İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 259 Hüküm no: 220 Orijinal metin no: [71a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sarı Nasuh Mahallesi Avârızı Vakfı’na Mehmed Şerif Efendi’nin mütevellî tayin olunduğu Dârü’l-hilâfeti’l-aliyye ve makarru’s-saltanati’s-seniyye[‘de] mesned-i şerî‘at-ı garrâ olan efendimiz hazerâtı nezâretinde olan evkāfdan mahmiye-i İstanbul’da Sarı Nasuh mahallesi avârızı vakfının bâ-hüccet-i şer‘iye mütevellîsi olan Mustafa Efendi b. Ahmed meclis-i şer‘-i şerîf-i enverde takrîr-i kelâm ve ta‘bîr ani’l-merâm edip ben tevliyet-i merkūmeden hüsn-i rızâm ile kasr-ı yed eyledim kıbel-i şer‘den dahi tevliyet-i merkūme üzerimden ref‘ ve mahalle-i mezbûre imâmı olup her vechile mu‘temedün-aleyh ve müstakīm, dîndâr ve tevliyet-i mezbûre umûrunu ikāmete zü’l-iktidâr olan işbu hazır bi’l-meclis Mehmed Şerif Efendi nasb olunmak matlûbumdur deyü tafsîl ve iş‘âr ve keyfiyet-i hâl bast olunan minvâl-i muharrer üzere olduğunu zeyl-i kitâbda isimleri ıstâr kılınan udûl-i ahyâr i‘lâm ve ihbâr etmeğin mûcibiyle hâkim-i muvakkı‘-ı a‘le’l-kitâb -rafa‘a kadrehû mevlâhü’l-vehhâb- efendi hazretleri dahi tevliyet-i merkūmeyi mezbûr Mustafa Efendi üzerinden ref‘‘ ve kıbel-i şer‘den işbu râfi‘u’l-kitâb mezbûr Mehmed Şerif Efendi b. es-Seyyid Mustafa Efendi’yi vakf-ı mezbûra mütevellî nasb buyurduklarında ol dahi ber-minvâl-i muharrer tevliyet-i merkūmeyi kabûl ve hidemât-ı lâzımesini kemâ-yenbagī ikāmete müte‘ahhid olmağın mâ hüve’l-vâki‘ li-ecli’t-tevsîk bi’l-ibtigā ketb ü tenmîk olundu. Fî 25 Cumâdelûlâ sene 1185. Şuhûdu’l-hâl: el-Hâc Mustafa b. Abdullah, Osman Çelebi b. Halil, Ali Çelebi b. Abdullah, Molla İsmail b. Ali, Muhzırân Kethudâsı Mehmed Ağa b. Mehmed.