İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 214 Hüküm no: 171 Orijinal metin no: [58a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Orducu tayin olunan Üsküdarlı Andriyas ve Hisarî Toros’un ekmekçi esnafından ihracı gereken dört hayme için bin iki yüz kuruş tahsil ettikleri İşbu sâl-i meymenet-iştimâlde vâki‘ sefer-i hümâyûn-ı nusret-makrûn için İslambol esnâfının mükemmel ve müretteb ordu ihrâcı bâbında ordu-yı hümâyûn ağası ta‘yîn buyrulan Dergâh-ı âlî kapıcıları zâbitânından İsmail Ağa b. Yusuf yediyle fermân-ı âlî sâdır olmağın imtisâlen-leh mahmiye-i mezbûrede vâki‘ ekmekçi esnâfı üzerlerine ihrâcı lâzım olan dört hayme ile ordu ihrâcı’çün taraflarından orducu nasb ü ta‘yîn eyledikleri Üsküdarlı Andriyas v. Kirkor ve Hisarî Toros v. Şerit nâm zimmîler ordu-yı hümâyûn ihrâcı’çün kıbel-i şer‘den irsâl olunan Ali Efendi’nin Mahmud Paşa Câmi‘-i şerîfi türbe kapısı hâricinde akdeylediği meclis-i şer‘-i şerîf-i enverde esnâf-ı mezbûre kethudâsı Ali Ağa b. Abdurrahman ve Yiğitbaşı Molla Osman b. Mahmud ve Salıcı Molla Osman b. Mustafa ve Acımusluklu Ahmed beşe ve Kanlıfırınlı Ahmed Ağa ve Sofularlı Molla Mustafa nâm kimesneler ile Beşiktaşlı Filyos ve Hisarlı Matyos ve Şişehâneli Arakil ve Üsküdarlı Makdinyos ve sâirleri mahzarlarında ikrâr-ı tâm ve takrîr-i kelâm edip ber-mûceb-i emr-i âlî ve defter-i mevkūfât-ı hakānî esnâf-ı mezbûre üzerlerine [işbu] sene-i mübârekede ihrâcı lâzım olan dört hayme ile ordu ihrâcı’çün taraflarından bizi orducu nasb ü ta‘yîn eylediklerinde bizler dahi ber-minvâl-i muharrer orduculuğu kabûl ve hizmet-i lâzımesini kemâ-yenbagī edâya ta‘ahhüd ve iltizâm eylediğimizden sonra mu‘tâd-ı kadîm üzere beher hayme için veregeldikleri üçer yüz guruşdan dört hayme için cem‘an bin iki yüz guruşu kethudâ ve yiğitbaşıları ve sâirleri yedlerinden tamamen ve kâmilen ahz u kabz eyledik fîmâ-ba‘d meblağ-ı mecmû‘-ı mezkûrdan merkūmûn yedlerinde bir akçe ve bir habbe bâkī kalmamışdır dediklerinde kethudâ-yı mezbûr ve bâlâda isimleri mastûr esnâf-ı mezbûre ihtiyârları merkūmûn dahi mukırrân-ı mezbûrânı tasdîk ve tahkīk ve mezbûrların hizmet-i mezkûreyi kemâ-yenbagī idâre ve rü’yetlerine yine esnâf-ı mezbûrdan Usta Markos v. Samel ve Plavoğlu Aran v. Gaspar nâm zimmîler ta‘ahhüd ve tekeffül ve mesfûrâna dahi esnâf-ı mezbûre ihtiyârları merkūmûn tekeffül eylediklerini kâtib-i mezbûr mahâllinde ba‘de’t-tahrîr ümenâ-i şer‘le meclis-i şer‘a gelip alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fî 12 min-Zilka‘de sene 1184. Şuhûdu’l-hâl: Şâhidûnü’s-sâbıkūn.