İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 251 Hüküm no: 210 Orijinal metin no: [68b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Uncu Ahmed Beşe’nin uncu değirmenindeki gedik hissesini sattığı Uncu tâifesinden Ahmed Beşe b. Mehmed nâm kimesne meclis-i şer‘-i şerîf-i enverde işbu hâmilü’r-rakīm Kigork v. Mardiros nâm zimmî muvâcehesinde ikrâr ve takrîr-i kelâm edip mahrûse-i Galata’ya muzâfe kasaba-i Beşiktaş’da Köprübaşı nâm mahâlde vâki‘ iki horos uncu değirmeni derûnunda mevcûd gedik ta‘bîr olunur sekiz re’s bargir ve sâir âlât-ı lâzıme-i ma‘lûme akd-i âti’z-zikrin sudûruna değin yedimde mülk ve hakkım olmağla hâlâ ben mârrü’z-zikr gedik ta‘bîr olunur sekiz re’s bargir ve sâir âlât-ı lâzıme-i ma‘lûme sekiz sehim i‘tibârıyla dört sehim hisse-i şâyi‘asını tarafeynden îcâb ve kabûlü hâvî şürût-ı müfsideden ârî bey‘-ı bâtt-ı sahîhü’ş-şer‘î ve safka-i vâhide ile altı yüz guruşa merkūm Kigork’a bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz ve kabûl eylediğinden sonra semeni olan meblağ-ı mezkûr altı yüz guruşu merkūm Kigork yedinden tamamen ahz u kabz edip semenine ve bey‘-ı mezkûrun tağrîr ve gabnine ve gedik husûsuna müte‘allika âmme-i da‘vâdan herbirimiz âharın zimmetini ibrâ ve ıskāt ve herbirimiz ber-vech-i muharrer âharın ibrâsını kabûl eyledik fîmâ-ba‘d mârrü’z-zikr değirmen derûnunda mevcûd gedik ta‘bîr olunur sekiz re’s bargir ve sâir âlât-ı lâzıme-i ma‘lûme sekiz sehim i‘tibârıyla dört sehim hisse-i şâyi‘a merkūm Kigork’un mülk-i müşterâsı ve hakk-ı sırfı olup dört sehimde benim alâka ve medhalim kalmamışdır dedikde gıbbe’t-tasdîkı’ş-şer‘î mâ vaka‘a bi’t-taleb ketb olundu. Fi’l-yevmi’s-sâmin min-şehri Rebî‘ülâhire li-sene hamse ve semânîn ve mie ve elf. Şuhûdu’l-hâl: Molla Mustafa b. el-Hâc Mehmed, Uncular Kethudâsı Mustafa b. Mehmed, Molla Ahmed b. el-Hâc Hüseyin, Ekmekçiler Kethudâsı Ali Ağa b. Abdurrahman ve gayruhum [mine’l-huzzâr]. Filyos v. Karabet, Markos v. Semayel, Aram v. Gaspar, Avanis v. Markar, Avanis v. Tomas