İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 215 Hüküm no: 172 Orijinal metin no: [58a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Orducu tayin olunan Süleyman ve dâmadı Hüseyin’in kazzâzlar esnafından ihracı gereken iki hayme için üç yüz kuruş tahsil ettikleri İşbu sâl-i meymenet-iştimâlde vâki‘ sefer-i hümâyûn-ı nusret-makrûn için İslambol esnâfının mükemmel ve müretteb ordu ihrâcı bâbında Ordu-yı Hümâyûn ağası ta‘yîn buyrulan Dergâh-ı âlî kapıcıları zâbitânından İsmail Ağa b. Yusuf yediyle fermân-ı âlî sâdır olmağın imtisâlen-leh mahmiye-i mezbûrede vâki‘ kazzâzân esnâfı üzerlerine ihrâcı lâzım olan iki hayme ile ordu ihrâcı’çün taraflarından orducu nasb ü ta‘yîn eyledikleri el-Hâc Süleyman b. Abdullah ve şerîki dâmadı es-Seyyid Hüseyin b. es-Seyyid Mustafa nâm kimesneler ordu-yı hümâyûn ihrâcı’çün kıbel-i şer‘den irsâl olunan Ali Efendi’nin Mahmud Paşa Câmi‘-i şerîfi türbe kapısı hâricinde akdeylediği meclis-i şer‘-i şerîf-i enverde esnâf-ı mezbûre kethudâsı el-Hâc Süleyman b. Emrullah ve Kazzâzbaşı Osman Ağa b. Mehmed ve Yiğitbaşı Mehmed Odabışı b. Halil ve diğer Yiğitbaşı el-Hâc Mehmed b. el-Hâc Ali ve Mehmed Çelebi b. Receb ve Ahmed b. Mustafa ve diğer Ahmed b. Veliyüddin ve diğer Mehmed Çelebi b. Hüseyin ve Süleyman b. Osman ve sâirleri mahzarında [58b] ikrâr-ı tâm ve takrîr-i kelâm edip ber-mûceb-i emr-i âlî ve defter-i mevkūfât-ı hakānî esnâf-ı mezbûre üzerlerine sene-i mübârekede ihrâcı lâzım olan iki hayme ile ordu ihrâcı’çün taraflarından biz orducu nasb ü ta‘yîn eylediklerinde bizler dahi ber-minvâl-i muharrer orduculuğu kabûl ve hizmet-i lâzımesini kemâ-yenbagī edâya ta‘ahhüd ve iltizâm eylediğimizden sonra mu‘tâd-ı kadîm üzere beher hayme için veregeldikleri yüz ellişer guruşdan iki hayme için cem‘an üç yüz guruşu kethudâ ve yiğitbaşıları ve sâirleri yedlerinden tamamen ve kâmilen ahz u kabz eyledik fîmâ-ba‘d meblağ-ı mecmû‘-ı mezkûrdan merkūmûn yedlerinde bir akçe ve bir habbe bâkī kalmamışdır dediklerinde kethudâ-yı merkūm ve bâlâda isimleri mastûr esnâf-ı mezbûre ihtiyârları merkūmûn dahi mukırrân-ı mezbûrânı tasdîk ve tahkīk ve mezbûrların hizmet-i mezkûreyi kemâ-yenbagī idâre ve rü’yetlerine ta‘ahhüd ve tekeffül eylediklerini kâtib-i merkūm mahâllinde ba‘de’t-tahrîr ümenâ-i şer‘le meclis-i şer‘a gelip alâ-vukū‘ihî inhâ ve takrîr etmeğin mâ vaka‘a bi’t-taleb ketb olundu Fî 17 Zilka‘de sene 1184 Şuhûdu’l-hâl: Şâhidûnü’s-sâbıkūn.