İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 256 Hüküm no: 215 Orijinal metin no: [69b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kadı Mehmed Emin Efendi’nin evini Sarrâf Artin’e istiğlâl yoluyla sattığı Medîne-i Üsküdar’da Câmi‘-i kebîr mahallesinde sâkin fahrü’l-kuzâtü’l-kirâm Mehmed Emin Efendi b. Ahmed meclis-i şer‘-i şerîf-i enverde sarrâf tâifesinden işbu hâmilü’r-rakīm Artin v. Haçuk nâm zimmî muvâcehesinde ikrâr-ı tâm ve takrîr-i kelâm edip mahalle-i mezbûrede vâki‘ bir tarafdan benim âhar menzilim ve bir tarafdan Feridun Ağa odaları ve bir tarafdan es-Seyyid Mustafa Efendi veresesi menzilleri ve bir tarafdan tarîk-i âm ile mahdûd dâhilîde fevkānî üç bâb oda ve bir sofa ve tahtânî bir bâb oda ve matbah ve kenîf ve [bir] mikdar bahçe ve hâriciyede fevkānî üç bâb oda ve bir sofa ve nerdübân üzerinde bir köşk ve tahtânî bir bâb oda ve çukadâr koğuşu ve tahtında ahır ve bi’r-i mâ [ve] bahçeyi müştemil mülk menzilimi merkūm Artin’e iki bin yüz guruşa bi-tarîkı’l-istiğlâl bey‘ ve teslîm ol dahi ber-vech-i muharrer iştirâ ve tesellüm edip meblağ-ı mezkûr iki bin yüz guruşa merkūm Artin yedinden tamamen ahz u kabz eylediğimden sonra merkūm Artin menzil-i mezkûru ba‘de’t-tahliyeti’ş-şer‘iye ve’t-tekābuzi’l-mer‘î târih-i kitâbdan altı ay tamamına değin beher ay kırk birer guruş kırkar akçeden cem‘an iki yüz elli guruşa bana îcâr ve teslîm ben dahi istîcâr ve kabûl eyledim dedikde gıbbe’t-tasdîkı’ş-şer‘î mâ vaka‘a bi’t-taleb ketb olundu Fî 22 min-Rebî‘ülâhir sene 1185. Şuhûdu’l-hâl: İsmail Çelebi b. Ali, Muhzırân Kethudâsı Mehmed Ağa, Ömer Ağa b. Mehmed, Hasan b. Abdullah, Mukayyid Mehmed Efendi.