İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 199 Hüküm no: 155 Orijinal metin no: [54a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şerbetçi Halil Çelebi’nin ikrarıyla sâbit olan borcuna kardeşi Mustafa’nın kefil olduğu Mahmiye-i İslambol’da Altımermer kurbünde Kâtib Muslihiddin mahallesinde sâkin şeker şerbetçisi tâifesinden Halil Çelebi b. Hüseyin nâm kimesne meclis-i şer‘-i şerîf-i enverde işbu râfi‘u’l-kitâb Hasan Ağa b. Mehmed nâm kimesne mahzarında ikrâr ve takrîr-i kelâm edip ben bundan akdem mezbûr Hasan Ağa yedinden mecmû‘u sekiz yüz doksan guruşluk asel ve sâir emti‘a-i mütenevvi‘a iştirâ ve kabz etmemle hâlâ meblağ-ı mezkûr sekiz yüz doksan guruş cihet-i merkūmeden vâcibü’l-edâ ve lâzımü’l-kazâ mezbûr Hasan Ağa’ya deynimdir dedikde gıbbe’t-tasdîkı’ş-şer‘î mezbûr Halil’in karındaşı Mustafa b. Hüseyin nâm kimesne meclis-i şer‘de mezbûr Hasan Ağa muvâcehesinde karındaşım mezbûr Halil’in mezbûr Hasan Ağa’ya cihet-i merkūmeden deyni olan meblağ-ı mezkûr sekiz yüz doksan guruşa bi’l-emr ve’l-kabûl ben dahi kefîl ve zâmin oldum dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sânî min-Saferü’l-hayr li-sene hamse ve semânîn ve mie ve elf. Şuhûdu’l-hâl: Eş-şâhidûnü’s-sâbıkūn.