İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 232 Hüküm no: 192 Orijinal metin no: [63a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtih Câmii inşası için taş tedârik eden Makrihora taşçılarının alacaklarını tahsil ettikleri Mahmiye-i İstanbul’da Ebulfeth Sultân Mehmed Han -aleyhi’r-rahmetü ve’l-gufrân- Câmi‘-i şerîfi binâsına me’mûr ecille-i kibâr-i Devlet-i aliyye’den hâlâ Devlet-i aliyye dâmet fi’l-himâyeti’r-rabbânîde Darbhâne-i âmire emîni olan sa‘âdetlü semâhatlü mahmedetlü bâ‘isü hâze’l-kitâbi’l-müstetâb Mehmed İzzet Beyefendi neclü’l-merhûmi’l-mebrûr el-Hâc Ahmed Efendi hazretlerinin zikri âtî husûsda taraf-ı bâhirü’ş-şereflerinde vekîl-i müseccel-i şer‘îleri izzetlü el-Hâc İsmail Ağa b. el-Hâc Ali Ağa zikri câ’î husûsu mahâllinde kalem-i şer‘-i kavîm ile ketb ü tahrîrin iltimâs buyurmalarıyla cânib-i şerî‘at-ı garrâdan irsâl olunan Mevlânâ Ali Efendi mûmâ-ileyh el-Hâc İsmail Ağa hazretlerinin Tavşantaşı kurbünde Emin Bey mahallesinde vâki‘ menziline varıp zeyl-i kitâbda muharrerü’l-esâmî ve’l-Müslimîn huzûrlarında akd-i meclis-i şer‘-i kavîm eyledikde civâr-ı Saltanat-ı aliyye’de vâki‘ Makrihora taşçıları tâifesinden İslam Beşe b. Mehmed kendi nefsinden asâleten ve Molla Ali b. Salih tarafından vekîl olduğu Zeynel Beşe b. Osman ve Salih Beşe b. Hasan şehâdetleriyle sâbit olmağla vekâleten ve Salih Beşe b. Osman ve Uzun İbrahim b. Ahmed ve Ali Beşe b. Hasan ve Paşo Mehmed b. Yusuf ve Süleyman Beşe b. Mustafa ve Koca Hüseyin b. Hasan ve İmâm Mehmed b. Ömer ve Kuru Yahya b. Hüseyin ve Zeynel Kethudâ b. Osman kendi nefsinde ve Süleyman Beşe b. Mustafa tarafından vekîl-i müseccel-i şer‘îsi olmağla vekâleten ve Cafer Kethudâ b. Hasan ve Kara Mustafa b. Mehmed ve Kızılgöz Hasan Beşe b. Ali ve Murad Ağa b. Yusuf ve Kara Ali Beşe b. Ali ve Sarı İsmail Beşe b. Süleyman ve Deli İshak b. Abdullah nâm kimesneler ile Yamanko v. Dimitri nâm zimmî meclis-i ma‘kūd-ı mezkûrda mûmâ-ileyh el-Hâc İsmail Ağa mahzarında herbiri takrîr-i kelâm ve ta‘bîr ani’l-merâm edip bin yüz seksen üç senesi Recebi’l-ferd’in on altıncı gününden seksen beş senesi Muharremi’l-harâmı gāyetine gelince câmi‘-i mezkûr ebniyesi’çün bâ-defter-i müfredât vekîl-i mûmâ-ileyh hazretlerine bey‘ ve teslîm eylediğimiz ahcâr-ı mütenevvi‘a semenlerinin ber-mûceb-i defter-i müfredât hesâbını vekîl-i mûmâ-ileyh hazretleriyle hesâb-ı sahîh-i şer‘î ile rü’yet eylediğimizde cem‘an on dokuz yük yetmiş üç bin beş yüz seksen akçeye bâliğ olmağla meblağ-ı mecmû‘-ı mezkûru mûmâ-ileyh el-Hâc İsmail Ağa hazretleri bundan akdem ceste ceste ve hâlâ bize def‘ u teslîm ve biz dahi defter-i mezkûr üzere bi-kadri’l-hısas yedinden tamamen ve kemâlen ahz u kabz ve o vechile istifâ-yı hak edip târih-i merkūmdan câmi‘-i mezkûrun hitâmı olan işbu târih-i kitâba gelince ahcâr-ı mütenevvi‘a semenlerinden müvekkil-i müşârün-ileyh vekîl-i mûmâ-ileyh hazretleri zimmetlerinde kat‘a bir akçe ve bir habbe alacağımız ve da‘vâ ve nizâ‘ ve husûmetimiz kalmamağla ahcâr-ı mütenevvi‘a-i mezkûre semenlerine ve hesâbda galat vukū‘una bi’l-cümle husûs-ı merkūma müte‘allika âmme-i de‘âvî ve kâffe-i mutâlebât ve eymân [ve] muhâsamâtdan müvekkil-i müşârün-ileyh ve vekîl-i mûmâ-ileyh hazretlerinin zimmetlerini ibrâ-yı âmm-ı sahîh-i şer‘î ile ibrâ ve ıskāt eyledik dediklerinde vekîl-i mûmâ-ileyh dahi mukırrûn-ı mezbûrûnu bi’l-cümle kelimât-ı meşrûhalarında vicâhen ve şifâhen tahkīk ve tasdîk eylediğinden sonra mezbûrûn Murad ve Zeynel ve Cafer ve Salih ve Sarı İbrahim ve Paşo Mehmed ve Koca Hüseyin ve Kuru Yahya ve İmâm Mehmed ve Kara Mustafa yine meclis-i şer‘-i ma‘kūd-ı mezkûrda herbiri iade-i kelâm edip eğer ba‘de zamânin husûs-ı mezkûr için bir kimesne müvekkil-i müşârün-ileyh ve vekîl-i mûmâ-ileyh hazretlerinden da‘vâ ve şer‘an bir nesne ahz eder ise me’hûzuna biz kefîl ve zâmin olduk dediklerinde mevlânâ-yı mezbûr mahâllinde ketb ü tahrîr ve ma‘an mürsel ümenâ-i şer‘le meclis-i şer‘a gelip vukū‘u inhâ ve takrîr etmeğin mâ vaka‘a bi’t-taleb ketb olundu. Fi’l-yevmi’s-sâmin aşer min-Muharremi’l-harâm li-sene hamse ve semânîn ve mie ve elf. Şuhûdu’l-hâl: Müezzin el-Hâc Mehmed Efendi b. Yusuf, el-Hâc Mehmed Molla Efendi b. Abdullah, İsmail Beyefendi b. Hüseyin, Süleyman Ağa b. Halil, el-Hâc Mustafa b. el-Hâc Mehmed, Mustafa Kalfa b. Mahmud, el-Hâc Mustafa Ağa b. Abdullah, Na‘lbur el-Hâc Ahmed b. Abdullah.