İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 200 Hüküm no: 156 Orijinal metin no: [54a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sarı Nasuh Mahallesi Avârız Hanesi Vakfı’na İmâm Mustafa Efendi’nin mütevellî tayin olunduğu Dârü’l-hilâfe’l-aliyye ve makarru’s-saltanati’s-seniyye’de câlis-i mesned-i şerî‘at-i garrâ olan efendiler hazerâtı nezâretlerinde olan evkāfdan mahmiye-i İstanbul’da Sarı Nasuh mahallesi hâne-i avârızı vakfının mütevellîsi olan İmâm Mehmed Efendi b. Mustafa bu esnâda fevt olup ol vechile tevliyet-i merkūme mahlûle ve vakf-ı mezbûre muhtâr-ı ahâlî-i mahalle mütevellî nasbı lâzım ve mühim olup emânet ile ma‘rûf ve sadâkat ile mevsûf ve her vechile tevliyet-i merkūme uhdesinden gelmeğe kādir ve muhtâr-ı ahâlî-i mahalle-i mezbûre idiğini zeyl-i vesîkada muharrerü’l-esâmî Müslimîn ihbârlarıyla lede’ş-şer‘i’l-enver zâhir ve mütehakkık olan hâlâ mahalle-i mezbûre imâmı işbu bâ‘isü’l-kitâb Mustafa Efendi’yi hâkim-i muvakkı‘-ı sadr-ı kitâb tûbâ lehû ve hüsnü-meâb efendi hazretleri dahi vakf-ı mezbûra mütevellî nasb ü ta‘yîn buyurduklarında ol dahi kabûl ve ber-vech-i istikāmet hidemât-ı lâzımesini edâya ta‘ahhüd ve iltizâm etmeğin işbu vesîka-i enîka mâ-hüve’l-vâki‘ bi’t-taleb ketb ü imlâ olundu. Fi’l-yevmi’l-hâmis min-Saferü’l-hayr li-sene hamse ve semânîn ve mie ve elf. Şuhûdu’l-hâl: Mehmed Nurullah Efendi, Ali Çelebi b. Abdullah, Molla İsmail b. Ali, es-Seyyid Mehmed Şerîf Efendi.