İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 237 Hüküm no: 195 Orijinal metin no: [64a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtih Câmii inşasında direkler için döğme bilezik, çenber, kubbe alemleri temin eden Döğmeci Osman Çelebi’nin alacağını tahsil ettiği Mahmiye-i İstanbul’da Ebulfeth Sultân Mehmed Han -aleyhi’r-rahmetü ve’l-gufrân- hazretlerinin camî‘-i şerîfi binâsına me’mûr ecille-i kibârdan Devlet-i Aliyye dâmet fi’l-himâyeti’r-rabbâniyye Darbhâne-i âmire emîni olan sa‘âdetlü semâhatlü mahmedetlü bâ‘isü hâze’l-kitâb-ı müstetâb Mehmed İzzet Beyefendi neclü’l-merhûmi’l-mebrûr el-Hâc Ahmed Efendi hazretlerinin zikri âtî husûsda taraf-ı bâhirü’ş-şereflerinden vekîl-i müseccel-i şer‘îleri izzetlü el-Hâc İsmail Ağa b. el-Hâc Ali Ağa ve zikr-i câ’î husûsu mahâllinde kalem-i şer‘-i kavîm ile ketb ü tahrîri iltimâs buyurmalarıyla cânib-i şerî‘at-ı garrâdan irsâl olunan Mevlânâ Ali Efendi mûmâ-ileyh el-Hâc İsmail Ağa’nın Tavşantaşı kurbünde Emin Bey mahallesinde menziline varıp zeyl-i kitâbda muharrerü’l-esâmî Müslimîn huzûrlarında akd-i meclis-i şer‘-i âlî eyledikde Âsitâne-i aliyye’de dökmeci esnâfından el-Hâc Osman Çelebi b. Ömer nâm kimene meclis-i ma‘kūd-ı mezkûrda mûmâ-ileyh el-Hâc İsmail Ağa mahzarında takrîr-i kelâm ve ta‘bîr ani’l-merâm edip bin yüz seksen üç senesi Recebi’l-ferdi’nin on altıncı gününden seksen beş Muharremi’l-harâmı’nın gāyetince gelince câmi‘-i mezkûr ebniyesi’çünbâ-defter-i müfredât vekîl-i mûmâ-ileyh hazretlerine bey‘ ve teslîm eylediğim câmi‘-i mezkûrda direkler için dökme bilezik ve çenber ve alem-i hilâlî ta‘bîr olunur sagīr ve kebîr kubbelerin alemleri takımları semenlerini ber-mûceb-i defter-i müfredât hesâbı vekîl-i mûmâ-ileyh hazretleriyle hesâb-ı sahîh-i şer‘ile rü’yet eylediğimizde cem‘an bir yük yirmi beş bin dört yüz kırk dokuz akçeye bâliğ olmağla meblağ-ı mecmû‘-ı mezkûru mûmâ-ileyh el-Hâc İsmail Ağa hazretleri bundan akdem ceste ceste ve hâlâ bana def‘ u teslîm ve ben dahi defter-i mezkûr üzere yedinden tamamen ve kâmilen ahz u kabz ve ol vechile istifâ-yı hak edip târih-i merkūmeden câmi‘-i mezkûrun hitâmı olan işbu târih-i kitâba gelinceye eşyâ-i muharrere-i mezkûre semenlerinden müvekkil-i müşârün-ileyh ve vekîl-i mûmâ-ileyh hazretleri zimmetlerinde kat‘a bir akçe ve bir habbe alacağım ve da‘vâ ve nizâ‘ ve husûmetim kalmamağla eşyâ-i muharrere-i mezkûre semenlerine ve hesâbda galat vukū‘una ve bi’l-cümle husûs-ı merkūma müte‘allika âmme-i de‘âvî ve kâffe-i mutâlebât ve eymân ve muhâsamâtdan müvekkil-i müşârün-ileyh ve vekîl-i mûmâ-ileyh hazretlerinin zimmetlerini ibrâ-i âmm-ı [64b] sahîh-i şer‘î ile ibrâ ve ıskāt eyledim dedikde vekîl-i mûmâ-ileyh dahi mukırr-ı merkūmu bi’l-cümle kelimât-ı meşrûhasında vicâhen ve şifâhen tahkīk ve tasdîk eylediğini mevlânâ-yı mezbûr mahâllinde ketb ü tahrîr ve ma‘an mürsel ümenâ-i şer‘ ile meclis-i şer‘a gelip alâ-vukū‘ihî inhâ ve takrîr etmeğin mâ vaka‘a bi’t-taleb ketb olundu. Fi’l-yevmi’s-sâmin aşer min-Muharremi’l-harâm li-sene hamse ve semânîn ve mie ve elf. Şuhûdu’l-hâl: Şâhidûn-ı sâbıkūn.