İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 191 Hüküm no: 151 Orijinal metin no: [52a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kasap Dedo’nun aralarındaki alacak verecek hususunda Kasapbaşı İstefan ile sulh olup birbirlerinin zimmetlerini ibra ettikleri Kasab tâifesinden Dedo v. Hristo nâm zimmî meclis-i şer‘-i şerîf-i enverde hadâyik-i hâssada vâki‘ bostânîyân ocağı kasabbaşısı olan işbu hâmilü’r-rakīm İstefan v. Mişo nâm zimmî muvâcehesinde ser-bostânîyân ağa tarafından el-Hâc Ahmed Haseki hazır olduğu hâlde ikrâr ve takrîr-i kelâm edip mahmiye-i İstanbul’da Tahtakale sûkunda vâki‘ kasab dükkânında ben mesfûr İstefan’ın kanâdârı olmamla bi-şarti’r-rücû‘ emriyle bin yüz yetmiş dokuz senesi Cumâdelâhiresi gurresinden seksen dört senesi Zilka‘desi’nin on dördüncü gününe gelinceye değin ocağ-ı mezkûr ta‘yînâti’çün beher yevm âmâde ve müheyyâ edip tevzî‘ ve taksîm eylediğim lahm-ı ganem semeninden ve Ramazan-ı şerîf mu‘tâdesinden ve ecr-i misl ve ücret-i dükkân ve mesârif-i sâireden müctemi‘ mesfûr İstefan zimmetinde kırk dört bin beş yüz elli yedi buçuk guruş hakkım olup ceste ceste bana meblağ-ı mezkûrdan otuz dört bin guruş edâ ve teslîm edip zimmetinde on bin beş yüz elli yedi buçuk guruş hakkım bâkī kalmağla hâlâ taleb ederim deyü da‘vâ mesfûr İstefan cevâbında mârrü’z-zikr Zilka‘de gurresinde muhâsebemiz rü’yet ve ber-vech-i muharrer ta‘yînât için verdiği lahm-ı ganem semeni ve Ramazan-ı şerîf mesârif-i mu‘tâdesi ve ecr-i misl ve mesârif-i sâireden merkūm Dedo bi’t-tamam ve’l-kemâl istifâ-yı hak eylediği zâhir olduğundan mâ‘adâ benim müdde‘î-i merkūm zimmetinde bin guruş ziyâde hakkım olduğunu ikrâr ve i‘tirâf dahi edip husûs-ı mezbûra müte‘allika âmme-i da‘vâdan benim zimmetimi ibrâ etmişidin deyü eylediği def‘ini ben inkârımdan mâ‘adâ merkūm İstefan mârrü’z-zikr Zilka‘de’nin sekizinci günü meblağ-ı mezkûr on bin beş yüz elli yedi buçuk guruş cihet-i merkūmdan bana deyni olduğunu mahzar-ı şuhûdda ikrâr ve işhâd etmekle hâlâ taleb ederim deyü iddia eylediğimde ol dahi inkâr edip beynimizde münâza‘ât-ı kesîre cereyân etmişidi el-hâletü hâzihî beynimize muslihûn tavassut edip da‘vâ-yı mezkûremden merkūm İstefan ile an-inkâr üç bin iki yüz elli guruş üzerine inşâ-i akd-i sulh eylediklerinde ben dahi sulh-ı mezkûru kabûl ve bedel-i sulh-ı mezkûr üç bin iki yüz elli guruşu merkūm İstefan tamamen bana def‘ u teslîm ben dahi ahz u kabz eylediğimden sonra mâ‘adâya ve ecr-i misl ve icâre-i dükkâna ve bi’l-cümle târih-i kitâba gelince beynimizde cereyân eden ahz u i‘tâ ve mu‘âmelât-ı şettâya müte‘allika âmme-i de‘âvî ve mutâlebât ve kâffe-i eymân ve muhâsamâtdan mesfûr İstefan’ın zimmetini ibrâ ve ıskāt eylediğimde ol dahi bana medfû‘u olan üç bin iki yüz elli guruşa ve müdde‘âsı olan bin guruşa ve sâire müte‘allika âmme-i da‘vâdan benim zimmetimi kezâlik ibrâ ve ıskāt edip ve herbirimiz ber-vech-i muharrer âharın ibrâsını kabûl eyledik dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’l-işrîn mine’l-Muharremi’l-harâm li-sene hamse ve semânîn ve mie ve elf. Şuhûdu’l-hâl: Muhzırân Kethudâsı Mehmed Ağa b. Ahmed, Ali Çelebi b. Abdullah, İsmail Çelebi b. Ali, Osman Ağa b. Halil, Ali b. Ahmed, Terekecibaşı el-Hâc Halil Haseki, Kuşcubaşı Ali Efendi, Yazıcı İbrahim Efendi b. Mehmed, el-Hâc Hüseyin Haseki b. Mehmed Efendi, Küçük Yazıcı Halil Efendi, Başhaseki el-Hâc Hüseyin b. el-Hâc Mustafa, Başhaseki el-Hâc Hüseyin b. el-Hâc Mustafa, Bölükbaşı İbrahim, Kostaki v. Dozi, Aleksan v. Yanaki, Dimitri, İsterati, Yani v. Yori, Yorgi v. Mihal.