İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 248 Hüküm no: 206 Orijinal metin no: [67b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Azlolunan İbrahim’in lüleci esnafının talebi üzerine kethudâ vekilliğinde kaldığı Mahmiye-i İstanbul’da mikras çarhı ta‘bîr olunur lüleci esnâfından yiğitbaşı olan es-Seyyid Mustafa b. Ali ve el-Hâc b. Mehmed ve el-Hâc Mehmed b. Ahmed ve Osman Odabaşı b. Mustafa ve İsmail b. Mehmed Said ve Hasan b. Ali ve Derviş b. Abdullah b. İsmail ve Mustafa b. Hüseyin ve Osman b. Ahmed ve Mehmed b. Ali ve Ahmed b. Mehmed Emin ve Abdullah b. İsmail ve Salih b. Mehmed ve Ali b. Mehmed ve Mustafa b. Mehmed ve Yusuf b. Ali ve Süleyman b. Abdullah ve Osman b. Mustafa ve Nu‘man b. Ali ve Mehmed b. Süleyman ve Mustafa b. Ahmed ve Osman b. Abdurrahman ve sâirleri meclis-i şer‘-i şerîf-i enverde yine esnâf-ı merkūmeden işbu râfi‘u’l-kitâb el-Hâc İbrahim b. İsmail mahzarında Lüleciler Esnâfı Kethudâsı Nigâhî Hüseyin Dede b. Ömer hazır olduğu hâlde herbiri takrîr-i kelâm edip mezbûr Nigâhî Hüseyin Dede Lüleciler esnâfının kethudâsı olup bundan akdem mikrâs çarhı ta‘bîr olunur lüleci esnâfının umûr [u] husûsunu idâre ve rü’yete tarafından bâ-hüccet-i şer‘iye mezbûr el-Hâc İbrahim vekîl nasb ü ta‘yîn ol dahi kabûl ve umûrumuzu rü’yet ve hilâf-ı şer‘-i mutahhar ve mugāyir-i nizâm-ı kadîm hareket etmeyip cümlemiz mezbûr el-Hâc İbrahim’den hoşnûd ve râzılar iken mezbûr Nigâhî Hüseyin Dede mezbûr el-Hâc İbrahim’i vekâletden azl irâdesiyle cümlemizi rencîde eder deyü teşekkî ve mezbûr el-Hâc İbrahim’in vekâletde ibkā olunmasını iltimâs etmeleriyle mezbûr Nigâhî Hüseyin Dede esnâf-ı mezkûrenin iltimâsları üzere mezbûr el-Hâc İbrahim’i tarafından tevkîl eyledikde ol dahi vekâlet-i mezbûreyi kabûl ve yiğitbaşı mezbûr es-Seyyid Mustafa ile esnâf-ı mezkûrenin umûr ve husûslarını kemâ-yenbagī idâre ve rü’yet edip ve mezbûr Nigâhî Hüseyin Dede fîmâ-ba‘d umûr ve husûslarına karışmayıp ve mezbûr el-Hâc İbrahim dahi hilâf-ı şer‘-i mutahhar kimesneye vaz‘ u hareket etmemek üzere her birine kıbel-i şer‘den tenbîh olundukda onlar dahi ber-vech-i muharrer herbiri ta‘ahhüd etmeğin mâ vaka‘a bi’t-taleb ketb olundu. Gurre-i Rebî‘ülâhire sene 1185. Şuhûdu’l-hâl: Muhzırân Kethudâsı Mehmed Ağa b. Ahmed, Osman Çelebi b. Hamza, Ali Çelebi b. Abdullah, İsmail Çelebi b. Ali, el-Hâc Mustafa b. Mehmed.