İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 243 Hüküm no: 201 Orijinal metin no: [66a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Cibali Kapısı İskelesi arka hamalları kethudâsı Hüseyin’in azliyle yerine Hasan’ın tayin olunduğu Âsitâne-i aliyye’de vâki‘ ekmekçi tâifesinin kethudâları ve nizâm ustaları meclis-i şer‘-i şerîf-i enverde İstanbul’da Cibali Kapısı İskelesi’nde arka hamalları kethudâları olan Hüseyin b. Hasan ile iskele-i merkūm hamallarından Melkon v. Bogos ve Manuk v. Arakil zimmîler muvâcehelerinde hammâlân tâifesinin Başkethudâ Vekîli Mehmed b. Bâyezid ve Unkapanı İskelesi Kethudâsı es-Seyyid Ali b. Mustafa ve Odunkapısı İskelesi Kethudâsı Kara Hasan Ağa ve Ayazma İskelesi Kethudâsı es-Seyyid Ebûbekir ve Fener İskelesi Kethudâsı es-Seyyid Ahmed ve Balat İskelesi Kethudâsı es-Seyyid Bektaş ve Defterdâr İskelesi Kethudâsı Hasan ve Yenikapı İskelesi Kethudâsı Mehmed ve Eyüb İskelesi Kethudâsı İsa ve sâirleri hazır oldukları hâlde herbiri takrîr-i kelâm edip mezbûr Hüseyin bir ay mukaddem iskele-i merkūmeye kethudâ olup lâkin umûrunu idâreye kādir olmayıp merkūmân Melkon ve Manuk iskele-i mezbûreye zahîre mavnası yanaşdıkda ihrâc ve değirmende naklinde ezâ ve nizâm-ı kadîmlerine muhâlif hareket ile cümlemizi rencîde etmeleriyle iskele-i merkūmede mezbûr Hüseyin fîmâ-ba‘d kethudâ olmayıp ve merkūmân Melkon ve Manuk dahi hamallık etmemek üzere merkūmâna tenbîh olunmak matlûbumuzdur deyü teşekkî eylediklerinde mezbûr Hüseyin ve merkūmân Melkon ve Manuk fîmâ-ba‘d iskele-i merkūmede hamallık etmek üzere ta‘ahhüd eylediklerinden sonra mezbûr Hüseyin’in yerine mukaddemâ iskele-i merkūmede kethudâ olan es-Seyyid Hasan b. Veliyüddin kethudâlık umûrunu tâm vechile idâreye kādir olduğunu ihbâr ve kethudâ olmak üzere esnâf-ı mezkûre ve hammâlân tâifesi mezbûrûn iltimâs etmeleriyle a‘lâ-yı kitâbı tevkī‘-i müstetâbıyla tezyîn buyuran hâkim efendi hazretleri cümlenin taleb ve iltimâslarıyla [66b] işbu râfi‘u’l-kitâb mezbûr es-Seyyid Hasan iskele-i merkūmeye kethudâ olmak üzere nasb ü ta‘yîn ve umûr-ı mu‘tâdlarını alâ-vechi’l-istikāme rü’yet etmek üzere tenbîh buyurdukda ol dahi kabûl ve hizmet-i lâzımesini edâya ta‘ahhüd etmeğin mâ vaka‘a bi’t-taleb ketb olundu Fî 15 Rebî‘ülevvel sene 1185. Şuhûdu’l-hâl: Ali b. Ahmed, Osman b. Halil, İsmail b. Ali, Ali b. ( ), Muhzırân Kethudâsı Mehmed Ağa b. Ahmed.