İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 249 Hüküm no: 208 Orijinal metin no: [67b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali b. Mehmed’in aralarındaki alacak verecek hususunda Hasan Ağa ve kardeşi İbrahim ile birbirlerinin zimmetlerini ibra ettikleri Vilâyet-i Anadolu’da Aydın Güzelhisarı ahâlîsinden işbu râfi‘u’l-kitâb es-Seyyid Ali b. Mehmed nâm kimesne meclis-i şer‘-i şerîf-i enverde Hasan Ağa b. Hüseyin nâm kimesne ile karındaşı İbrahim Ağa b. el-mezbûr Hüseyin tarafından husûs-ı âti’z-zikrde vekîl olduğu Ramazan Ağa b. Süleyman ve es-Seyyid el-Hâc Hüseyin Efendi b. Mehmed nâm kimesneler şehâdetleriyle sâbit olan Mehmed Emin Efendi b. el-Hâc Abdullah mahzarında ikrâr ve takrîr-i kelâm edip mezbûr Hüseyin Ağa bundan akdem mârrü’z-zikr Güzelhisar kazâsına tâbi‘ Umurbey karyesinde vâki‘ bir bâb menzilimi babası mezbûr Mehmed sâkin olmak üzere beher sene benden kırkar guruşa istîcâr edip icâre-i mezbûreden on dört senede müctemi‘a beş yüz altmış guruş mezbûr Hüseyin Ağa’dan taleb ederim deyü tesâddî eylediğim da‘vâmdan meccânen fâriğ olup ve Aydın Sancağı’nda Dağ ze‘âmeti demekle ma‘rûf ze‘âmetin mülhakātından olan perâkendeleri Benlizâde ze‘ametinin ve Lütfü Efendi ze‘âmetinin perâkendeleri seksen bir ve seksen iki ve seksen üç ve seksen dört seneleri der-uhde ve iltizâmımda olup hâsıl olan a‘şâr ve sâir mahsûlâtı re‘âyâdan ben almak iktizâ eder iken müvekkil-i mezbûr İbrahim Ağa sinîn-i mezkûrede cem‘an yedi yüz elli guruş re‘âyâdan cem‘ ve tahsîl etmekle ze‘âmet sahibleri tarafından vekâleten hâlâ taleb ederim deyü da‘vâya tesâddî eylediğimden ol dahi ancak yüz doksan guruş ahzını ikrâr mâ‘adâyı inkâr birle beynimizde münâza‘ât vâki‘ olmuşidi el-hâletü hâzihî beynimize muslihûn tavassut edip müvekkil-i mezbûr İbrahim Ağa işbu yedime [68a] verdiği temessük mantûkunca Aydın Güzelhisarı kazâsına tâbi kendi ze‘âmeti ve âhardan iltizâm eylediği Kadıkaryesi ve Eskielbir? ve Şeyhli tımarı hisselerini bana dört yüz seksen dört guruşa der-uhde ve iltizâm edip ben dahi kabûl eylediğimden sonra meblağ-ı mezkûr dört [yüz] seksen dört guruşun yüz doksan dört guruşunu takās mâ‘adâyı ben mezbûr İbrahim Ağa’ya verip ve re‘âyâdan makbûzu olan yüz doksan guruşdan mâ‘adâyı re‘âyâdan ahz etmek üzere terâzî ve terâfuk eyleyip mâ‘adâ beynimizde cereyân eden ahz u i‘tâya müte‘allika âmme-i da‘vâdan herbirimiz âharın zimmetini ibrâ ve ıskāt eyledik dedikde gıbbe’t-tasdîkı’ş-şer‘î mâ vaka‘a bi’t-taleb ketb olundu. Fî 9 Rebî‘ülâhir sene 1185. Şuhûdu’l-hâl: Kethudâ-yı Muhzırân Mehmed Ağa, Muhzır Baltacı el-Hâc Mustafa, Mehmed said Çavuş b. ( ), Muhzır Ali Çelebi b. ( ), Molla İsmail b. ( ) ve gayruhum mine’l-huzzâr.