İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 261 Hüküm no: 222 Orijinal metin no: [71b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yağcı Panayot ile kardeşlerinin alacak hususunda amcaları ile iki yüz kuruşa sulh oldukları Vilâyet-i Rumeli’de Mora cezîresinde Karitena kazâsına tâbi‘ İstepençe nâm karye ahâlîsinden olup mahmiye-i İslambol’da Kantarcılar kurbünde yağcı olan Panayot v. Yani nâm zimmî meclis-i şer‘-i şerîf-i enverde ammisi işbu hâmilü’r-rakīm Papa Dinyanos v. Tanaş nâm zimmî muvâcehesinde üzerine da‘vâ ve takrîr-i kelâm edip târih-i kitâbdan on bir sene mukaddem hâlik olan babam Yani v. Tanaş hayatında ammim merkūm Papa Dinyanos yedine emânet vaz‘ eylediği altı yüz zer-i mahbûbu babam merkūm kable’l-ahz hâlik olup meblağ-ı mezkûr benimle er karındaşım Tanaş’a ve kız karındaşım Poltemi nâm Nasrâniye’ye hasren mevrûs olmağla hâlâ ben meblağ-ı mezkûrdan beş sehim i‘tibârıyla iki sehim hisse-i irsiyeme isâbet eden iki yüz kırk altını ammim merkūmdan taleb ederim deyü da‘vâya tesâddî eylediğimde ol dahi ikrâr lâkin meblağ-ı mezkûru babam merkūmun helâkinden sonra sen kendi tarafından asâleten ve karındaşları tarafından vekâleten tamamen benden ahz ve kabz etmişidin deyü def‘a tesâddî biz[im] beynimizde münâza‘ât-ı kesîre cereyân etmişidi el-hâletü hâzihî beynimize muslihûn tavassut edip beni da‘vâ-yı mezkûremden ammim merkūm Papa Dinyanos ile iki yüz guruşa inşâ-i akd-i sulh eylediklerinde ben dahi sulh-ı mezkûru kabûl ve bedel-i sulhdan iki yüz guruşu işbu meclis-i sulhda tamamen bana def‘ u teslîm ve ben dahi bi’t-tamam ahz u kabz eylediğimden sonra mâ‘adâya ve bi’l-cümle husûs-ı mezkûra müte‘allika âmme-i da‘vâdan ammim merkūmun zimmetini ibrâ eylediğimde ol dahi bana medfû‘u olan iki yüz guruşa müte‘allika âmme-i da‘vâdan benim zimmetimi kezâlik ibrâ ve herbirimiz âharın ibrâsını kabûl etdik dedikde gıbbe’t-tasdîkı’ş-şer‘î mâ vaka‘a bi’t-taleb ketb olundu. Fî 16 min-Cumâdelâhire sene 1185. Şuhûdu’l-hâl: Abdi b. Hamza, Mustafa b. Hasan, Ali b. Abdullah, İsmail b. Ali, Muhzırân Kethudâsı Mehmed Ağa, Miho v. Panayot, Nikola v. Panayot, Andon v. Yani, Polho v. Hristo.