İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 256 Hüküm no: 216 Orijinal metin no: [70a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Balat Kebîr Fırın Ustası Mikayil’in Ayvansaray Fırını’na ait iskemle üzerinde hak iddiasından vazgeçtiği Mahmiye-i İstanbul’da Balat Kebîr Fırın Ustası Mikayil v. İstefan nâm zimmî meclis-i şer‘-i şerîf-i enverde yine mahmiye-i merkūmede Ayvansaray Fırını ustası işbu hâmilü’r-rakīm Avanis v. Arakil nâm zimmî muvâcehesinde ikrâr ve takrîr-i kelâm edip mârrü’z-zikr Balatkapısı hâricinde vâki‘ bir bâb iskemlenin nısfı benim mutasarrıf olduğum Balat Fırını’na merbût iskemlesi olup nân-ı azîz fırın-ı mezkûrdan gidip bey‘ olagelmişiken merkūm Avanis zikrolunan iskemleyi müstakillen zabtetmekle nısf iskemleden keff-i yede merkūm ustaya tenbîh olunmak matlûbumdur deyü da‘vâya tesâddî eylediğimde ol dahi cevâbında zikrolunan iskemle benim mutasarrıf olduğum Ayvansaray Fırını’na merbût olup öteden beri nân-ı azîz fırın-ı mezkûrdan gidip müstakillen zabt u tasarruf olunup âharın alâkası yokdur deyü beynimizde münâza‘ât-ı kesîre vâki‘ olmuşidi el-hâletü hâzihî ben tesâddî eylediğim nısf iskemle da‘vâsından fâriğ olup zikrolunan iskemle müstakillen Ayvansaray Fırını’na merbût iskemle olup benim kat‘a alâka ve medhalim yokdur dedikde mukırr-ı merkūmu merkūm Avanis vicâhen ve şifâhen tasdîk etmeğin mâ vaka‘a bi’t-taleb ketb olundu Fî-gurret-i Cumâdelûlâ sene 1185. Şuhûdu’l-hâl: Hasan b. Hüseyin, Molla Mustafa b. el-Hâc Ömer, Ahmed Ağa b. Hüseyin, es-Seyyid el-Hâc Ebûbekir b. el-Hâc Mehmed, Ekmekçiler Kethudâsı Ali Ağa b. Abdurrahman, Ali Beşe b. Hasan, İbrahim Beşe b. el-Hâc Kasım, Markos v. Samayel, Kazer v. Melkon, Vartan v. Tomas, Agop v. Serkiz, Sahak v. Kirkor.