İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 257 Hüküm no: 217 Orijinal metin no: [70a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Afife bt. Abdullah’ın alacak hususunda Mehmed Reşid Efendi ile sulh olup birbirlerinin zimmetlerini ibra ettikleri Mahmiye-i İstanbul’da Mollagürânî mahallesinde Safâ Hamamı kurbünde sâkine olup zâtı zeyl-i vesîkada muharrerü’l-esâmî Müslimîn ta‘rîfleriyle mu‘arrefe olan Afife bt. Abdullah nâm hatun meclis-i şer‘-i şerîf-i enverde müderrisîni’l-kirâmdan işbu râfi‘u’l-kitâb Mehmed Reşid Efendi b. el-merhûm Abdülaziz Efendi mahzarında ikrâr ve takrîr-i kelâm edip mezbûr Mehmed Reşid Efendi’nin babası müteveffâ-yı mûmâ-ileyh Abdülaziz Efendi hayatında benden yüz elli guruş istikrâz ve kabz edip mukābelesinde bir altın sâ‘at ve yedi aded âyetli altın yedime rehin vaz‘ etmişidi bundan akdem meblağ-ı mezkûrun yüz yirmi yedi guruşunu yedlerinden ahz ve rihân-ı mezkûreyi kendiye teslîm etmişidim lâkin bâkī kalan yirmi üç guruş ile beher yetmiş para ribhden yedi ayda müctemi‘ on iki guruş otuz parayı mezbûr Mehmed Reşid Efendi tereke-i vâfiyesini kabz etmekle taleb ederim deyü da‘vâya tesâddî eyledikde ol dahi cevâbında ribh-i mezkûr lâzım gelmeyip ve meblağ-ı mezkûru dahi tamamen edâ etmişidik beynimizde münâza‘ât vâki‘ olmuşidi el-hâletü hâzihî beynimize muslihûn tavassut edip beni da‘vâ-yı mezkûrumdan on bir guruş üzerine inşâ-i akd-i sulh eylediklerinde ben dahi sulh-ı mezkûru kabûl ve bedel-i sulh-ı mezkûr on bir guruşu tamamen bana def‘ u teslîm ben dahi ahz u kabz eylediğimden sonra mâ‘adâsı ribh-i mezkûra ve bi’l-cümle husûs-ı mezkûra müte‘allika âmme-i de‘âvî ve mutâlebât ve kâffe-i eymân ve muhâsamâtdan mezbûr Mehmed Reşid Efendi’nin ve müteveffâ-yı mûmâ-ileyh Abdülaziz Efendi’nin ve sâir veresesinin ve mezbûr Mehmed Reşid Efendi’nin vâlidesi hanımefendi hazretlerinin zimmetlerini ibrâ-i âmm-ı kātı‘u’n-nizâ‘ ile ibrâ ve ıskāt eylediğimde ol dahi bana medfû‘u olan [70b] on bir guruşa müte‘allika âmme-i da‘vâdan benim zimmetimi kezâlik ibrâ ve ıskāt edip ve herbirimiz ber-vech-i muharrer âharın ibrâsını kabûl eyledik dedikde gıbbe’t-tasdîkı’ş-şer‘î mâ vaka‘a bi’t-taleb ketb olundu. Fî-gurret-i Cumâdelûlâ sene 1185. Şuhûdu’l-hâl: Merhabazâde Mahmud Efendi b. Mehmed, Abdurrahman b. Abdullah, Muhzırân Kethudâsı Mehmed Ağa, Hasan b. Abdullah, Ömer b. ( ) ve gayruhum mine’l-huzzâr.