İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 245 Hüküm no: 203 Orijinal metin no: [66b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Habbâz Kirkor ve ortağı Agop’un bir fırın ve değirmendeki gedik hisselerini sattıkları Habbâz tâifesinden Kirkor v. Şehbaz ve şerîki Agop v. Artin nâm zimmîler meclis-i şer‘-i şerîf-i enverde işbu hâmilü’r-rakīm Artin v. Toros nâm zimmî muvâcehesinde herbiri ikrâr ve takrîr-i kelâm edip mahmiye-i İstanbul’da Kantarcılar Fırını demekle ma‘rûf bir bâb fırın ve ona merbût Yenibahçe kurbünde Keçeciler Değirmeni demekle ma‘rûf dört horos değirmen derûnlarında mevcûde gedik ta‘bîr olunur on altı re’s bargir ve sâir âlât-ı lâzıme-i ma‘lûme olan iki sehim i‘tibârıyla akd-i âti’z-zikrin sudûruna değin yedimizde bi’l-münâsafa şâyi‘an mülkümüz olmağla merkūm Kirkor hâlâ ben fırın ve değirmende olan gedik ta‘bîr olunur on altı bargir ve sâir âlât-ı lâzıme-i ma‘lûmede i‘tibâr-ı mezkûr üzere altı sehim hisse-i şâyi‘den iki sehim hisse-i şâyi‘amı tarafeynden îcâb ve kabûlü hâvî şürût-ı müfsideden ârî bey‘-ı bâtt-ı sahîh-i şer‘î ile merkūm Artin’e beş yüz guruşa bey‘ ve temlîk ve teslîm ve merkūm Agop hâlâ ben dahi fırın ve değirmen[de] olan ber-vech-i muharrer i‘tibâr-ı mezkûr altı sehim hisse-i şâyi‘imden iki sehim hisse-i şâyi‘amı kezâlik merkūm Artin’e beş yüz guruşa bey‘ ve temlîk ve teslîm eylediğimizde ol dahi ber-vech-i muharrer hisse-i mezkûrelerin iştirâ ve temellük ve tesellüm ve kabz ve kabûl eylediğinden sonra ve herbirimiz mârrü’z-zikr beş yüz guruşu merkūm Artin yedinden tamamen ahz u kabz edip semenine [ve] bey‘-ı mezkûrun tağrîr [ve] gabnine ve gedik husûsuna müte‘allika âmme-i de‘âvî ve kâffe-i mutâlebâtdan merkūm Artin’in zimmetini ibrâ ve ıskāt edip ol dahi ibrâlarını kabûl eyledi fîmâ-ba‘d mârrü’z-zikr fırın ve değirmen derûnunda mevcûd gedik ta‘bîr olunur on altı re’s bargir ve sâir âlât-ı lâzıme-i ma‘lûme on iki sehim hisse i‘tibârıyla dört sehm-i şâyi‘amı merkūm Kirkor zimmînin dört sehim hisse-i şâyi‘ası merkūm Agop zimmînin yedlerinde ibkā ve dört sehim hisse-i şâyi‘ası merkūm Artin zimmînin mülk-i müşterâsı ve hakk-ı sarîhi olup dört sehim hisse-i şâyi‘asında bizim alâka ve medhalimiz kalmamışdır dedikde gıbbe’t-tasdîkı’ş-şer‘î mâ vaka‘a bi’t-taleb ketb olundu. Fi’l-yevmi’s-sâbi‘ ve’l-işrîn min-Rebî‘i’l-evvel li-sene hamse ve semânîn ve mie ve elf. Şuhûdu’l-hâl: Molla Hasan b. ( ), Hasan Usta b. Hüseyin, Molla Mustafa b. Mehmed, es-Seyyid el-Hâc Ebûbekir b. Ahmed, Ahmed Ağa b. Hüseyin, Ekmekçi Kethudâsı Ali Ağa b. Abdurrahman ve gayruhum mine’l-huzzâr. Markos v. Samel, Filyoz v. Avanis, Abram v. Gaspar, Bogos v. Artin, Parnak v. Abraham, Agop v. Artin.