İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 193 Hüküm no: 153 Orijinal metin no: [52b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hayâtîzâde Mustafa Efendi ile zevcesinin hayatta iken vakfettikleri halde tescil olunmamış mallarına ait vakfiyelerinin tescil olunduğu Mâ yahvîhî hâze’l-kitâbü’l-makbûl min-ikrâri vasiyyeti’l-vakf ve’t-tenfîz ve’l-kabûl vaka‘a ledeyye ve’ttazaha beyne yedeyye fe-sâre’l-vakfu sahîhan lâzımen lâ-yedûru havlehû ehadün li-tasfiyetin âzimen nemakahü’l-fakīru ilâ-afvi rabbihi’l-kadîr Yahya el-kādî bi-Dârü’s-Saltanati’s-Seniyyeti’l-Aliyye sânehâllâhu te‘âlâ ani’l-âfât ve’l-beliye -Gufira leh- Matla‘-ı dil-fürûz-ı kelâm ve fâtiha-i kitâb-ı süreyyâ-intizâm ol mâlik-i mülk-i câvidân celle sultânuhû ve amme ale’l-âlemîn birruhû ve ihsânuhû hazretlerinin dergâh-ı akdes ve bârgâh-ı mukaddeslerine hezârân acz ve intikāl [iftikār] ile hamd-i sipâs-ı bedî‘u’l-esâs ve şükr-i bî-kıyâs takdîm olunup ve ulûf salât [ve] salavât-ı mütevâsılât ve tahiyyât-ı neciyyât-ı mütevâliyât umûmen gürûh-ı bâ-şükûh-ı enbiyâ-i kirâm-ı vâcibü’l-ihtirâm merkad-i tayyibe ve meşâhid-i seniyyelerine husûsan ol makbûl-i dergâh-ı ilâh seyyid ve sened-i evlâd-ı beşer şefî‘-i müşeffe‘-i âcizân-ı rûz-ı mahşer muharrem-i muhterem-i harem-i bârgâh-ı kibriyâ hâce-i her dü serâ Muhammedü’l-Mustafa -sallallâhu te‘âlâ aleyhi ve sellem- hazretlerinin rûh-ı revha-bahşâlarına ihdâ olunup ve fazla-i mevârid-i selâm zümre-i âl ve evlâd ve ahfâdlarına riyâz-ı seniyyelerine irsâl ve îsâl olundukdan sonra işbu kitâb-ı sıhhat-nisâbın tastîr ve inşâsına bâ‘is ve bâdî oldur ki asrında ser-etıbbâ-i hâssa ve sadr-ı vâlâ-yı Anadolu pâyesiyle vedâ‘-ı âlem-i fânî eden Hayâtîzâde Mustafa Efendi hazretlerinin ve zevcesi olup kezâlik vedâ‘-ı âlem-i fânî eden fahrü’l-muhadderât Hâcce Emine Hanım bt. Süleyman Efendi’nin sulbî kebîr oğulları ve zikr-i âtî vakfın mütevellîsi iken kezâlik vefât eden e‘âlî-i izâmdan Cerrâhbaşı el-Hâc Ahmed Efendi hazretlerinin sulbiye kızı ve hasran vârisi ve zikri câ’î vakfın ber-vech-i meşrûta hâlâ mütevelliyesi ve zâtı ta‘rîfü’ş-şer‘î ile <> mu‘arrefe olan Emine Hanım bt. el-mezbûr el-Hâc Ahmed Efendi meclis-i şer‘-i şerîf-i şâmihü’l-imâd ve mahfil-i dîn-i münîf-i râsihü’l-evtâdda ikrâr-ı sahîhü’ş-şer‘î ve i‘tirâf-ı sarîh-i mer‘î edip müteveffiyân-ı mezbûrân Mustafa Efendi ve Hâcce Emine Hanım hazretleri bundan akdem hâl-i kemâl-i sıhhatlerinde biz bi-emrillâhi te‘âlâ irtihâl-i dâr-ı bekā eylediğimizde techîz ve tekfîn ve levâzım-ı defnimiz görüldükden sonra bâkī kalan terekemizin sülüsü ifrâz ve sülüs-i mezkûr vakf-ı sahîh-i müebbed ve habs-i sarîh-i muhalled ile vakf ve habsolup ve meblağ-ı mezbûr ile düşdükçe münâsib mahallerde akār iştirâ ve icâreteyn ile âhara îcâr olunup akārât-ı mezkûrenin hâsıla olan icârâtdan beher senede bir gün bizim ve evlâdımızın sâkin oldukları menzillerinde mevlûdü’n-nebî -aleyhi’s-salâtü ve’s-selâm- kırâet olunup kifâyet mikdârı meblağ harc u sarf oluna ve vakf-ı mezbûra lâbis-i libâs-ı müste‘âr-hayat oldukça oğlumuz mûmâ-ileyh el-Hâc Ahmed Efendi mütevellî ola ve ba‘dehû tevliyet-i merkūme evlâd-ı evlâd-ı evlâdımıza batnen ba‘de batnin ekberine meşrûta ola ve vazîfe-i tevliyet yevmî sekiz akçe ola ve vakfeyn-i mezbûreynin mesârif-i mu‘ayyenesi ihrâc olundukdan sonra kalan meblağ batn-ı evvelde bulunan evlâdımız beynlerinde ale’s-seviye tevzî‘ ve taksîm oluna ve akārât-ı merkūmemden biri mahlûl vâki‘ oldukda hâsıl olan cümlenin sülüsü ifrâz ve yine batn-ı evvelde bulunan evlâdımız beynlerinde ale’s-seviye tevzî‘ ve taksîm ve sülüsânı olan meblağ ile yine akārât iştirâ olunup ve vakfımıza zamm ü ilhâk oluna ve iyâzen bi’llâhi te‘âlâ evlâd münkarizler olur ise tevliyet-i mezkûre minvâl-i meşrûh üzere utekāmıza ve ba‘dehû utekāmızın batn-i evvelde olan ekber evlâdına ve evlâd-ı evlâdına meşrûta ola ve bir mütedeyyin kimesne dahi vakfeyn-i mezbûreyne yevmî dört akçe vazîfe ile kâtib ola ve bir kimesne dahi kezâlik yevmî dört akçe vazîfe ile câbî olup edâ-yı hidmet etdikden sonra ber-vech-i muharrer vazîfeye mutasarrıf olalar ve vakfeyn-i mezkûreynin taklîl ve teksîri ve cihat-ı merkūmeden biri mahlûl yâhud mutasarrıfı âhara kasr-ı yed yâhud azli iktizâ etdikde ancak vakfeyn-i mezkûreynin mütevellîsi arzıyla âhara tevcîh oluna ve şurût-ı mezkûreye ri‘âyet müte‘azzir olursa vakfeyn-i mezkûreyn mutlaka Medîne-i Münevvere nevvereha’llâhu te‘âlâ fukarâsına meşrûta ola deyü ta‘yîn-i şurût ve tebyîz-i kuyûd birle vasiyyet ve pederim müteveffâ-yı mûmâ-ileyh el-Hâc Ahmed Efendi’yi herbiri vasîyy-i muhtâr ve mütevellî nasb ü ta‘yîn ol dahi ba‘de’l-kabûl herbiri musırrân aleyhimâ vefât etmeleriyle pederim merkūm dahi müteveffiyân-ı mûmâ-ileyhimânın terekelerini kabz ve ber-vech-i muharrer techîz ve tekfînleri ve düyûn-ı müsbetelerini ba‘de’l-ihrâc terekelerinin sülüsü dokuz bin guruşa bâliğ ve meblağ-ı mezbûrun altı bin beş yüz guruşu mûmâ-ileyh Hayâtîzâde Mustafa Efendi’nin ve iki bin beş yüz guruşu mezbûre Hâcce Emine Hanım’ın olmağla pederim müteveffâ-yı mezbûr el-Hâc Ahmed Efendi ve ben dahi müteveffiyân-ı mûmâ-ileyhimânın [53a] ber-minvâl-i muharrer vasîlerini herbirimiz müncîz ve tenfîz ve vasiyyet etdikden sonra mûmâ-ileyh el-Hâc Ahmed Efendi’nin ve benim meblağ-ı mecmû‘-i mezbûr ile vakfeyn-i mezkûreyne iştirâ eylediğimiz mahmiye-i İstanbul’da Şeyh Ebi’l-Vefâ kurbünde lede’l-ahâlî ma‘lûmü’l-hudûd ve’l-müştemilât üç yüz yirmi zirâ‘ arsalı bir bâb menzil ve yine Yedikule kurbünde Mirâhur mahallesinde vâki‘ bir tarafdan Sima Nasrâniye menzili ve bir tarafdan vakf-ı mezbûrdan menzil ve bir tarafdan ( ) menzil ve bir tarafdan tarîk-i âm ile mahdûd terbî‘an tahmînen doksan dokuz zirâ‘ arsa üzerinde mebnî ulyâda iki oda ve bir sofa ve bir ocak ve vüstâda kezâlik iki oda ve bir sofa ve bir ocak ve tahtânî bir matbah ve kenîf ve hâricinde bir bâb dükkânı müştemil ve mahtab ve bi’r-i mâ ve kuyu mahzen ve eşcârlı bahçe ve hâriciyede fevkānî bir oda ve kahve odası ve vüstâda bir oda ve tahtânî bir ahır ve kenîf ve havluyu müştemil bir bâb menzil ve yine el-Hâc Evhad mahallesinde vâki‘ bir tarafdan Yedikule ağası bostanı ve iki tarafdan Çorbacı İbrahim Ağa menzilleri ve bir tarafdan tarîk-i âm ile mahdûd terbî‘an ( ) zirâ‘ arsa üzerinde mebnî fevkānî bir oda ve matbah ve tahtânî bir matbah ve havlu ve bahçeyi müştemil bir bâb menzil ve yine el-Hâc Evhad mahallesinde vâki‘ etrâf-ı erba‘adan Yedikule ağası bostanı ve Çorbacı İbrahim Ağa menzilleri ve tarîk-i âm ile mahdûd fevkānî ve tahtânî bir oda ve matbah ve kenîf ve bi’r-i mâ ve bahçe ve havluyu müştemil bir bâb menzil yine zikrolunan el-Hâc Evhad mahallesinde vâki‘ tarafeyni Yedikule ağası bostanı ve bir tarafı Çorbacı İbrahim Ağa menzili ve bir tarafı tarîk-i âm ile mahdûd terbî‘an ( ) zirâ‘ üzerinde mebnî fevkānî ve tahtânî bir oda ve dehliz ve matbah ve kenîf ve bahçe ve havluyu müştemil bir bâb menzil ve yine Kocamustafapaşa mahallesinde Bâzergân Köşesi’nde vâki‘ etrâf-ı erba‘ası Ermeni odaları ve Hadîce ve Fâtıma menzilleri ve tarîk-i âm ile mahdûd tahmînen iki yüz seksen zirâ‘ arsa üzerinde mebnî fevkānî ve tahtânî iki bâb oda ve sofa ve kenîf ve havluyu müştemil bir bâb menzil ve yine Sancakdâr mahallesinde vâki‘ tarafeyni Hüseyin Ağa menzili ve bir tarafı Müstedam Çavuş Vakfı ve bir tarafı tarîk-i âm ile mahdûd tahmînen yüz seksen zirâ‘ arsa üzerinde mebnî fevkānî ve tahtânî üç bâb oda ve sofa ve kenîf ve bi’r-i mâ ve bahçeyi müştemil bir bâb menzil ve yine Kürkçübaşı mahallesinde vâki‘ etrâf-ı erba‘ası Nazlı Nasrâniye ve Buğdaycıoğlu vâlidesi ve Abraham zimmî menzilleri ve tarîk-i âm ile mahdûd tahmînen terbî‘an üç yüz beş zirâ‘ arsalı fevkānî ve tahtânî üç bâb oda ve sofa ve dehliz ve kiler odası ve matbah ve bi’r-i mâ ve kenîf ve havluyu müştemil bir bâb menzil ve yine Mirâhur mahallesinde vâki‘ tarafeyni Yakona ve bir tarafı Dimitri menzilleri ve bir tarafı tarîk-i âm ile mahdûd terbî‘an ( ) zirâ‘ arsalı ulyâda ve süflâda ve vüstâda üç bâb oda ve sofa ve dehliz ve matbah ve ahır ve kenîf ve bahçe havluyu müştemil bir bâb menzil ve yine Abdi Çelebi mahallesinde vâki‘ etrâf-ı selâsesi Mumcu Minas ve Agop ve Kuyumcu menzilleri ve taraf-ı râbi‘i tarîk-i âm ile mahdûd terbî‘an yüz seksen zirâ‘ arsalı fevkānî ve tahtânî iki bâb oda ve sofa ve dehliz ve matbah ve kenîf ve kâgir mahzen ve bi’r-i mâ havluyu müştemil bir bâb menzil ve yine Samatya kurbünde el-Hâc Hüseyin mahallesinde vâki‘ etrâf-ı selâsesi Apostol ve Ballıoğlu menzilleri ve Kalfa duvarı ve taraf-ı râbi‘i tarîk-i âm ile mahdûd terbî‘an tahmînen yetmiş beş zirâ‘ arsalı ulyâ ve vüstâ ve süflâda iki bâb oda ve tahta-pûş ve sofa ve dehliz ve kiler ve müşterek bi’r-i mâ ve kenîfi müştemil bir bâb menzil ve yine Mirâhur mahallesinde vâki‘ etrâf-ı erba‘ası David ve Abraham ve Lazkari veresesi menzilleri ve tarîk-i âm ile mahdûd terbî‘an tahmînen iki yüz sekiz zirâ‘ arsalı ulyâ ve vüstâ ve süflâda üç bâb oda ve kiler ve sofa ve dehliz ve mabah ve mahtab ve kömür ocak ve bi’r-i mâ ve kenîf ve havluyu müştemil bir bâb menzil ve yine Mirâhur mahallesinde vâki‘ etrâf-ı selâsesi Yağhâna ve Lefter ve Haçador menzilleri ve taraf-ı râbi‘i tarîk-i âm ile mahdûd terbî‘an tahmînen iki yüz üç zirâ‘ arsalı fevkānî ve tahtânî üç bâb oda ve sofa ve dehliz ve matbah ve kenîf ve bi’r-i mâ ve bahçeye müştemil bir bâb menzil ve yine Bâyezid-i cedîd mahallesinde vâki‘ etrâf-ı erba‘ası Abdi Çelebi ve İbrahim Ağa mülkleri vakıf bahçe, tarîk-i âm ile mahdûd terbî‘an tahmînen iki yüz yirmi altı zirâ‘ arsalı ulyâ ve vüstâ ve süflâda bir cihân-nümâ ve iki bâb oda ve sofa ve dehliz ve matbah ve mahtab ve mağsel ve bağçeyi müştemil bir bâb menzil ve yine el-Hâc İlyas mahallesinde vâki‘ etrâf-ı erba‘ası Kābile ve Fâtıma Hatun ve Rukiye Hatun menzilleri ve müezzine meşrûta vakıf menzil ve tarîk-i hâs ile mahdûd terbî‘an tahmînen dört yüz elli altı zirâ‘ arsalı ulyâ ve vüstâ ve süflâda dört bâb oda ve sofa ve dehliz ve mağsel ve âbdesthâne ve ahır ve bi’r-i mâ ve kenîf ve bahçeyi müştemil bir bâb menzil ve yine mahrûse-i Galata’ya muzâfe kasaba-i Tophâne’de Muhyiddin Efendi mahallesinde vâki‘ etrâf-ı erba‘ası Kalafatçı Mehmed Beşe ve Çubukçu Hasan Beşe veresesi ve imâma meşrûta menziller ve tarîk-i âm ile mahdûd terbî‘an tahmînen iki yüz altmış altı zirâ‘ arsalı fevkānî ve tahtânî üç bâb oda ve sofa ve dehliz ve bi’r-i mâ ve kenîf ve mahtab ve eşcâr-ı müsmire ve gayr-ı müsmireli bahçeli ve bir mikdâr bahçeyi hâvî bir bâb menzil ve yine Eğrikapı dâhilinde Molla Aşkī mahallesinde vâki‘ bir tarafdan el-Hâc Osman menzili ve bir tarafdan Yahûdihâne ve iki tarafdan tarîk-i âm ile mahdûd terbî‘an dört yüz zirâ‘ arsanın vakf-ı merkūma menâfi‘i olmamağla ba‘de’l-ifrâz içinde müteehhilîn odaları binâ olunmak vakf-ı merkūma enfa‘ olmağın mutasarrıf vakf-ı merkūma teberru‘an mâlıyla binâ etmek üzere yüz otuz üç zirâ‘ ve bir sülüs zirâ‘ını ifrâz ve kezâlik mutasarrıf-ı vakf-ı merkūma teberru‘an mâlıyla menzil binâ etmek [üzere] yüz otuz üç zirâ‘ ve bir sülüs zirâ‘ını kezâlik mutasarrıfı vakf-ı mezbûra teberru‘an mâlıyla menzil binâ etmek üzere yüz otuz üç zirâ‘ ve bir sülüs zirâ‘ını dahi ifrâz ki cem‘an üç bâb menzil arsası [53b] ve yine kasaba-i Beşiktaş’da Süleymâniye mahallesinde vâki‘ etrâf-ı erba‘adan İbrahim Çelebi ve Âişe ve Fâtıma menzilleri ve tarîk-i âm ile mahdûd terbî‘an iki yüz yetmiş beş zirâ‘ arsalı fevkānî ve tahtânî üç bâb oda ve dehliz ve kenîf ve bi’r-i mâ ve havluyu müştemil bir bâb menzil ve yine Avcu Bey mahallesinde vâki‘ bir tarafdan Dimitri menzili ve iki tarafdan vakıf bostan ve bir tarafdan tarîk-i âm ile mahdûd terbî‘an dört yüz zirâ‘ arsa üzerinde mebnî ulyâda ve vüstâ ve süflâda dört bâb oda ve sofa ve dehliz ve tahta-pûş ve matbah ve kenîfler ve mahzen ve mahtab ve kömürlük ve havluyu müştemil bir bâb menzil ve yine medîne-i Ebî Eyyûb-i Ensârî’de Zeyneb Hatun mahallesinde vâki‘ etrâf-ı erba‘ası dere ve Korucu İbrahim menzili ve Mustafa arsası ve tarîk-i âm ile mahdûd terbî‘an iki yüz yirmi altı zirâ‘ arsalı fevkānî ve tahtânî iki bâb oda ve sofa ve dehliz ve ahır ve kenîf ve bir mikdâr bahçeyi müştemil bir bâb menzil ve yine Sancakdâr Hayreddin mahallesinde vâki‘ etrâf-ı erba‘ası Seyhan Hatun ve Berber Mehmed Çelebi menzilleri ve el-Hâc Mustafa zevcesi bahçesi ve tarîk-i âm ile mahdûd tahmînen yüz yirmi zirâ‘ arsalı fevkānî ve tahtânî iki bâb oda ve bir sofa ve bir cak ve dehliz ve bi’r-i mâ ve kenîf ve havluyu müştemil bir bâb menzil ve yine el-Hâc Evhad mahallesinde vâki‘ etrâf-ı erba‘ası Yedikule ağası bostanı ve Çorbacı İbrahim Ağa bahçesi ve tarîk-i âm ile mahdûd terbî‘an tahmînen ( ) zirâ‘ arsalı fevkānî ve tahtânî iki bâb oda ve dehliz ve matbah ve kenîf ve havluyu müştemil bir bâb menzilin on sehimden iki sehm-i şâyi‘i ile ittisâlinde vâki‘ etrâf-ı erba‘adan ( ) menzili ve el-Hâc Mehmed menzili ve es-Seyyid Molla Mecid menzili ve tarîk-i âm ile mahdûd terbî‘an iki yüz yirmi zirâ‘ arsa ve yine Yedikule kurbünde el-Hâc Hüseyin mahallesinde vâki‘ etrâf-ı erba‘adan vakıf bahçe ve ekmekçi zimmî Verdi Nasrâniye menzilleri ve tarîk-i âm ile mahdûd ve tahmînen terbî‘an üç yüz yirmi sekiz zirâ‘ arsalı ulyâ ve vüstâ ve süflâda dört bâb oda ve sofa ve dehliz ve mahtab ve ocak ve kenîf ve bahçe ve havluyu müştemil bir bâb menzil ve yine Mirâhur mahallesinde vâki‘ etrâf-ı selâsesi Balcı Levi ve Bağdadlı zimmî ve Basmacı Papas ve Yamandi menzilleri ve tarîk-i âm ile mahdûd terbî‘an tahmînen üç yüz yetmiş zirâ‘ arsalı fevkānî ve tahtânî dört bâb oda ve sofa ve dehliz ve iki matbah ve iki kenîf ve bi’r-i mâ havluyu müştemil bir bâb menzil ve yine Mirâhur mahallesinde vâki‘ etrâf-ı erba‘ası Dimo ve Yuvan mülkleri ve Serpûşcu Ermeni ve tarîk-i âm ile mahdûd terbî‘an iki yüz elli beş zirâ‘ arsalı ulyâ ve vüstâ ve süflâda dört bâb oda ve sofa ve dehliz ve iki matbah ve iki kenîf <> ve ahır ve bahçe ve bir kuyumcu kârhânesi ve havluyu müştemil bir bâb menzil ve yine Açık mahallesinde vâki‘ vâkıf-ı mûmâ-ileyhâ Emine Hanım’ın kendi mülkü olup üç hisse i‘tibârıyla vakfeylediği lede’l-ahâlî ma‘lûmü’l-hudûd dört yüz zirâ‘ arsadan herbiri vakfa teberru‘an menzil binâ etmek üzere Âişe Hatun’a ifrâz ve îcâr olunan yüz otuz üç zirâ‘ ve bir sülüs Hadîce Hatun’a kezâlik yüz otuz üç zirâ‘ ve bir sülüs ve Ümmügülsüm Hatun’a yüz otuz üç zirâ‘ ve bir sülüs arsa-i hâliye ve yine Süleymâniye Câmi‘-i şerîfi Sarı Bâyezid mahallesinde vâki‘ etrâf-ı erba‘ası el-Hâc Ali Vakfı ve Kapıcıbaşı Mehmed Ağa menzili ve vakıf arsa-i hâliye tarîk-i âm ile mahdûd terbî‘an yüz kırk zirâ‘ arsa ve tahtânî dört bâb oda ve sofa ve dehliz ve matbah ve üç kenîf havluyu müştemil bir bâb menzilin on sehimden sekiz sehm-i şâyi‘i ve yine Kür[k]cübaşı Hüseyin Ağa mahallesinde vâki‘ etrâf-ı erba‘ası Pirone Nasrâniye ve Mumcu Yani ve Çobanoğlu zimmî menzilleri ve tarîk-i âm ile mahdûd dört yüz kırk beş zirâ‘ arsalı fevkānî bir oda ve matbah ve dehliz ve tahtânî kömür ocak ve bi’r-i mâ ve kenîf ve havluyu müştemil bir bâb menzil ve yine Samatya kurbünde el-Hâc Hüseyin mahallesinde vâki‘ etrâf-ı erba‘ası el-Hâc Mecid Vakfı ve Aci Karabet ve Menufa zimmîler menzilleri ve tarîk-i âm ile mahdûd terbî‘an yüz yirmi altı zirâ‘ arsalı ulyâda bir oda ve sofa ve dehliz ve vüstâda bir oda ve dehliz ve matbah ve süflâda bir oda ve bi’r-i mâ ve kenîf ve havluyu müştemil bir bâb menzil ve yine Kocamustafapaşa mahallesinde vâki‘ bir tarafdan ba‘zen Filyoz ve ba‘zen Kanber zimmîler menzili ve bir tarafdan Avanik Nasrâniye menzili ve tarafeyni tarîk-i âm ile mahdûd tahmînen terbî‘an iki yüz kırk zirâ‘ arsalı fevkānî dört bâb oda ve matbah ve bir sofa ve dehliz ve âbdesthâne ve tahtânî bir oda ve bir kiler odası ve bi’r-imâ ve mahtab ve kenîf ve ocak ve ittisâlinde yevmî dörder akçe icâreli bir bâb manav dükkânı ve yevmî üçer akçe icâreli bir bâb attar dükkânını müştemil bir bâb menzil ve yine Samatya kurbünde el-Hâc Hüseyin mahallesinde vâki‘ etrâf-ı selâsesi Kasab Mosko ve İlya zimmîler menzilleri ve Hâci Yorgi bahçesi ve taraf-ı râbi‘i tarîk-i âm ile mahdûd terbî‘an tahmînen yüz yirmi altı zirâ‘ arsalı ulyâda iki bâb oda ve sofa ve dehliz ve vüstâda iki bâb oda ma‘a dehliz ve tahtânî kömür ocak ve bir kiler ve mahtab ve bi’r-i mâ ve kenîf ve havluyu müştemil bir bâb menzil cem‘an otuz sekiz bâb menzili bâlâda tahrîr ve tastîr olunduğu minvâl üzere vakfeyn-i merkūmeyne akār olmak üzere mahlûlü iştirâ ve ber-mûceb-i defter-i vakf icâreteyn ile ashâbına îcâr ve teslîm [54a] ve tevfîz onlar dahi ber-vech-i muharrer istîcâr ve tesellüm ve tefevvüz ve kabûl etmeleriyle herbirine temessük dahi verilmiş idi lâkin tescîl olmamağla tescîl-i şer‘î olunmak matlûbumdur dedikde gıbbe’t-tasdîkı’ş-şer‘î vakfeyn-i merkūmeyn min-kable’l-vasiyyet olmağla muhâkeme ve muhâsamaya muhtâc olmayıp veresenin tahrîr ve tenfîzi ile vakf-ı sahîh ve lâzım ve mütehattim olmağın mâ-vaka‘a bi’t-taleb ketb ü imlâ olundu “fe-men beddelehû ba‘demâ semi‘ahû ve innemâ ismühû ale’l-lezîne yübeddilûnehû innallâhe semî‘un alîm” ve ecrü’l-vâkıf ale’l-hayyü’l-cevâdi’l-kerîm cerâ zâlik ve hurrire. Fî-gurret-i Saferü’l-hayr li-sene hamse ve semânîn ve mie ve elf min-hicreti men lehu’s-sa‘âde. Şuhûdu’l-hâl: Mehmed Ârif Efendi b. el-Hâc Ali, Mehmed Râşid Efendi b. İsmail Efendi, Ali Efendi b. Mehmed Efendi, Baltacı el-Hâc Mustafa b. Hasan, İsmail Çelebi b. Ali el-muhzır, Ali Çelebi b. Abdullah el-muhzır, es-Seyyid Molla Ali b. Derviş Hasan, Mehmed Emin Efendi b. el-Hâc Abdullah, es-Seyyid Hasan Ağa b. Abdullah, Kuzât-ı kirâmdan es-Seyyid Mehmed Emin Efendi b. es-Seyyid Osman Efendi.