İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 199 Hüküm no: 154 Orijinal metin no: [54a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şerbetçi Halil Çelebi’ye şeker bedelinden borcunu ödemesi için altı yıl elli bir gün süre verildiği Mahmiye-i İslambol’da Altımermer kurbünde Kâtib Muslihiddin mahallesinde sâkin şeker şerbetçisi tâifesinden Halil Çelebi b. Hüseyin nâm kimesne meclis-i şer‘-i şerîf-i enverde şeker şerbetçiler kethudâsı işbu râfi‘u’l-kitâb el-Hâc Ali b. Abdullah nâm kimesne mahzarında ikrâr ve takrîr-i kelâm edip mezbûr el-Hâc Ali bundan akdem tüccârından nesne? iştirâ ve kabz ve bana bey‘ ve teslîm ben dahi iştirâ ve kabz eylediğim vezni beynimizde ma‘lûm şeker semeninden bâ-i‘lâm-ı şer‘î mahkûmun-bih zimmetimde mezbûr el-Hâc Ali’ye iki bin sekiz yüz kırk buçuk guruş deynim olup lâkin meblağ-ı mezkûru hâlâ ve def‘aten edâya iktidârım yokdur deyü ber-vech-i âtî tecîl ve taksîte tâlib olduğumda ol dahi işbu târih-i kitâb senesi Ramazan-ı şerîf gurresinde mezbûr el-Hâc Ali’ye dört yüz guruş verip ba‘dehû gurre-i mezbûreden altı sene tamamına değin beher sene kendiye dörder yüz guruş verip altı sene elli bir gün tamamında tamamen edâ ve etmek üzere beni tecîl ve taksît eyledikde ben dahi kabûl ve ber-vech-i muharrer müeccelen ve mukāssatan edâya ta‘ahhüd eyledim dedikde gıbbe’t-tasdîkı’ş-şer‘î mezbûr Halil’in karındaşı Mustafa b. Hüseyin ve Hasan Ağa b. Mehmed nâm kimesneler meblağ-ı müeccel-i mezkûra her biri kefîl ve zâmin olduklarından zonra mezbûr Halil meclis-i şer‘de Hasan Ağa b. Mehmed nâm kimesne muvâcehesinde ben meblağ-ı müeccel-i mezkûru müddet-i madrûbe tamamında tamamen edâ edemezsem İslambol’da Balıkpazarı dâhilinde değirmen karşısında vâki‘ mutasarrıf olduğum bir bâb şeker şerbetçi dükkânının gediğini âhara bey‘ ve semenin kabz ve semen-i mezkûrdan deyn-i mezkûrumu edâya küllemâ azeltüke fe-ente vekîlî mazmûnu üzere vekâlet-i devriye ile mezbûr Hasan Ağa’yı vekîl ve nâib-i menâb nasb ü ta‘yîn eylediğimde ol dahi vekâlet-i mezbûreyi kabûl ve hidemât-ı lâzımesini edâya ta‘ahhüd ve iltizâm eyledi dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sânî min-Saferü’l-hayr li-sene hamse ve semânîn ve mie ve elf. Şuhûdu’l-hâl: Ali b. Veliyüddin, Yiğitbaşı Hüseyin b. Receb, Mehmed Emin Çelebi b. el-Hâc Mustafa, Mehmed Ağa b. Ahmed, Ahmed Ağa b. Abdullah.