İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 260 Hüküm no: 221 Orijinal metin no: [71a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kutucu esnafının talebi üzerine Mehmed Usta’nın kethudâ tayin olunduğu Âsitâne-i aliyye’de Odunkapısı dâhilinde vâki‘ kutucu esnâfının yiğitbaşıları olan es-Seyyid İbrahim Çelebi b. Abdullah ve müsinn [ü] ihtiyâr ustalarından el-Hâc Ali b. Mustafa ve el-Hâc Hasan b. Ahmed ve Ömer Odabaşı b. Mustafa ve Süleyman b. Cafer ve Osman b. Hasan ve Feyzullah b. Mustafa ve İbrahim b. Abdullah ve Abdülkerim b. Mustafa ve Mehmed Emin b. Mustafa ve Mehmed b. Ömer ve Halil b. Abdullah ve sâirleri meclis-i şer‘-i şerîf-i enverde yine esnâf-ı mezbûreden işbu râfi‘u’l-kitâb Mehmed Usta b. el-Hâc Ahmed mahzarında herbirleri takrîr-i kelâm ve ta‘bîr ani’l-merâm edip kethudâmız olan işbu hazır bi’l-meclis diğer Mehmed Usta b. Hüseyin pîr ve alîl olup kethudâlık umûrunu idâreden izhâr-ı acz ve hüsn-i rızâsıyla keff-i yed etmekle mezbûr Mehmed Usta cümlemizin muhtârı ve kethudâlık umûrunu her vechile idâreye kādir olmağla üzerimize kıbel-i şer‘-i enverden kethudâ nasb u ta‘yîn olunmak matlûbumuzdur deyü iltimâs etmeleriyle a‘lâ-yı kitâbı terfî‘-i [tevkī‘-i] müstetâbı ile tezyîn buyuran hâkim-i hâsim efendi hazretleri mezbûr Mehmed Usta’yı esnâf-ı mezbûrun talebleriyle kethudâ nasb ü ta‘yîn [ve umûr-ı] mu‘tâdelerini alâ-vechi’l-istikāmet rü’yet etmek üzere tenbîh buyurdukları ol dahi kabûl ve hilâf-ı şer‘-i mutahhar hareket etmeyip kadîmleri üzere umûrlarını rü’yet ve idâreye müte‘ahhid olmağın mâ hüve’l-vâki‘ bi’t-taleb ketb olundu. Fî 27 min-Cumâdelûlâ sene 1185. Şuhûdu’l-hâl: el-Hâc Mustafa b. Mehmed, Osman Çelebi b. Halil, Ali Çelebi [b.] Abdullah, İsmail Çelebi b. Ali, Muhzırân Kethudâsı Mehmed Ağa b. Ahmed ve gayruhum. [71b] Temme’l-kelâm bi-avni’llâhi’l-azîzi’l-allâm Hasbiyallâhu vahdehû ve kefâ abdehû Yahya A‘lemül-ulemâ’i’l-izâm efdalü’l-fudalâi’l-fihâm ser-efrâz-ı mevâlî-i eyyâm devletli inâyetli semâhatli İlmî Efendi dâmadı Ali Molla Efendi hazretlerinin zaman-ı sa‘âdetlerinde olan vekāyi‘in hüccet sicillidir