ağa b. Hüseyin, Molla Hüseyin b. Abdullah, Ahmed Beşe b. Mehmed.