İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 250 Hüküm no: 209 Orijinal metin no: [68a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstepaya’nın bir fırın ve değirmendeki gedik hissesini kardeşine sattığı Havâss-ı refî‘a kazâsına tâbi Sütlüce karyesinde vâki‘ bir bâb fırın ve ittisâlinde altı horos değirmen derûnunda mevcûd gedik ta‘bîr olunur yirmi dört re’s bargir ve sâir âlât-ı lâzıme-i ma‘lûme yirmi dört sehim i‘tibârıyla altı sehmine mutasarrıf iken bundan akdem hâlik olan Habbâz Dinos v. Karabet nâm zimmînin verâseti zevce-i metrûkesi Hanna bt. Kirkor nâm Nasrâniye ile sulbî kebîr oğulları Asvador ve Simyon’a ve sulbiye kızı İstepaya nâm Nasrâniye’ye münhasır ve tashîh-i mes’elesi kırk sehimden olup sihâm-ı mezbûreden beş sehmi mezbûre Hanna[‘ya] ve on dörder sehmi merkūmân Asvador ve Simyon’a ve yedi sehmi merkūme İstepaya[‘ya] isâbeti tahakkukundan sonra şahsı Avanis v. Markar [ve] Vartan v. Tomas nâm zimmîler ta‘rîfleriyle mu‘arrefe olan merkūme İstepaya nâm Nasrâniye meclis-i şer‘de karındaşı işbu hâmilü’r-rakīm merkūm Asvador nâm zimmî muvâcehesinde ikrâr ve takrîr-i kelâm edip mârrü’z-zikr fırın ve değirmen derûnunda mevcûd gedik ta‘bîr olunur yirmi dört re’s bargir ve sâir âlât-ı lâzıme-i ma‘lûmeden mûrisimiz hâlik-i merkūm Dinos’un altı sehim hisse-i şâyi‘ası kırk sehim i‘tibârıyla otuz üç sehmi karındaşım merkūm Asvador’un ırsen ve şirâen mülkü olup yedi sehim hisse-i şâyi‘i ırsen yedimde mülküm olmağla hâlâ mârrü’z-zikr yedi sehim hisse-i şâyi‘amı tarafeynden îcâb ve kabûlü hâvî şürût-ı müfsideden ârî bey‘-ı bâtt-ı sahîh-i şer‘î ve safka-i vâhide ile üç yüz guruşa merkūm Asvador’a bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz ve kabûl eylediğinden sonra semeni olan meblağ-ı mezkûr üç yüz guruşu karındaşım merkūm Asvador yedinden tamamen ahz u kabz edip semenine ve bey‘-ı mezkûrun tağrîr ve gabnine gedik husûsuna müte‘allika âmme-i da‘vâdan karındaşım merkūm Asvador’un zimmetini ibrâ ve ıskāt ol dahi ibrâi kabûl eyledi fîmâ-ba‘d mârrü’z-zikr fırın ve değirmen derûnunda mevcûd gedik ta‘bîr olunur yirmi dört re’s bargir ve sâir âlât-ı lâzıme-i ma‘lûme yirmi dört sehim i‘tibârıyla mûrisimiz hâlik-i merkūmun altı sehim hissesi karındaşım merkūm Asvador’un ırsen ve şirâen mülkü olup benim kat‘a alâka ve medhalim kalmamışdır dedikde gıbbe’t-tasdîkı’ş-şer‘î mâ vaka‘a bi’t-taleb ketb olundu. Fi’l-yevmi’r-râbi‘ min- Rebî‘i’l-âhir li-sene hamse ve semânîn ve mie ve elf. Şuhûdu’l-hâl: es-Seyyid el-Hâc Ebûbekir b. el-Hâc Mehmed, Molla Mehmed b. ( ), Sofular Ustası Mustafa b. el-Hâc Mehmed, Ahmed Ağa b. el-Hâc Hüseyin, Ekmekçi Kethudâsı Ali Ağa b. Abdurrahman, Ali Beşe b. İbrahim, İbrahim b. Bayram, Hasan Usta b. Hüseyin, Molla Hasan b. Abdullah, Aram v. Gaspar, Markos v. Mihail, Avanis v. Markos, Avanis v. Tomas.