İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 232 Hüküm no: 191 Orijinal metin no: [62b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Uncu Margos’un Çukurbostan’daki un değirmenindeki gedik hissesinin yarısını sattığı Uncu tâifesinden Margos v. Kirkor nâm zimmî meclis-i şer‘-i şerîf-i enverde işbu hâmilü’r-rakīm Agop v. Mardiros nâm zimmî muvâcehesinde ikrâr ve takrîr-i kelâm edip mahmiye-i İstanbul’da Macuncu nâm mahâlde Çukurbostan kurbünde vâki‘ iki horos uncu değirmeni derûnunda mevcûd gedik ta‘bîr olunur sekiz re’s bargir ve sâir âlât-ı lâzıme-i ma‘lûme akd-i âti’z-zikrin sudûruna değin yedimde mülk ve hakkım olmağla hâlâ ben mârrü’z-zikr bargir ve sâir âlât-ı lâzıme-i ma‘lûme sekiz sehim i‘tibârıyla dört sehim hisse-i şâyi‘amı tarafeynden îcâb ve kabûlü hâvî şürût-ı müfsideden ârî bey‘-ı bâtt-ı sahîhü’ş-şer‘î ve safka-i vâhide ile beş yüz kırk guruşa merkūm Agop’a bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz ve kabûl eylediğinden sonra semeni olan meblağ-ı mezkûr beş yüz kırk guruş merkūm Agop yedinden tamamen ahz u kabz edip semenine ve bey‘-ı mezkûrun tağrîr ve gabnine ve gedik husûsuna müte‘allika âmme-i da‘vâdan herbirimiz âharın zimmetini ibrâ ve ıskāt edip ve herbirimiz ber-vech-i muharrer âharın ibrâsını kabûl eyledik fîmâ-ba‘d mârrü’z-zikr değirmen derûnunda mevcûd gedik ta‘bîr olunur sekiz re’s bargir ve sâir âlât-ı lâzıme-i ma‘lûme sekiz sehim i‘tibârıyla dört sehim hisse-i şâyi‘asını yedimde ibkā eyleyip dört sehmi hisse-i şâyi‘amı merkūm Agop’un mülk-i müşterâsı ve hakk-ı sarîhi olup dört sehimde benim alâka ve medhalim kalmamışdır dedikde gıbbe’t-tasdîkı’ş-şer‘î mâ vaka‘a bi’t-taleb ketb olundu Fi’l-yevmi’t-tâsi‘ ve’l-işrîn min-Saferü’l-hayr li-sene hamse ve semânîn ve miete ve elf. Şuhûdu’l-hâl: Molla Hüseyin b. Abdullah, Mustafa b. el-Hâc Mehmed, Ahmed Ağa b. Hüseyin, es-Seyyid el-Hâc Ebûbekir b. el-Hâc Mehmed, Uncular Kethudâsı Mustafa Ağa b. Mehmed ve Ekmekciler Kethudâsı Ali Ağa b. Abdullah, Ali Beşe b. İbrahim, İbrahim Beşe b. Bayram, İbrahim Beşe b. Mehmed. Usta Makos v. Çanla, Mikayil v. İstefan, Abraham v. Gaspar, Filyos v. Avanis.