İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 259 Hüküm no: 219 Orijinal metin no: [70b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hâcce Emine Hatun’un Eskioda civarındaki fırın gediğini satıp fırını da kiraya verdiği Mahmiye-i İstanbul’da Eskioda kurbünde Kırkdörtkuyusu nâm mahâlde vâki‘ bir bâb habbâz fırınının mutasarrıfesi olup zâtı zeyl-i vesîkada muharrerü’l-esâmî Müslimîn ta‘rîfleriyle mu‘arrefe olan Hâcce Emine bt. el-Hâc Ahmed nâm hatun meclis-i şer‘-i şerîf-i enverde işbu râfi‘u’l-kitâb Mehmed Emin [b.] İsmail ve Molla Ömer b. Ahmed nâm kimesneler mahzarında ekmekçiler kethudâsı ve nizâm ustaları hazır oldukları hâlde ikrâr ve takrîr-i kelâm edip fırın-ı mezkûr taht-ı tasarrufumda olup derûnunda mevcûd gedik ta‘bîr olunur kazgan ve kürek ve sâir âlât-ı lâzıme-i ma‘lûme akd-i âti’z-zikrin sudûruna [değin] yedimde mülküm olmağla hâlâ ben mârrü’z-zikr gedik ta‘bîr olunur [71a] kazgan ve kürek ve sâir âlât-ı lâzıme-i ma‘lûme tarafeynden îcâb ve kabûlü hâvî şürût-ı müfsideden ârî bey‘-ı bâtt-ı sahîh-i şer‘î ve safka-i vâhide ile mezbûrân Mehmed Emin ve Molla Ömer’e dört yüz guruşa ale’l-iştirâki’s-seviy bey‘ ve temlîk ve teslîm ve fırın-ı mezkûru târih-i kitâbdan beher mâh onar guruşa mezbûrâna îcâr ve teslîm onlar dahi ber-vech-i muharrer âlât-ı mezkûreyi iştirâ ve temellük ve tesellüm ve fırın-ı mezkûru istîcâr ve kabûl edip semen-i mezkûr dört yüz guruşu yedlerinden tamamen ahz eyledim fîmâ-ba‘d gedik ta‘bîr olunur âlât-ı lâzıme-i ma‘lûme mezbûrân Mehmed Emin ve Molla Ömer’in ale’l-iştirâki’s-seviy mülk-i müşterâları olup benim kat‘a alâka ve medhalim kalmamışdır dedikde gıbbe’t-tasdîkı’ş-şer‘î mâ vaka‘a bi’t-taleb ketb olundu. Fî 15 min-Zilka‘deti’ş-şerîfe sene 1185. Şuhûdu’l-hâl: es-Seyyid el-Hâc Ebûbekir b. el-Hâc Mehmed, Hüseyin Usta b. Hüseyin, Ahmed Ağa b. Hüseyin, Ekmekçiler Kethudâsı Ali Ağa b. Abdurrahman, Kethudâ-yı Muhzırân Mehmed Ağa.