İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 244 Hüküm no: 202 Orijinal metin no: [66b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Peynirci esnafının taşradan İstanbul’a getirdikleri peynirleri muhtekirlere vermeyip sadece bakkallara satmaya söz verdikleri Âsitâne-i aliyye’de Odunkapısı hâricinde vâki‘ penirci esnâfının kethudâları Mehmed Çelebi b. İsmail ve müsinn [ü] ihtiyârlarından el-Hâc Mehmed b. el-Hâc Mustafa ve el-Hâc Mustafa b. Ahmed ve el-Hâc Hüseyin b. Ahmed ve Mehmed Yazıcı b. Abdullah ve es-Seyyid Hasan Çelebi b. Yusuf ve Halil b. Osman ve Mustafa b. Ahmed ve sâirleri meclis-i şer‘-i şerîf-i enverde bakkāl tâifesinin bâzârbaşıları vekîli olan işbu râfi‘u’l-kitâb Ali b. Hasan ve ihtiyârlardan Mehmed Odabaşı b. Mahmud ve Ahmed Usta b. Mustafa nâm kimesneler ile Panayot v. Dimitri ve Yuvan v. Mihal ve Yorgi v. Yani ve sâirleri muvâcehelerinde herbiri takrîr-i kelâm edip biz taşradan Âsitâne-i aliyye’ye envâ‘-ı penir getiren esnâfdan olup bakkāl tâifesi mezbûrûn Âsitâne-i aliyye’ye getirdiğiniz taze dil ve kaşkaval ve çayır penirlerini muhtekir tâifesine vermeyip bize bey‘ etmek nizâm-ı kadîmimizden iken muhtekir tâifesine verirler deyü bizden teşekkî etmişler idiler el-hâletü hâzihî fîmâ-ba‘d biz taşradan getirdiğimiz mârrü’z-zikr penirleri muhtekir tâifesine vermeyip bakkāl esnâfına bey‘ edip nizâm-ı kadîm üzere amel ve harekete ta‘ahhüd eylediğimizde onlar dahi bu vech üzere râzılar oldular dediklerinde bakkāl tâifesi mezbûrûn dahi penirci tâifesi merkūmûnu tasdîk etmeğin mâ vaka‘a bi’t-taleb ketb olundu Fî 25 Rebî‘ülevvel sene 1185. Şuhûdu’l-hâl: Ali Çelebi b. Abdullah, İsmail Çelebi b. Ali, Muhzırân Kethudâsı Mehmed Ağa b. Ahmed ve gayruhum [mine’l]-huzzâr.