İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 247 Hüküm no: 205 Orijinal metin no: [67a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Artin v. Avanis’in Edirnekapısı fırınındaki altı sehim gedik hissesini sattığı Mahmiye-i İstanbul’da Edirnekapısı Fırını demekle ma‘rûf fırın ve ittisâlinde vâki‘ altı horos değirmen derûnunda mevcûd gedik ta‘bîr olunur yirmi dört re’s bargir ve sâir âlât-ı lâzıme-i ma‘lûme yirmi dört sehim i‘tibârıyla sekiz sehim Bogos v. Artin’in ve altı sehmi Artin v. Avanis’in ve altı sehmi diğer Artin v. Mihail ve dört sehim Parnak v. Arakil ve Agop v. Artin’in sâbıkā mülkleri iken merkūm Bogos zikrolunan sekiz sehimden iki sehm-i şâyi‘ayı merkūm Parnak v. Arakil ve Agop v. Artin nâm zimmîlere ale’l-iştirâki’s-seviy üç yüz guruşa bey‘ ve temlîk onlar dahi iştirâ ve temellük ve kabz ve kabûl eylediklerinden sonra merkūm Artin v. Avanis v. Nevruz nâm zimmî tarafından husûs-ı âti’z-zikrde vekîl olduğu Bogos v. Artin ve Haçador v. Artin nâm zimmîler şehâdetleriyle sâbit olan Anparsom v. Agop nâm zimmî meclis-i şer‘-i şerîf-i enverde işbu hâmilü’r-rakīm Mikayil v. İstefan nâm zimmî muvâcehesinde bi’l-vekâle ikrâr ve takrîr-i kelâm edip müvekkilim merkūm Artin’in mârrü’z-zikr fırın ve değirmen derûnunda mevcûd yirmi dört re’s bargir ve sâir âlât-ı lâzıme-i ma‘lûme yirmi dört sehim i‘tibârıyla altı sehim hisse-i şâyi‘asını tarafeynden îcâb ve kabûlü hâvî şürût-ı müfsideden ârî bey‘-ı bâtt-ı sahîh-i şer‘î ve safka-i vâhide ile merkūm Mikayil zimmîye dokuz yüz guruşa bi’l-vekâle bey‘ ve temlîk ve teslîm eyledikde ol dahi ber-vech-i muharrer iştirâ ve temellük ve tesellüm ve kabz ve kabûl eyledikden sonra semeni olan meblağ-ı mezbûr dokuz yüz guruşa merkūm Mikayil yedinden bi’l-vekâle ahz u kabz eyleyip semenine ve bey‘-ı mezkûrun tağrîr ve gabnine ve gedik husûsuna müte‘allika âmme-i da‘vâdan herbirimiz âharın zimmetini bi’l-asâle ve bi’l-vekâle ibrâ ve ıskāt ve herbirimiz ber-vech-i muharrer âharın ibrâsını kabûl eyledik fîmâ-ba‘d mârrü’z-zikr fırın ve değirmen derûnunda mevcûd gedik ta‘bîr olunur yirmi dört re’s bargir ve sâir âlât-ı lâzıme-i ma‘lûme yirmi dört sehim i‘tibârıyla müvekkilim merkūm Artin’in altı sehim hisse-i şâyi‘ası merkūm Mikayil mülk-i müşterâsı olup ve altı sehim hisse-i şâyi‘ası merkūm Bogos’un ve altı sehim hisse-i şâyi‘ası diğer Artin v. Mihail’in ve altı sehim hisse-i şâyi‘ası merkūmân Parnak ve Agop’un şâyi‘an mülkleri olup müvekkilim merkūm Artin v. Avanis’in kat‘a alâka ve medhali kalmamışdır dedikde gıbbe’t-tasdîkı’ş-şer‘î mâ vaka‘a bi’t-taleb ketb olundu. Fi’l-yevmi’s-sâbi‘ ve’l-işrîn min-Rebî‘i’l-evvel li-sene hamse ve semânîn ve mie ve elf. Şuhûdu’l-hâl: Ekmekçiler Kethudâsı Ali Ağa b. Abdurrahman, Ahmed Ağa b. el-Hâc Hüseyin, es-Seyyid el-Hâc Ebûbekir b. el-Hâc Mehmed, Molla Mustafa b. el-Hâc Mehmed, Hasan Usta b. Hüseyin, Molla Hasan, Markos v. Samel, Filyoz v. Avanis, Aram v. Gaspar, Artin v. Toros, Agop v. Artin, Kirkor v. Şehbaz.