İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 248 Hüküm no: 207 Orijinal metin no: [67b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali b. Mehmed’in aralarındaki alacak verecek hususunda Hasan Ağa ve kardeşi İbrahim ile birbirlerinin zimmetlerini ibra ettikleri Vilâyet-i Anadolu’da Aydın Güzelhisarı ahâlîsinden es-Seyyid Ali b. Mehmed nâm kimesne meclis-i şer‘-i şerîf-i enverde işbu râfi‘u’l-kitâb Hasan Ağa b. Hüseyin nâm kimesne ile karındaşı İbrahim Ağa b. el-mezbûr Hüseyin tarafından husûs-ı âti’z-zikrde vekîli olduğu Ramazan Ağa b. Süleyman ve es-Seyyid el-Hâc Hüseyin Efendi b. Mehmed nâm kimesnelere şehâdetleriyle sâbit olan Mehmed Emin Efendi b. el-Hâc Abdullah mahzarlarında ikrâr ve takrîr-i kelâm edip mezbûr Hüseyin Ağa bundan akdem akdem mârrü’z-zikr Güzelhisar kazâsına tâbi Umurbey karyesinde vâki‘ bir bâb menzili babası mezbûr Mehmed sâkin olmak üzere beher sene benden kırkar guruşa istîcâr edip icâre-i mezkûreden on dört senede müctemi‘a beş yüz altmış guruş mezbûr Hüseyin Ağa’dan taleb ederim deyü tesâddî eylediği da‘vâmdan meccânen fâriğ olup ve Aydın Sancağı’nda Dağ ze‘âmeti demekle ma‘rûf ze‘âmetin mülhakātından olan perâkendeleri ve Benlizâde ze‘âmetinin ve Lütfü Efendi ze‘âmeti perâkendeleri seksen bir ve seksen iki ve seksen üç ve seksen dört seneleri der-uhde ve iltizâmımda olup hâsıl olan a‘şâr ve sâir mahsûlâtı re‘âyâdan ben almak iktizâ eder iken müvekkil-i mezbûr İbrahim Ağa sinîn-i mezkûrede cem‘an yedi yüz elli guruş re‘âyâdan cem‘ ve tahsîl etmeğe ze‘âmet sahibleri tarafından vekâleten hâlâ taleb ederim deyü da‘vâya tesâddî eylediğimde ol dahi ancak yüz doksan guruşu ahzını ikrâr mâ‘adâyı inkâr birle beynimizde münâza‘ât vâki‘ olmuşdu el-hâletü hâzihî beynimize muslihûn tavassut edip müvekkil-i mezbûr İbrahim Ağa işbu yedime verdiği temessük mantûkunca Aydın Güzelhisarı kazâsına tâbi‘ kendi ze‘âmeti ve âhardan iltizâm eylediği Kadıkaryesi ve Eskielbir? ve Şeyhli tımarı hisselerini bana dört yüz seksen dört guruşa der-uhde ve iltizâm edip ben dahi kabûl eylediğimden sonra meblağ-ı mezkûr dört yüz seksen dört guruşun yüz doksan dört guruşunu takās mâ‘adâyı ben mezbûr İbrahim Ağa’ya verip ve re‘âyâdan makbûzu olan yüz doksan guruşdan mâ‘adâyı re‘âyâdan ben ahz etmek üzere terâzî ve terâfuk eyleyip mâ‘adâ beynimizde cereyân eden ahz u i‘tâya müte‘allika âmme-i da‘vâdan herbirimiz âharın zimmetini ibrâ ve ıskāt eyledik dedikde gıbbe’t-tasdîkı’ş-şer‘î mâ vaka‘a bi’t-taleb ketb olundu. Fî 9 Rebî‘ülâhir sene 1185. Şuhûdu’l-hâl: Kethudâ-yı Muhzır Mehmed Ağa, Muhzır Baltacı Mustafa Ağa, es-Seyyid Mehmed Said Çavuş, Muhzır Ali Çelebi, Muhzır Molla İsmail ve gayruhum mine’l-huzzâr.