İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 200 Hüküm no: 157 Orijinal metin no: [54b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul’da Mercan Çarşısı’ndaki tâcir esnafının talebi üzerine kethudâlıklarına Mustafa Ağa’nın tayin olunduğu Mahmiye-i İstanbul’da Mercan sûkunda vâki‘ tâcir esnâfının yiğitbaşıları Mehmed Çelebi b. İbrahim ve Dikicibaşı es-Seyyid el-Hâc Mehmed b. Ahmed ve esnâf-ı merkūmeden el-Hâc Musa b. Ali ve Küçük el-Hâc Ahmed b. Mehmed ve es-Seyyid Mustafa Ağa b. Mehmed ve Hâfız el-Hâc Osman Efendi b. Mehmed ve Abdullah Çelebi b. el-Hâc Mehmed ve el-Hâc Ahmed b. Ali ve Mustafa Çelebi b. Mustafa ve Ahmed Çelebi b. Abdurrahman ve Mehmed Emin Çelebi b. el-Hâc Ahmed ve sâirleri meclis-i şer‘-i hatîr-i lâzımü’t-tevkīrde yine esnâf-ı merkūmeden işbu râfi‘u’l-kitâb Mustafa Ağa b. Ali nâm kimesne mahzarında herbiri takrîr-i kelâm edip kethudâmız olan işbu hazır bi’l-meclis el-Hâc Mehmed Ağa b. Abdülvehhab kethudâlık umûrunu idârede izhâr-ı acz edip kendi hüsn-i rızâsıyla keff-i yed etmekle cümlemizin muhtârı ve kethudâlık umûruna kādir olup yerine mezbûr Mustafa Ağa kethudâ nasb olunmak matlûbumuzdur deyü iltimâs etmeleriyle a‘lâ-yı kitâbı tevkī‘-i müstetâbı ile tezyîn buyuran hâkim-i hâsim efendi hazretleri mezbûr Mustafa Ağa’yı esnâf-ı mezbûre talebleriyle kethudâ nasb ü ta‘yîn ve umûr-ı mu‘tâdelerini alâ-vechi’l-istikāme rü’yet etmek üzere tenbîh buyurduklarında ol dahi kabûl ve hilâf-ı şer‘-i mutahhar hareket etmeyip kadîmî üzere umûrlarını rü’yet ve idâreye müte‘ahhid olmağın mâ-vaka‘a bi’t-taleb ketb olundu. Fi’l-yevmi’s-sâbi‘ min-Saferü’l-hayr li-sene hamse ve semânîn ve mie ve elf. Şuhûdu’l-hâl: Ahmed Çelebi b. Ali, Osman Çelebi b. Ali, Ali Çelebi b. Abdullah, İsmail Çelebi b. Abdullah, Muhzırân Kethudâsı Mehmed Ağa b. Ahmed.