İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 246 Hüküm no: 204 Orijinal metin no: [66b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Habbâz Mihail’in bir fırın ve değirmendeki gedik hissesini sattığı Habbâz tâifesinden Mihail v. Razopar nâm zimmî meclis-i şer‘-i enverde tâife-i mezbûreden işbu hâmilü’r-rakīm Aram v. Minas ve Simon v. Kazer nâm zimmîler muvâcehelerinde ikrâr ve takrîr-i kelâm edip mahmiye-i İstanbul’da Kırkçeşme Fırını demekle ma‘rûf bir bâb fırın ve ittisâlinde altı horos değirmen derûnunda mevcûd gedik ta‘bîr olunur yirmi dört re’s bargir ve sâir âlât-ı lâzıme-i ma‘lûme yirmi dört sehim i‘tibârıyla akd-i âti’z-zikrin sudûruna değin yedimde mülküm ve hakkım olmağla hâlâ ben mârrü’z-zikr fırın ve değirmende derûnunda mevcûd gedik ta‘bîr olunur yirmi dört re’s bargir ve sâir âlât-ı lâzıme-i ma‘lûme yirmi dört sehim i‘tibârıyla altı sehim hissi-i şâyi‘amı tarafeynden îcâb ve kabûlü hâvî bey‘-ı bâtt-ı sahîh-i şer‘î ve safka-i vâhide ile dokuz yüz guruşa merkūm [67a] Aram zimmîye ve altı sehim hisse-i şâyi‘amı kezâlik dokuz yüz guruşa merkūm Simon bey‘ ve temlîk ve teslîm eylediğimde onlar dahi ber-vech-i muharrer iştirâ ve temellük ve tesellüm ve kabz ve kabûl eylediklerinden sonra semenleri olan meblağ-ı mezkûr dokuz yüz guruşa merkūm Aram yedinden ve dokuz yüz guruşu merkūm Simon yedinden tamamen ahz u kabz eyleyip semenine ve bey‘-ı mezkûrun tağrîr ve gabnine ve gedik husûsuna müte‘allika âmme-i da‘vâdan herbirimiz âharın zimmetini ibrâ ve ıskāt ve herbirimiz ber-vech-i muharrer âharın ibrâsını kabûl eyledik fîmâ-ba‘d mârrü’z-zikr fırın ve değirmende olan gedik ta‘bîr olunur yirmi dört re’s bargir ve sâir âlât-ı lâzıme-i ma‘lûme yirmi dört sehim i‘tibârıyla on iki sehim hisse-i şâyi‘amı yedinde ibkā ve altı sehim hisse-i şâyi‘amı merkūm Arakil ve altı sehim hisse-i şâyi‘amı merkūm Simon’un mülk-i müşterâları ve hakk-ı sırfları olup cem‘an on iki sehim hise-i şâyi‘asında benim kat‘a alâka ve medhalim kalmamışdır dedikde gıbbe’t-tasdîkı’ş-şer‘î mâ vaka‘a bi’t-taleb ketb olundu. Fi’l-yevmi’s-sâbi‘ ve’l-işrîn min-Rebî‘i’l-evvel li-sene hamse ve semânîn ve mie ve elf. Şuhûdu’l-hâl: Ekmekçi Kethudâsı Ali Ağa b. Abdurrahman, Ahmed Ağa b. el-Hâc Hüseyin, es-Seyyid el-Hâc Ebûbekir b. el-Hâc Mehmed, Molla Mustafa b. el-Hâc Mehmed, Molla Hasan, Parnak v. Arakil, Artin v. Avanis, Markos v. Samel, Filyoz v. Avanis, Abram v. Gaspar, Agop v. Artin.