İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 258 Hüküm no: 218 Orijinal metin no: [70b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Habbâz İstefan, Bogos ve amcası Bedros’un Eskihamam Fırını ile değirmendeki gedik hisselerini sattıkları Habbâz tâifesinden olup husûs-ı âti’z-zikrde kendi tarafından asîl ve ammisi Bedros v. Karabet v. Bogos nâm zimmî tarafından vekîl olduğu Bedros v. Kiragos ve Melkon v. Artin nâm zimmîler şehâdetleriyle sâbit olan İstefan v. Bogos nâm zimmî meclis-i şer‘-i şerîf-i enverde işbu hâmilü’r-rakīm Koğas v. Anparson nâm zimmî muvâcehesinde bi’l-asâle ve bi’l-vekâle ikrâr ve takrîr-i kelâm edip medîne-i Üsküdar’da Eskihamam Fırını demekle ma‘rûf bir bâb fırın ve ittisâlinde yedi horos değirmen derûnunda mevcûd gedik ta‘bîr olunur yirmi sekiz re’s bargir ve sâir âlât-ı lâzıme-i ma‘lûme yirmi sekiz sehim i‘tibârıyla on dört sehim Aleksan nâm zimmînin ve yedi sehmi müvekkilim ammim merkūm Bedros’un ve yedi sehmi benim yedimde mülküm olmağla hâlâ ben müvekkilim ammim merkūm Bedros’un fırın ve değirmende olan mârrü’z-zikr yedi sehimden iki hisse-i şâyi‘asını ve benim fırın ve değirmende olan yedi sehimden kezâlik iki sehim hisse-i şâyi‘am ki cem‘an dört sehim hisse-i şâyi‘amızı tarafeynden îcâb ve kabûlü hâvî şürût-ı müfsideden ârî bey‘-ı bâtt-ı sahîh-i şer‘î ve safka-i vâhide ile beher sehmi yüzer guruşdan cem‘an dört yüz guruşa merkūm Koğas’a bi’l-asâle ve bi’l-vekâle bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz ve kabûl eylediğinden sonra semeni olan meblağ-ı mezkûr dört yüz guruşu merkūm Koğas yedinden tamamen ahz u kabz edip semenine ve bey‘-ı mezkûrun tağrîr ve gabnine ve gedik husûsuna müte‘allika âmme-i da‘vâdan herbirimiz bi’l-asâle ve bi’l-vekâle âharın zimmetini ibrâ ve ıskāt eyleyip ve herbirimiz ber-vech-i muharrer âharın ibrâsını kabûl eyledik fîmâ-ba‘d mârrü’z-zikr fırın ve değirmen derûnunda mevcûd gedik ta‘bîr olunur yirmi sekiz re’s bargir ve sâir âlât-ı lâzıme-i ma‘lûme yirmi sekiz sehim i‘tibârıyla on dört sehim Aleksan zimmînin ve beş sehmi müvekkilim ammim merkūm Bedros zimmînin ve beş sehmi benim ve dört sehmi merkūm Koğas zimmînin şâyi‘an mülkümüz olup benim ve müvekkilim merkūmun ikişer sehimde kat‘a alâka ve medhalim kalmamışdır dedikde gıbbe’t-tasdîkı’ş-şer‘î mâ vaka‘a bi’t-taleb ketb olundu. Fî 11 min-Cumâdelûlâ sene 1185 Şuhûdu’l-hâl: Ekmekçiler Kethudâsı Ali Ağa b. Abdurrahman, Ahmed Ağa b. el-Hâc Hüseyin, Molla Mustafa b. el-Hâc Mehmed, es-Seyyid el-Hâc Ebûbekir, Markos v. Samayel, Kazer v. Melkon, Vartan v. Tomas.