İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 234 Hüküm no: 193 Orijinal metin no: [63a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtih Camii inşasına mal tedârik eden esnafın alacaklarını tahsil ettikleri Mahmiye-i İstanbul’da Ebulfeth Sultân Mehmed Han -aleyhi’r-rahmetü ve’l-gufrân- hazretlerinin câmi‘-i şerîfi binâsına me’mûr ecille-i kibâr-ı Devlet-i aliyye’den hâlâ Devlet-i aliyye dâmet fi’l-himâyeti’r-rabbâniyyede Darbhâne-i âmire emîni olan sa‘âdetlü semâhatlü mahmedetlü bâ‘isü hâze’l-kitâbi’l-müstetâb Mehmed İzzet Beyefendi neclü’l-merhûmi’l-mebrûr el-Hâc Ahmed Efendi hazretlerinin zikri âtî [63b] husûsda taraf-ı bâhirü’ş-şereflerinde vekîl-i müseccel-i şer‘îleri izzetlü el-Hâc İsmail Ağa b. el-Hâc Ali Ağa zikri câ’î husûsları mahâllinde kalem-i şer‘-i kavîm ile ketb ü tahrîr ile iltimâs buyurmalarıyla cânib-i şerî‘at-ı garrâdan irsâl olunan Mevlânâ Ali Efendi mûmâ-ileyh el-Hâc İsmail Ağa hazretlerinin Tavşantaşı kurbünde Emin Bey mahallesinde vâki‘ menziline varıp zeyl-i kitâbda muharrerü’l-esâmi Müslimîn huzûrlarında akd-i meclis-i şer‘-i kavîm eyledikde Âsitâne-i aliyye’de kafesçi esnâfından Ahmed b. Osman ve çilingir tâifesinden Üsküdarî Bedros v. Haçador ve kireçci tâifesinden Abraham v. Bali ve yine çilingir tâifesinden Serope v. Toros ve bezirci ve kûftenci Pandeli v. Yasef ve telci tâifesinden Belgradlıoğlu Sahak v. Yako ve zincirci ve âvîzeci tâifesinden Yasef v. Mosi ve yine çilingir tâifesinden Nifor v. Andon ve şerîki Minas v. Kirkor ve eşek hamalı İbrahim Beşe b. Hüseyin ve Sıkrıkçı Mehmed Emin b. İsmail nâm kimesneler meclis-i ma‘kūd-ı mezkûrda mûmâ-ileyh el-Hâc İsmail Ağa mahzarında herbiri takrîr-i kelâm ve ta‘bîr ani’l-merâm edip bin yüz seksen üç senesi Recebi’l-ferdi’nin on altıncı gününden seksen beş Muharremi’l-harâmı gāyetine gelince mezkûr ebniyesi için bâ-defter-i müfredât vekîl-i mûmâ-ileyh hazretlerine bey‘ ve teslîm eylediğimiz nîm mahfil-i hümâyûn odalar için üç bin yirmi tavan şişesi beher bini iki yüz onar akçeden altı bin üç yüz kırk iki akçe ve kafes şişesi ve üstâdiyye ve mahâllinde vaz‘ üç bin yüz elli akçe ve nakliye yüz beş akçe min-haysü’l-mecmû‘ be-hesâb-ı guruş yetmiş dokuz guruş otuz dokuz akçe ve mesfûr Çilingir Bedros’un yıldızlı pencere ve çam çârçûbeleri rahtı ve câmi‘-i şerîfin kapıları [al]çıları ve perde demirleri ve sâir yıldızlı çilingir âlâtı beş yüz altmış sekiz buçuk guruş on dokuz akçe ve mesfûr Abraham zimmînin bey‘ eylediği yüz on beş keyl kireç ve behr keyl kireç ve beher keyli otuz dörder buçuk akçeden otuz üç guruş ve mesfûr Serope’nin câmi‘-i mezkûrun kapıları için sagīr ve kebîr on dokuz aded kilid ve zemberekleri semenlerinden olan otuz iki buçuk guruş ve mesfûr Pandeli zimmînin câmi‘-i mezkûrun iktizâ eden mahallerine kereste ve taş nakli için alınan öküzlerin zahîreleri için on sekiz ayda bey‘ eylediği kûften semeni olan iki bin yüz altmış guruş ve bezir yağı semeni olan altı yüz otuz guruş ki cem‘an iki bin yedi yüz doksan guruş ve mesfûr Belgradlıoğlu Sahak Yahûdî’nin bey‘ eylediği câmi‘-i mezkûr âvîzeleri ve zincirleri için pirinç ve demir tel semeninden beş yüz elli beş guruş ve mesfûr Nifor ve şerîki Minas zimmîlerden kanâdîl askısı semeninden otuz altı guruş ve demir tel ve zincir örmesi ücreti beher zirâ‘ ikişer paradan bin altı yüz elli zirâ‘ zincir örmesi ücreti seksen iki buçuk guruş mezbûr Eşekhamalı İbrahim Beşe’nin Petrokapısı’ndan ve Cibali Kapısı’ndan câmi‘-i mezkûr ve imâret ve dârü’ş-şifâya tuğla ve kireç ve kereste nakliyesinden bâ-defter-i müfredât kendiye teslîmâtdan bâkī yüz yirmi bir guruş ve yine câmi‘-i mezkûrdan fazla kalan keresteyi Fenerkapısı hâricinde vâki‘ arsaya ve dârü’ş-şifâya nakliyesinden bâ-defter kendiyi bi’d-defa‘ât teslîmâtdan bâkī yüz yirmi bir guruş ki cem‘an iki yüz kırk iki guruş ve mezbûr Sıkrıkçı Mehmed Emin Beşe’nin câmi‘-i mezkûrun âvîzeleri için çıkrıkçı-kârı top ve beyzâ ve alt ve üst beyzâ kapağı ve minber alemi püskül başlığı ve mühr-i Süleyman topları semenlerinden yüz otuz beş guruş otuz akçeden bâ-defter-i müfredât câmi‘-i mezkûr için bey‘ ve teslîm eylediğimiz eşyâ-i mütenevvi‘a ve ücretlerimizin hesâbını vekîl-i mûmâ-ileyh hesâb-ı sahîh-i şer‘î ile rü’yet eylediğimizde cem‘an dört bin beş yüz kırk dokuz buçuk guruş sekiz akçeye bâliğ olmağla meblağ-ı mecmû‘-ı merkūm mûmâ-ileyh el-Hâc İsmail Ağa hazretleri bundan akdem ceste ceste ve hâlâ bize def‘ u teslîm ve biz dahi defter-i mezkûr üzere ba‘de’l-hısas yedinden tamamen ve kâmilen ahz u kabz ol vechile istifâ-yı hak edip târih-i merkūmdan câmi‘-i mezkûrun hitâmı olan târih-i kitâba gelince eşyâ-i muharrere-i mezkûre semenlerinden ve ücretimizde müvekkil-i müşârün-ileyh vekîl-i mûmâ-ileyh hazretleri zimmetlerin de kat‘a bir habbe ve akçe alacağımız ve de‘âvî ve nizâ‘ ve husûmetimiz kalmamağla eşyâ-i muharrere-i mezkûre semenlerine ve ücretimize ve hesâbda galat vukū‘una ve bi’l-cümle husûs-ı merkūma müte‘allika âmme-i [64a] de‘âvî ve kâffe-i mutâlebât ve eymân [ve] muhâsamâtdan müvekkil-i müşârün-ileyh ve vekîl-i mûmâ-ileyh hazretleri[nin] zimmetlerini herbirimiz ibrâ-i âm ile ibrâ ve ıskāt eyledik dediklerinde vekîl-i mûmâ-ileyh dahi mukırrûn-ı mezbûrûn bi’l-cümle kelimât-ı meşrûhalarında vicâhen ve şifâhen tahkīk ve tasdîk eylediğini mevlânâ-yı mezbûr mahâllinde ketb ü tahrîr ve ma‘an mürsel ümenâ-i şer‘le meclis-i şer‘a gelip alâ-vukū‘ihî inhâ ve tahrîr etmeğin mâ vaka‘a bi’t-taleb ketb olundu. Fi’l-yevmi’s-sâmin aşer min-Muharremi’l-harâm li-sene hamse ve semânî ve mie ve elf. Şuhûdu’l-hâl: Müezzin el-Hâc Mehmed Efendi b. el-vâkıf, el-Hâc Mehmed Molla Efendi b. Abdullah, İsmail Beyefendi b. Hüseyin, Süleyman Ağa b. Halil, el-Hâc Mustafa b. el-Hâc Mehmed, Taşcı kalfalarından Mustafa Kalfa b. Mahmud, el-Hâc Mustafa b. Abdullah, Na‘lbur el-Hâc Ahmed Ağa b. Abdullah