İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 192 Hüküm no: 152 Orijinal metin no: [52b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Taşçı Ahmed Ağa’nın Üsküdar’daki taşçı dükkânı gediğini sattığı Mahmiye-i İslambol’da Hocapaşa mahallesinde sâkin taşçı tâifesinden el-Hâc Ahmed Ağa b. Halil meclis-i şer‘-i hatîr-i lâzımü’t-tevkīrde yine tâife-i mezbûreden işbu hâmilü’r-rakīm Karabet v. Abraham muvâcehesinde ikrâr-ı tâm ve takrîr-i kelâm edip akd-i âti’z-zikrin sudûruna değin yedimde mülküm olup medîne-i Üsküdar’da Hasan Ağa mahallesinde İnadiye Hamamı kurbünde vâki‘ bir bâb taşçı dükkânı derûnunda mevcûd beyne’l-hiref gedik ta‘bîr olunan iki aded küllünk ve bir mıtraka ve bir gönye ve bir pergel ve bir terâzi ve sâir taşçı esnâfına mahsûs âlât-ı lâzıme-i ma‘lûmemi tarafeynden îcâb ve kabûlü hâvî şurût-ı müfsideden ârî bey‘-ı bâtt-ı sahîh-i şer‘î ve safka-i vâhide ile merkūm Karabet’e üç yüz guruşa bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz [ve] kabûl eylediğinden sonra semeni olan meblağ-ı mezbûr üç yüz guruşu merkūm Karabet yedinden tamamen ahz u kabz eyleyip semenine [ve] bey‘-ı mezkûrun tağrîr ve gabnine müte‘allika âmme-i da‘vâdan herbirimiz âharın zimmetini ibrâ ve ıskāt ve herbirimiz âharın ibrâsını kabûl eyledik fîmâ-ba‘d mârrü’z-zikr gedik ta‘bîr olunan âlât-ı lâzıme-i ma‘lûme merkūm Karabet’in mülk-i müşterâsı ve hakk-ı sırfı olup benim kat‘a alâka ve medhalim kalmamışdır dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’r-râbi‘ min-Saferü’l-hayr li-sene hamse ve semânîn ve mie ve elf. Şuhûdu’l-hâl: Taşcıbaşı Hâfız Osman b. el-Hâc Halil, Kethudâ es-Seyyid Mehmed [b.] Osman, el-Hâc İsmail b. Hasan, Ahmed Çelebi b. Abbas, es-Seyyid Mehmed b. İbrahim, el-Hâc Mustafa b. Hasan, Ali b. Mustafa çukadâr, Molla Halil b. Mustafa, Osman Usta b. Mustafa.